4
Mpa, Timɔtɛɔ, neososia mosá la Mokonga na mosá la Kilisitɔ Yesu, mmbe alɛ aɛsɔ̀a bande baɔnɛa na bàku, na neososia a yɔnga la óbela la Kilisitɔ n'ɛbɔamɛ nd'aɛ: 2 Olabhɛ Yɔnga nda Mokonga na ekanda, nabana a nde a mbènɔ anjá aɔ a mbènɔ ajede olabhɛ. Oehanɛ, oekáleɛ, odhodeisɛ meema abɔ n'ogolisa na bubila. 3 Nɛyɔngi bo nde nga abhia lɛ esa nde bato bakɔ́ma lɛ ɔkanea la egolisi a lenda. Mpa baekabaga lɛ masa bagolisi nde baɛbɔngɛla na bande bayɔnga masa inde bakónda ɔka-li. 4 Badega lɛ etue l'abɔ nga baɔkanea-i domi, aba baetiila a egani holoholo. 5 Mpa owɛ, a mbènɔ bhulibhu obá-i nto a guliaga la éma. Obubilɛ enobɔ. Ɔkɔlɛ nkási nda balabhi-Mbinɔ Anja na ɔbhɛdɛ nkási ndaɔ hɛlɛ.6 Ang'ami, aye ne bhi-bhi gabha l'ami bía makana la bɔɛmbɔ, na mbènɔ a ga l'ami toa la asub'a lɛɛngɔ nde aye akidi. 7 Aye nemani emani anja, aye nekidi a sungia la mbangɔ namɔ, nndag'ai negee mbamba asub'a boosobela. 8 Toa la mbènɔ nde, Mokonga abhísi ami bɔɛmbɔ a domi inde Mokama Nsɔ̀i-yɔnga niina amopa lɛ a esa ndɔ. Mpa nndag'a masa eme nganga, mpa go na bato batɔɔ bande babondea na sei óbela l'aɛ.
Yɔnga nda bonganga
9 Okèngeɛ bhia dhonda l'ami dia, 10 nga Dɛma, adhuma akóndi lɛɛngɔ nda ndiende amodu na agee Tɛsalɔnika. Kɛlɛsɛkɛ agee Galatia, na Titɔ n'iyɛ agee Dalimatiaa. 11 A masa Luka iyɛ nganga yɛu atigi na eme. Om'bɛsɛ Malekɔ bobhiɛ n'iyɛ mbènɔ a bhia l'aɔ, nga atɔlɛli a tabela l'ami a nkási namɔb. 12 Nentei Tikikɔ naa Ɛfɛsɔ ioc. 13 A bhia l'aɔ, obhiɛ ami na kɔti namɔ nde ai nedu a endu a Kalapɔ naa Tɔlɔa. Obhiɛ ami go na ketabo namɔ nde ai nedu ndɔ, kpɛɛ mbɛɛ ketabo a ntɛgad ndɔ.
14 Ntuli Alɛsandulɔ amɔkɔlɛli nde bujede nde nnd'aanga bankɔlɛla nto. Mokama anèa a inde amɔkɔlɛlie. 15 Mpa na owɛ oelengelelɛ kpɛɛ ang'aɛ, nga akɔ́mi na ekanda egolisi asu.
16 A nkobà la ind'a imoti, mbénɔ a bɔɛyɔngɛlaf mosá la basɔ̀i-yɔnga a yɔnga namɔ, nnd'ai be naa nto moti nde abhii amogàmela. Mpa bɔbhu aba bamodoa. Mokonga agesa-i bujede ndɔ a ang'abɔ. 17 Nɛngɛbɛ ìbo, Mokama adhuma áma imoti n'eme na pa l'ami ekanda, nga nelabhɛ yɔnga nd'aɛ nga bende bato-li bɔbhu baɔkɛ. Aba neoloa toa la nyɔɔ a simbà. 18 Mokama amooloisa go mande a toa la yɔnga ajede-jede bhulibhu na amolamisa lɛ a ngisa l'ami asub'a Ɛbɔamɛ nd'aɛ na kobha. Mpa ebhebhɔ-li bhulibhu ansianelɛ a mɛyɔ na mɛyɔ! Abɛ ìbo.
Nseseɔ
19 Bonseseɛ Pilisila na Akila na bande ba a mba nda Ɔnɛsifɔlɔg. 20 Yɛ Ɛlasitɔ atigi Kɔlindɔ na Tɔlɔfimɔ adhuma nen'du naa Milɛtɔ nga adhuma ajegah. 21 Okèngeɛ bhia la mosá la mbènɔ a bijɔɔ.
Ebulɔ, Pudɛ, Linɔ, Kɔlɔdia na badhasu bɔbhu baosesei.
22 Mokama abɛ na owɛ.
Boangɔ nd'aɛ abɛ na benu.