Baloa nda mosá-mosá nda Yɔani
Yɔani
Yɔnga nde alendisa
1
Bɛnɔtɔmila Yɔnga nde agabha lenda, mmbe ai be, toa la kɛngɛtisa†. Ai bɛmɔki, ai bɛmɔni na iso asu, ai benengi na bhɛdɛa l'aɛ na njaga asu. 2 Lenda nde ai aɔnɛani, na besu aba bɛɔna yu. Be nde bàtɔndɔlisi-li, ang'a indɔ yɛu bɛnɔtɔmila mbinɔ a lenda la mɛyɔ nde ai a mpiti a Ebha na ai aɔnɛani ang'asu†. 3 Inde ai bɛɔni na ɔka-li, yɛu nde bɛnɔtɔmila na benu nde nga bende, na benu bɔlɔnganɛ na besu. Malɔnga nde be nee a nde imoti na Ebha, na Naɛ Yesu Kilisitɔ. 4 Benoandekei yɔnga nde nde nga bende, bujɛmɛ nd'asu akidɛ a nsenge.Betambɛ a bobhu nda Mokonga
5 Mbinɔ nde ai bɛɔki toa la ang'a Yesu Kilisitɔ, aande bɛnɔtɔmila nde: Mokonga a nde bobhu, na dhoda nnd'a ang'aɛ, iisi. 6 Nabana bɛyɔngi bende: «Bɛlɔngani n'iyɛ», n'aha betamba go a dhoda, kesi bɛyɔngi nde mbéa na nnda belenda a domi. 7 Mpa n'aye betamba asub'a bobhu sinde Mokonga iyɛ nganga a nde bobhu ndɔ, be a malɔnga nkunguan'asu. Na nsangi a Naɛ Yesu, ab'alɔlia ilɔlɔ nd'asu bhuu. 8 N'aye bɛyɔngi bende, nnda be na ilɔlɔ, kesi beedhemaga nde besu nganga, na domi nnd'a asub'asu. 9 Mpa nabana beesengi ilɔlɔ nd'asu, Mokonga Nto a domi mmbe aóbelisa mɔkɔ̀ nd'aɛ, agɛgia mande ilɔlɔ nd'asu na tosa la bujede bhulibhu nde a ang'asu. 10 Nabana bɛyɔngi bete: «Nnda bɛkɔli ilɔlɔ» kesi bɛyɔngi nde bende, Mokonga a nde nto a mbéa na yɔnga nd'aɛ nnd'a asub'asu.