Bujede nde aóbela lɛ a sungia la lɛɛngɔ
3
Mpa oúbhɛ hɛlɛ bende: esa la sungia, abá lɛ nde mbènɔ nde akáli kpɛɛ. 2 Bato alɛ baekónda ibɔ bamɛnɛ na kónda la ntondɔ kpɛɛ. Babá lɛ na ekumbekumbe, bato a boenga, bato a ɛɔti, bande nnda baesikisi babɔti abɔ, bande nnda basìma, na kɔ́ma la éma-li bhulibhu inde am'bɔngɛla Mokonga. 3 Babóla lɛ ekóndi ang'a batɔɔ, makanga gɛgia, bato a choelaga la bande batɔɔ, bato bakpɛ, basinja na banjiu a bonja, 4 batɔ́ngi-bato, bato a meema ajede, bato a boenga, bato a kónda la inde aɛbongɛli nyɛna la kónda la Mokonga. 5 Baedhemisaga bende bansikisi Mokonga, mpa go na bakɔ́ma ekanda l'aɛ. Otoɛ a mpiti a bato bía bandɔ! 6 Nɛyɔngi ndɔ nde nga batɔɔ angal'abɔ baengisa asub'a baendu na koda la bake nde bawɛdɛmani, bande ilɔlɔ aye mɛnɔ aejului na kɛnɛaga la éma-li bhulibhu. 7 Bake ndɔ bakaba boegolisaga esa-li bhulibhu, mpa nnd'alɛ bakua na baúbhi domi. 8 Sinde Yana bona Yambulɛa ai bakɔ́ma yɔnga nda Mósa, ìbo yɛu bato nde bakɔ́ma domi. A nde bato nde maɛnɛkɔ abɔ aujuani, na boosobela nd'abɔ aku nde bosa. 9 Mpa nnd'aanga alɛ baga dhɔlɔ, nga egesile abɔ aóbela lɛ mosá la bato bɔbhu sinde ind'a Yana bona Yambulɛ ai aóbeli nee.Maanɔ a sungia nda Pɔlɔ ang'a Timɔtɛɔ
10 Mpa owɛ, oi omobelei a yɔnga-li bhulibhu, ai ɔɔki egolisi ami, ob'obelea tambela l'ami, ob'oúbha maakɔ ami, boosobela l'ami, bubila l'ami, ekóndi ami na midila la meema ami. 11 Oi ɔɔni mambala mokpata na noba nde ai amokidii Andiokia, Ikɔnia, na Lisita. Mokpata nde abhìsa bɔɔ nde ai nɛnyɛni au, mpa Mokama ab'amolamisa a indɔ bhulibhub. 12 A nde domi, bɔbhu nde bakaba lenda l'asuba a sikisa la Mokonga áma imoti na Yesu Kilisitɔ, alɛ banoba. 13 Mpa bato bajede na bajilombi aga lɛ na baujuana go kpɛɛ. Baedhema lɛ bato batɔɔ, na boebungisa la ibɔ nganga. 14 Owɛ, odhungililɛ egolisi nde oi ɔɔki na lebea-li na meema imoti. Nga ooúbha hɛlɛ bande oi ogoli indɔ ang'abɔ†. 15 Toa la konii l'aɔ, oúbha Ketabo nda Mokonga inde atɔa n'aopi bɔɛngɛ. Bɔɛngɛ ndɔ ab'aotambisa kidisa l'aɔ a ngia la asub'a mɛyɔ nyɛnɛla la boosobela ang'a Kilisitɔ Yesu. 16 Maandekɔ-li bhulibhu Mokonga yɛu ai aehahamisi bato andeka-li. Na bhulibhu abɔngi a golisa la domi, a kálea na hana la bato na úbhisa l'abɔ asii la domi. 17 Nga nto nde ma Mokonga aebhísɛ hɛlɛ, na abɛ na ekanda la tɔisa la éma-li bhulibhu nde a anjá.