Egolisi nda domi
2
Mpa owɛ Titɔ, ogolisɛ bato yɔnga nde atɔlɛli a egolisi a domi. 2 Oengodeɛ banunɔ la baboo bende, babá-i baguliaga éma, babɛ basikɛ na babɛ bato a lɔkɛkɛ, na bande bakakamani asub'a boosobela, asub'a ekóndi na asub'a bubila. 3 Ago, oengodeɛ basia-nunɔ, babɛ na tambela nde atɔlɛli mosá la Mokonga. Abá-i bayɔngaga ajede ang'a bato batɔɔ, babá-i mɛnɔ bakɔbɛ la makana. Mpa, bagolisɛ gɔɛ nde egolisi a domi 4 nga bende, baɛɔngianɛ banjɔngɔ a bake kónda la bamuny'abɔ na kónda la ban'abɔ, 5 babɛ bato a lɔkɛkɛ, na makanga bujede. Bakɔlɛ nkási nnda asub'a endu abɔ hɛlɛ, na babɛ bake banja na baesikisɛ bamuny'abɔ nga bende, bato babhɔnisa-i yɔnga nda Mokonga.6 Ìbo go, oehanɛ baluana-li ote babɛ bato a lɔkɛkɛ 7 a yɔnga-li bhulibhu. Na owɛ obɛ ngolisi manja a ɛkɔli nd'aɔ. Ogolisɛ egolisi anja, makanga ndɛlɛ-ndɛlɛ. 8 Ogolisɛ yɔnga la domi inde bato nnd'aanga batɔisa ngoisa-li, nɛngɛbɛ bande nnd'aki balebea yɔnga nd'aɔ bakuɛ soni na bóla la yɔnga ajede nde aanga bayɔngaga a segelisaga l'asu. 9 Atɔlɛli bakɔbɛ baesikisɛ bakama nde babɔ a éma-li bhulibhu na kɔla la inde aɛbɔngɛla. Na bakaba-i bangoisa yɔnga l'abɔ 10 na kanga bauba nkumba nd'abɔ. Baɔngianɛ ibɔ nganga esa-li bhulibhu bende, ba nde bato nde atɔlɛli boosobela l'abɔ. Ang'a indɔ, basikisɛ egolisi nda Mokonga, Namisi nde masu a éma-li bhulibhu.
Yesu akóndi bende bebɛ bato nde baɛ
11 Nga, boangɔ nda Mokonga inde abhìsa bolamɔ ang'a bato-li bɔbhu aye aɔnɛani. 12 Boangɔ nde asogolisa bende, bedoɛ bujede na sei-sei nda asub'a lɛɛngɔ nde, na belendɛ a lɛɛngɔ nda ndiende na lɔkɛkɛ, na domi na sikisa la Mokonga. 13 Ìbo yɛu, bebondea bujɛmɛ nde bɛɛkɛtɛli, na ɔna la boumu nda Mokonga nde masu mati, na Namisi nde masu Yesu Kilisitɔ, mbènɔ nde aóbela mande nee. 14 Yesu Kilisitɔ ai aegabhi iyɛ amɛnɛ a yɔnga l'asu nga bende, asolamisɛ a bujede-li bhulibhu, na lɔlia l'asu nga, bebɛ bato nde baɛ iyɛ nganga bande ba na sei a kɔla la ɛkɔli anja†. 15 Ìbo yɛu atɔlɛli ogolisɛgɛ, na dhodeisa la meema bato na kálea l'abɔ na bokama nd'aɔ bhulibhu. Nto aɔbhɔnisa-i mɛnɔ.