Nseseɔ
1
Eme Pɔlɔ, nkɔbɛ nde ma Mokonga na ntetei nde ma Yesu Kilisitɔ yɛu neoandekei baloa nde. Mokonga amotei a sɔndɔlisa la bato nde ai aɛsɔmbɔli nga, banebeɛ na úbhisa l'abɔ domi nde atɔlɛli asub'a sikisa la Mokonga. 2 Ang'a indɔ, babá mande na bɔɛkɛtɛla a lenda la mɛyɔ, inde Mokonga, mmbe nnd'aki ayɔnga mbéa, ai n'aye asolàki mosá la mbènɔ bhulibhu. 3 A mbènɔ nde Mokonga Namisi nde masu ai abhísi, ai aúbhisi yɔnga nd'aɛ hɛlɛ nyɛnɛla l'a mbinɔ nde ai amososii bende nelabhɛ yu. 4 Neoandekei baloa nde, owɛ Titɔ, nami niina asub'a boosobela nde asotulisani. Ebha Mokonga, na Kilisitɔ Yesu Namisi nde masu, aopɛ boangɔ na bɔkɔlɔ.Ɛkɔli nda Titɔ a kesanga nda Kɛlɛtɛ
5 Inde ai aangisi neodoa naa Kɛlɛtɛ a nde nga bende, ɔsɔlɔliɛgɛ éma nde adhuma asaki, na mesa la bakpɛga a kela bɔma, sinde ai neososii nee. 6 Atɔlɛli nkpɛga nde maa kanisà abɛ mmbe tambela l'aɛ nnd'aanga basolea. Moo nde abɛ masa na nke moti sìa. Ban'aɛ babɛ bàlebei, bande nnd'aanga baechoela a tambela ajede na moo akpɛ. 7 A nde bende, atɔlɛli nangi-kanisà abɛ nto nde nnd'aanga bansoleaga nga, iyɛ alanga kanisà nda Mokonga. Abá-i nto a boekumbaga, nto a sunulaga, mokundilia aɔ nto a emani, aɔ go nto nde akaba ntondɔ a asii ajede. 8 Mpa abɛ gɔɛ nde nto a pikila la bato, nto a kónda la bonja, nto a lɔkɛkɛ, nto a domi, mbhumani na mmbe aɛkɔlɔmisa iyɛ nganga. 9 Atɔlɛli abɛ nto nde abhɛdɛla hɛlɛ yɔnga la domi inde atɔlɛli boosobela-li, sinde ai bangolisi nee. Ìbo yɛu, atɔisa dhodeisa la meema a bato batɔɔ nyɛnɛla l'a egolisi a domi, na kalea la bande bangoisa egolisi nd'aɛ†.
Bàgolisi a mbéa
10 A nde bende, bato batì, kpɛɛ mbɛɛ angal'a baYuda nde baetii bakilisitɔ, nnda baɔka yɔnga la nto matɔɔ. Baedhema bato na yɔnga-yɔnga nd'abɔ. 11 Atɔlɛli oedhaisɛ nga, asub'a endu ntuantua baebungisaga bato-li bɔbhu na egolisi nde nnd'atɔlɛli nga bende, badɔ̀ɛ ntondɔ a asii ajede. 12 Nto moti angal'a baKɛlɛtɛ, múbhilili niina nde mabɔ, ai ayɔngi ate: «BaKɛlɛtɛ ba nde bato a mbéa esa-li bhulibhu, ba nde bía banyama bajede, bàkusi na babhelea.» 13 Bɔtɔndɔlisi nde a nde domi. Ang'a indɔ, oekaleɛgɛ kpɛɛ nga bende, babɛ na boosobela niina, 14 kanga ɔkaneaga l'egani a mbéa nda baYuda, ago balebea-i maanɔ nda bato nde bakɔ́mi yɔnga la domi. 15 Éma-li bhulibhu a anja a iso a Mokonga ang'a bande ba na meema anja a iso a Mokonga. Ang'a bato bajede na bande nndaga banebei Mokonga, éma-li bhulibhu a masa ajede nga, maɛnɛkɔ abɔ na meema abɔ aujuani a iso a Mokonga. 16 Bayɔnga bate, bamúbha Mokonga, mpa go tambela l'abɔ n'aɔngiana bende, banngana Mokonga. Ibɔ, bai nde bato nde aanga baeya, nnda bansikisa nto, nnd'aanga batɔa na bakɔli nkási anja.