Lukas 23

Yesus nibit ngadop mai Pilatus

1 Pongo gino sariꞌ ulun daꞌ Pengadilan Agama ino ngkiriyod, giri iro ngibit Yesus ngadop mai Pilatus. 2 Daꞌ dino iro nimpun pumpan Yesus, dagu kon niro, “Ulun itu ngatun an lop piliꞌ daꞌ damon ulun Yahudi, Oyo nyungkang ulun-ulun intok bayar pajak daꞌ Kaisar, dangan Oyo ngakuꞌ gaꞌ Oyo tu Rajaꞌ Penyolomot.” 3 Pilatus gantano daꞌ Yesus, “Monong kiꞌ Okou tu Rajaꞌ ulun Yahudi?” Sambung kon Yesus, “Okou orop an mendagu gaꞌ Aku tu Rajaꞌ ulun Yahudi.” 4 Dagu kon Pilatus daꞌ imam-imam kepalaꞌ dangan sariꞌ ulun suang daꞌ dino, “Aku lop ketamu kon an salaꞌ daꞌ Ulun itu.” 5 Tapiꞌ iro totop ngododot, dagu kon niro, “Oyo ngatun an lop piliꞌ daꞌ ulun-ulun daꞌ sariꞌ runuang Yudea, timpun kono intad runuang Galilea matong mai ditu.” 6 Togol Pilatus kidingog angeno oyo gantano, “Monong kiꞌ Ulun itu ulun Galilea?” 7 Kon oyo pandai gaꞌ Yesus tu ulun intad runuang Galilea an kunuasaꞌ Herodes, oyo mancuk ulun ngibit Yesus mai Herodes an daꞌ togol ino ri po sino daꞌ kutaꞌ Yerusalem.

Yesus nibit mai Herodes

8 Togol Herodes gilong Yesus, oyo manod sobob laid nyo, oyo kiꞌ gilong So, sobob oyo pongo sarok kidingog ago wat Yesus. Oyo po ngarop kalap gilong Yesus mal mujisat. 9 Herodes gantano-gantano daꞌ Yesus, tapiꞌ Yesus lop nyambung so. 10 Tapiꞌ daꞌ togol ino ri po imam-imam kepalaꞌ dangan guruꞌ-guruꞌ agama Yahudi ngkiriyod dangan pumpan Yesus turus. 11 Makaꞌ Herodes dan tentaraꞌ-tentaraꞌ no numbulang dangan pajajaꞌ-pajajaꞌ daꞌ Yesus, giri tentaraꞌ-tentaraꞌ ino pusumbung jubah rajaꞌ daꞌ Yesus. Herodes pon mancuk tentaraꞌ-tentaraꞌ no ngibit So limikad mai Pilatus ondo. 12 Daꞌ odou ino po, Herodes dangan Pilatus pon bedamai, sebelum no iro duo tu mpogosou.

Yesus nibit limikad mai Pilatus

13 Giri Pilatus nimung imam-imam kepalaꞌ, ulun-ulun adang ulun Yahudi dangan ulun suang, 14 dangan maraꞌ daꞌ siro, “Akau pongo ngibit Ulun itu mai dakon sebagai ulun an ngatun an lop piliꞌ daꞌ ulun. Akau gilong orop aku pongo gantano-gantano So, tapiꞌ aku lop ketamu salaꞌ-salaꞌ an punumpan muyun daꞌ So. 15 Sinino po Herodes lop ketamu daꞌ salaꞌ No. Sobob ino oyo mancuk tentaraꞌ-tentaraꞌ no ngibit So mikad mai damon. Sobonor no lop nogom salaꞌ an binal No, intok No nukum matong ondot. 16 Jadiꞌ aku mabal So koyo, ginoi ngolopos So.” [ 17 Sobob daꞌ odou Paskah, Pilatus arus ngolopos singkiring ulun intad penjaraꞌ.] 18 Tapiꞌ iro rumuat, “Panatoi muyun koyo, lonopos muyun Barabas daꞌ damon!” 19 Barabas tu penanjaraꞌ sobob oyo ngapu kerajaan Roma dangan ngamatoi ulun. 20 Pilatus mendagu ondo daꞌ siro dangan dagu adang, sobob oyo kiꞌ ngolopos Yesus. 21 Tapiꞌ iro rumuat, “Senalib koyo! Senalib koyo!” 22 Dagu kon Pilatus an kutulungaiꞌ surung no daꞌ siro, “Kon salaꞌ Ulun itu? Aku lop ketamu salaꞌ No intok No nukum matong ondot. Jadiꞌ aku mabal So koyo, ginoi ngolopos So.” 23 Tapiꞌ iro rumuat turus mancuk Yesus tu arus senalib, dangan bangun kono dagu niro tu banayaꞌ Pilatus. 24 Giri Pilatus ngukum Yesus mayaꞌ daꞌ dagu ulun suang ino. 25 Dangan nggirad an kinitak niro, Pilatus ngolopos Barabas an ngapu kerajaan Roma, dangan an ngamatoi ulun. Giri Pilatus nak Yesus daꞌ siro intok niro mal kon an kuguang niro.

Yesus nibit intok senalib

26 Togol niro ngibit Yesus, iro nagong ulun an karan no Simon intad Kirene an bagu matong intad luar kutaꞌ, giri iro nak salib daꞌ lep no, intok no nyan salib ino mayaꞌ Yesus. 27 Ulun suang mayaꞌ So; daꞌ antaraꞌ ino suang danduꞌ an nangiꞌ dangan ngkuruduꞌ daꞌ So. 28 Yesus gilinga gilong mai siro dangan mendagu, “Uy danduꞌ-danduꞌ Yerusalem maꞌ kau nangiꞌ Dakon, tapiꞌ tenangiꞌ muyun kiring muyun orop dangan anak-anak muyun. 29 Sobob sino togol no mino ulun mendagu, ‘Manod nakau danduꞌ-danduꞌ an lop kalap sino anak, an lop pongo ganak dangan an lop pongo pititiꞌ anak.’ 30 Sino togol no mino ulun mendagu, ‘Waiꞌ muruk-muruk sawat nupan damon dangan muruk-muruk rumot buyus nimbun damon!’ 31 Sobob gaꞌ ulun mal sinino daꞌ taun an masi uyag, kon ayu bal niro daꞌ taun an matoi?” 32 Dangan sino po dungaiꞌ kiring ulun arat nukum matong ondot mbayaꞌ dangan Yesus.

Yesus senalib

33 Togol niro matong daꞌ janaꞌ an karan no Tengkorak, iro nyalib Yesus daꞌ dino dangan po kudungaiꞌ ulun arat ino, an singkiring daꞌ siad kimidis No dangan an singkiring po daꞌ siad kait No. 34 Dagu kon Yesus, “Amaꞌ, nampun Mu iro, sobob iro lop pandai kon an binal niro.” Giri tentaraꞌ-tentaraꞌ ino cabut undi intok magiꞌ kurub Yesus. 35 Suang ulun ngkiriyod gilong sariꞌ kon an mangun daꞌ dino. Ulun-ulun adang ulun Yahudi pejajaꞌ Yesus, dagu kon niro, “Ulun bokon sonolomot No, gaꞌ Oyo tu Rajaꞌ Penyolomot an piniliꞌ Allah, sonolomot No kiring No orop.” 36 Tentaraꞌ-tentaraꞌ ino po pejajaꞌ So, iro nak So timug anggur an osom. 37 Dagu kon niro, “Gaꞌ Okou Rajaꞌ ulun Yahudi, sonolomot Mu nyo kiring Mu!” 38 Sino po tunulis daꞌ timbou utok No: “Su nyo Rajaꞌ ulun Yahudi.” 39 Singkiring intad ulun arat an senalib ino numbulang So, dagu kono, “Lop kiꞌ Kou tu Rajaꞌ Penyolomot? Sonolomot Mu akai dangan kiring Mu.” 40 Giri dagu kon ulun arat an dondo ino daꞌ so, “Lop kiꞌ kou alaꞌ daꞌ Allah? Okou tu po katung nukum matong ondot nggirad So. 41 Duo tu taman nyo nukum sobob duo pongo mal an arat. Tapiꞌ Ulun itu lop mal an salaꞌ.” 42 Oyo nurus dagu no ondo, “Yesus ningot Mu aku togol Mu matong sebagai Rajaꞌ.” 43 Sambung kon Yesus daꞌ so, “Aku maraꞌ daꞌ diyun, intad odou itu okou po mino mbayaꞌ Dakon daꞌ dalom surgaꞌ.”

Yesus ondot

44 Daꞌ togol odou ino ri kiraꞌ-kiraꞌ daꞌ jam puluꞌ sag dungaiꞌ, giri daꞌ runuang ino romondom matong imaiꞌ, jam tulungaiꞌ, 45 sobob mato odou lop sino tawang no. Korden tupal intok nutub sapad janaꞌ an paling kudus daꞌ Baloi Allah, incang bial dungaiꞌ. 46 Giri Yesus rumuat, “Amaꞌ, Aku nak penyawo Ku daꞌ Diyun.” Pongo kon mendagu Oyo pon ondot. 47 Togol kapitan Roma gilong kon an pongo mangun, oyo ngumpod Allah, dagu kono, “Monong nyo Oyo tu lop salaꞌ.” 48 Kon ulun suang gilong kon an pongo mangun. Iro muliꞌ intad dino dangan kadaꞌ an bosoncol. 49 Sariꞌ ulun an kulig Yesus dangan danduꞌ-danduꞌ an mayaꞌ So intad Galilea, ngkiriyod intad alud gilong angeno.

Yesus lonobong

50 Sino ulun karan no Yusuf, oyo intad Pengadilan Agama, oyo ulun an piliꞌ dangan bonor. 51 Oyo lop setuju daꞌ kon an binal ulun-ulun Pengadilan Agama ino daꞌ Yesus, oyo intad Arimatea janaꞌ kutaꞌ Yahudi, oyo garung woktuꞌ no Allah mirintaꞌ sebagai Rajaꞌ. 52 Yusuf pon makou ntamu Pilatus, oyo kitak kiring Yesus an pongo ondot. 53 Pongo gino, oyo putumun kiring Yesus intad salib, giri ngulukus So dangan lanuꞌ purak. Giri pajanaꞌ kiring Yesus an pongo ondot ino daꞌ dalom labangan an kanali daꞌ muruk batu, lop pongo sino ulun ondot an punuluid daꞌ dino. 54 Odou ino odou ulun Yahudi nyiap odou Sabat, dangan odou Sabat ino amad nyo. 55 Danduꞌ-danduꞌ an mayaꞌ Yesus intad Galilea mayaꞌ Yusuf gilong labangan ino. Iro gilong senayu kiring Yesus an pongo ondot penajanaꞌ daꞌ dalom labangan. 56a Pongo gino iro muliꞌ intok nyidiaꞌ daꞌ daun-daun, dangan umau lanyung intok no mino tinak daꞌ kiring Yesus.

Yesus tumuguliꞌ uyag ondo

56b Daꞌ odou Sabat, iro lop ngusaꞌ, mayaꞌ pirintaꞌ kitab Taurat.