Baloa l'inda ibale nda Pɔlɔ ang'a
Timɔtɛɔ
Nseseɔ
1
1-2 Ang'aɔ Timɔtɛɔ†, nami nkóndaga.Eme Pɔlɔ, ntetei nde ma Kilisitɔ Yesu, a ekóndi nda Mokonga, a sinde ai alàki asu na lenda la mɛyɔ, ang'a Kilisitɔ Yesu, yɛu neoandekei baloa nde. Nte boangɔ, ngomi na bɔkɔlɔ nde atoa nɔngɔ a Ebha Mokonga na Kilisitɔ Yesu Mokama nde masu, abɛ na owɛ.
Pɔlɔ ansìmi Mokonga a yɔnga la Timɔtɛɔ
3 Nɛmmɛma Mokonga a yɔnga l'aɔ, a mbènɔ bhulibhu, kiia n'etonge. Na nensìma, iyɛ nde nɛnkɔlɛla na meema anja, sinde batataa ai bakɔlaga nee. 4 Mbènɔ nde nekanisa nee bibiso aɔ†, aba nekua sei a ɔna l'aɔ kpɛɛ nga bende netumɛ na bujɛmɛ. 5 Nekanisa go boosobela niina ndaɔ, bía inde tata aɔ Aloisi n'amáɔ Onikɛ, bai nee. Na eme neúbha domi bende, indɔ yɛu na owɛ o nee. 6 Ang'a indɔ yɛu, neokanisisa bende: ogongeɛ edado nde Mokonga ai abhísi ang'aɔ, a mbènɔ nde ai nebhísi nee njaga antata aɔ. 7 Nga, Mokonga nndag'ai asopi nde meema a bɔɔ, iisi. Mpa ai asopi gɔɛ nde ind'ekanda, ind'ekóndi na inde nnd'aguliaga éma.
8 Ang'a indɔ, okua-i soni a tɔndɔlisa la yɔnga nda Mokama nde masu iisi, nangɛ eme omokulia-i soni, eme nde bamonyangi a yɔnga l'aɛb. Mpa onobɛ gɔɛ nde áma imoti n'eme a yɔnga la Mbinɔ Anja, sinde Mokonga yɛu aopa nee ekanda. 9 Iyɛ yɛu ai asolamisi na ai asokogi nga bende bebɛ bato nde baɛ. Nndag'ai akɔli bo nde a yɔnga la ɛkɔli anja ndasu. Ai akɔli indɔ nde sinde ai akóndi nee iyɛ nganga na a yɔnga la boangɔ nd'aɛ. A nde egabhɔ a bosa nde ai asopi na boangɔ nde be nee ang'a Kilisitɔ Yesu mosá la tɛlɛkisa la lɛɛngɔ. 10 Mpa a mbènɔ nde, Mokonga asoangelisi boangɔ ndɔ hɛlɛ a óbela la Namisi nde masu Kilisitɔ Yesu. Iyɛ yɛu ai atɛmbi ekanda la kukua, ab'asɔɔngia hɛlɛ lenda la mɛyɔ tesela la Mbinɔ Anja.
11 A yɔnga la Mbinɔ Anja nd'aɛ ndɔ† yɛu Mokonga amobhísi bende nebɛ ntɔmii-mbinɔ bía ntetei na ngolisi. 12 Na ang'a indɔ yɛu nde nenoba nde. Mpa nndaga nekulia indɔ soni nga, nemúbha mmbe neesobeli. Neúbha domi bende, iyɛ a n'ekanda la langa la inde ai amobhísisic kida la esa nde aja mande nee.
13 Yɔnga nde ai ɔɔki na negolisa ndɔ abɛ mbunde ang'aɔ a egolisi nde owɛ ogolisa. Okpatuɛ yɔnga la domi ndɔ na odhungililɛ yu asub'a boosobela na asub'ekondi nde be nee ang'a Kilisitɔ Yesu. 14 Ai baopi botondi anja. Olangɛ yu a botabeli a Meema a Bobhu mmbe aiki asub'asu.
15 Oúbha bende, bato bɔbhu nde ba ɛkɔngɔ nda Ajia bamobubatei. Angal'abɔ a nde Figɛlɔ na Ɛlɛmɔgɛnɛ. 16 Belebele, Mokama akuliɛ mba nda Ɔnɛsifɔlɔ ngomi nga, ai adhodeisa meema ami nkobà ati. Nnd'ai aku soni ami na ne asub'a ngɔmɔ. 17 Mpa gɔɛ, mbènɔ nde akidi nee Lɔma, ai amokabigi na mouɔ kpɛɛ, kida la sinde ai abhii amɔɔna nee. 18 Belebele, Mokama ankuliɛ ngomi kpɛɛ a esa nde abhia lɛ nde. Oúbha go hɛlɛ kpɛɛ éma bhulibhu nde ai amɔkɔlɛli naa Ɛfɛsɔ.