Soda manja nde ma Yesu Kilisitɔ
2
Mpa, owɛ nami Timɔtɛɔ, okandɛgɛ asub'a boangɔ nde be nee ang'a Kilisitɔ Yesu. 2 Na yɔnga nde ai ɔɔki na negolisa mosá la batɔndɔlisi bati, ootesisilɛ yu bato kilikili nga, n'ibɔ batɔisɛ golisa la bato batɔɔ.3 Onobɛ áma imoti n'eme bía soda manja nde ma Kilisitɔ Yesu. 4 Nto nde angi a nkási a kosoda n'akaba bende anjangisɛ omi nde maɛ, nnd'aanga aengisa a yɔnga nda bande nndaga bá basoda bá au. 5 A bo go ang'a manselu la ga la mbangɔ, nto nnd'aanga adɔ̀a egabhɔ la tɔisa nabana akɔ́mi sikisa la inde baomi a manselu-li basosii†. 6 Mmbe akɔla nkási nda Mokama aanga bankenganisa na nto nde adhɛma a tio a batoli. N'aye adhɛmi kpɛɛ, iyɛ yɛu atɔlɛli abɛ mma a mosá-mosá a léa la ɛmbɔ a nkási nd'aɛ. 7 Oakɛ hɛlɛ a inde neongodea nde nga, Mokama aopa mande maɛnɛkɔ la ɔka-li bhulibhu hɛlɛ.
8 Onkanisɛ Yesu Kilisitɔ, nto nde maa ɛbɔtɛana nda mɔamɛ Daudi, mmbe ai ajujui a kukua sinde Mbinɔ Anja nde nelabha nde ayɔngi nee. 9 A yɔnga la Mbinɔ Anja ndɔ yɛu nde nenoba nde na kida la nyangaga l'ami na nkɔndɔ́ bía mojiji. Nangɛ abɛ bo, nnd'aanga banyangaga yɔnga nda Mokonga. 10 Indɔ yɛu aangisi nebubila a yɔnga la bato nde Mokonga aɛsɔmbɔli nga bende, n'ibɔ Kilisitɔ Yesu aelamisɛ, na babɛ na boumu nda mɛyɔ. 11 Inde yɛu a nde yɔnga niina:
«Nabana beku áma imoti na Kilisitɔ, belenda lɛ go áma imoti n'iyɛ.
12 Nabana bemidila meema asu a éma-li bhulibhu, besenga lɛ go áma imoti n'iyɛ.
N'aye benngani, kesi n'iyɛ asongána lɛ.
13 Nangɛ nabana boosobela lasu n'atalokani, iyɛ nnd'aanga adɔlɛlana boosobela l'aɛ
nga, nnd'aanga atɔa n'aengani iyɛ nganga†.»
Bá la nto a nkási nde am'bɔngɛli Mokonga
14 Ookanisisɛ bato yɔnga ndɔ. Oehanɛ kpɛɛ mosá la Mokonga bende, basanea-i yɔnga-yɔnga nga, mambala esani ndɔ nnd'a na ɛmbɔ imoti, aebungisa gɔɛ nde bande baɔkanea. 15 Oekakamisɛ owɛ nganga nga ooangianɛ bende o nde mbhɛdi-nkási nde atɔlɛli mosá la Mokonga, nkɔbɛ nde nnd'akua soni a nkási nd'aɛ, mmbe gɔɛ agolisa kilikili yɔnga la domi. 16 Oteɛ tɛtɛmbaga l'ebhobho inde angoisani na egolisi a domi nga, bato nde babelea indɔ, bagɛlɛanaga mande dhɔlɔ a Mokonga. 17 Na egolisi nd'abɔ aiki nde bía ndase nde atɛni, inde ahòisa ngobho a nto bhulibhu. Angal'abɔ a nde Imɛnɛɔ† na Filɛtɔ. 18 Ibɔ, bakpangbi egolisi a domi. Bate, yɔnga la jujua la bàku asub'a kukua aye mɛnɔ akidi. Ang'a indɔ, baujisa boosobela la bato bimoti. 19 Mpa, ndui nde Mokonga ai abhangi asiki kpɛɛ. Yɔnga nde baandeki antate a nde: «Mokama aeúbha bato nde baɛ†.» A go: «Mmbe agii bende, a nde nto nde ma Mokama, adoɛ bujede.»
20 Asub'endu mati, nnd'a we masa lua nde bakɔkɔtii na nɔlɔ na kioma, mpa go a we na ind'a mee na ind'a too. Ind'a nɔlɔ na ngɔa, bakɔlɛla yu nde a dinyɛ, ind'a mee na too, bakɔlɛla yu a esa-li bhulibhu. 21 Mpa nabana nto aesosi iyɛ nganga a tosa la bujede ndɔ a meema aɛ, abá nde bía lua nde bakɔlɛla a dinyɛ, inde amɛnɛ a endu abhísi mbamba, n'asɔlɔlii yu a ɛkɔli anja bhuu.
22 Timɔtɛɔ, oteɛ kɛnɛaga la koboluana, okabɛ gɔɛ nde domi, boosobela, ekóndi, bɔkɔlɔ áma imoti na bande bammɛma Mokama na meema anja. 23 Ɔkɔ́mɛ bóaka-bóaka l'ebhobho inde nnd'a na ɛmbɔ nga, oúbha bende indɔ aki abhìsa esani. 24 Nnd'atɔlɛli nkɔbɛ† nde ma Mokama aikilɛ esani. Atɔlɛli gɔɛ abɛ nde makɔlɔ ang'a bato bɔbhu, mmbe atɔa golisa na mmbe a na meema molito. 25 Na meema a bɔkɔlɔ yɛu atɔlɛli aehanɛ bamasani l'aɛ. Nga kosà Mokonga aanga aetabela a tia la meema abɔ ajede na a úbha la domi, 26 na maakɔ abɔ ab'aika go hɛlɛ na boesodoa l'a bɔɔkì nda Nketi, mmbe ai aekodi nga bende, bakɔlɛ inde iyɛ akóndi.