Moo a yɔnga
Ketabo nda Titɔ nde a nde moti angal'a ketabo ini nde Pɔlɔ ai aeandekea bato moti-moti sìa. Baloa l'inda atɔɔ isalɔ a nde 1 Timɔtɛɔ, 2 Timɔtɛɔ na Filɛmɔnɔ. Pɔlɔ ai aanndekei Titɔ iyɛ nganga, mpa n'akaba go bende baloa nde basɔmɛ yu mosá la bato batì. Beúbhi indɔ nde a ɔna la sinde Pɔlɔ atɔmii na ebhebhɔ nde a nee, inde aangisi abá Ntetei niina, éma nde Titɔ ai aiki n'aúbha. Pɔlɔ ai aandeki baloa nde nde a nsɔlɔ a elemɔ 63 kida la elemɔ 65 mbusa a bɔtɛana la Yesu Kilisitɔ.
Pɔlɔ ai n'aye ansosii Titɔ bende asɔndɔlisɛ kanisà bhuu nde ai asub'a kesanga nda Kɛlɛtɛ. Ai aandeki baloa nde nde nga, ansɔndɔlisɛ Titɔ kpɛɛ mbɛɛ a yɔnga la bɔsɔmbɔli a bàlangi-kanisà na golisa l'abɔ sinde ai akɔli nee asub'a baloa nd'aɛ nda Timɔtɛɔ. Baloa nd'aɛ nde atɔmii nde sinde atɔlɛli bàlangi-kanisà batambɛ nee a asii anja kpɛɛ mosá la bato na mosá la Mokonga. Kanisà na bàlangi-kanisà nde ba ndiende atɔlɛli balengisanɛ tambela ndɔ hɛlɛ a tabela la bàsɔndɔlisi nde ba ndiende.
Buanaga la baloa
1. Pɔlɔ ansɔndɔlisa Titɔ bende aɛsɔmbɔlɛ bàlangi-kanisà nde bansikisa Mokonga (1:1-16)
2. Ansɔndɔlisa go bende, aegolisɛ bato lenda nde aɔngiana bende bansikisi Mokonga (2:1-3:11)
3. Tungumisaga la baloa na nseseɔ (3:12-15).