Baloa nda mosá-mosá nda Yɔani
Yɔani
Moo a yɔnga
Ntetei Yɔani yɛu ai aandeki baloa nda 1 Yɔani nde, a nsɔlɔ a elemɔ 85 na 90 mbusa a bɔtɛana la Yesu Kilisitɔ. Yɔani nndaga aeúbhisisi iyɛ nganga bía mmbe ai aandeki ketabo-li, mpa hale l'inda imoti amɔngiani nde bía ntɔndɔlisi mmbe ai aɔni na iso aɛ lenda na jujua la Yesu a kukua (1 Yɔan 1.1-3). Na lenga la sinde baandeki ketabo nde, akèngi masa ind'a Mbinɔ Anja nda Yɔani. Indɔ yɛu aanga aangisa na bɛyɔngi bende iyɛ yɛu go aandeki 1 Yɔani, 2 Yɔani, na 3 Yɔani n'aha aika naa Ɛfɛsɔ.
Yɔani ai aeandekei bakilisitɔ baloa nde nde a mbènɔ a enobɔ nde «Bagɔnɔsitiki» ai babhìsi asub'a kanisà. Bagɔnɔsitiki ai bálebei bende Yesu a nde Mokonga, mpa ai bakɔ́ma gɔɛ nde bende ai go nde nto domi-domi mbènɔ nde ai n'aha alenda na lɛɛngɔ oni. Ang'a indɔ yɛu aangisi Yɔani ayɔnga bende, a nde ntɔndɔlisi a lenda la Yesu na iso na bende ai ambhɛdii Yesu na njaga (1 Yɔan 1.1-3). Inde ai aangisi Yɔani aandeka baloa nde ai nde bende, bujɛmɛ nd'aɛ iyɛ nganga abɛ atì (1 Yɔan 1.4), na hana la bàlebei bende bakɔla-i ilɔlɔ (1 Yɔan 2.1), langa la bàlebei na egolisi a mbéa (1 Yɔan 2.26), na úbhisa l'abɔ bende balami domi-domi (1 Yɔan 5.13).
Buanaga la baloa
Baloa nde abuanigi a hale motoba:
1 1. Úbhisa la baloa na úbhisa la inde ai aangisi iyɛ Yɔani n'aandeki yu (1.1-4)
1 2. Angelisa la bende Mokonga a nde bobhu na bende atɔlɛli belendɛ bía Yesu (1.5—3.10)
Aehana bato bende atɔlɛli bekóndanɛ nkunguan'asu (1 Yɔan 3.11—5.12)
Tungumisaga la baloa (1 Yɔan 5.13-21)