Kilisitɔ a nde nyɔngɛli nde masu
2
Ban'ami, nenoandekei yɔnga nde nde nga bende, bɔkɔla-i mɛnɔ ilɔlɔ. Mpa, nabana yɛli akɔli ilɔlɔ, be na nyɔngɛli mosá la Ebha: Yesu Kilisitɔ, Nto a domi. 2 Iyɛ, ai aegabhi bía bɔɛmbɔ nga, Mokonga aliliɛ ilɔlɔ† nd'asu. Na nndaga masa ilɔlɔ nd'asu besu nganga, mpa go na ind'a ngimana a lɛɛngɔ-li.3 Nabana besikisi maanɔ nda Mokonga, kesi mpa aye bemúbhi domi-domi. 4 Mmbe ayɔngi bende: «Nemúbha», na nndaga asikisa maanɔ nd'aɛ, a nde nto a mbéa, na domi nndag'a asub'aɛ. 5 Mpa mmbe asikisi yɔnga nda Mokonga, kesi ekóndi aɛ ang'a Mokonga akakamani. Ang'a indɔ yɛu aangisi beúbha bende, be asub'aɛ. 6 Mmbe agii bende, aiki asub'a Mokonga, atɔlɛli tambela l'aɛ akènganɛ na ind'a Yesu.
Maanɔ nda mbènɔ-mbènɔ
7 Badhami bakóndaga, nnda nenoandekei maanɔ nda mbènɔ-mbènɔ, mpa a gɔɛ nde ind'a kala, inde ai bɔdɔ̀i toa l'a kɛngɛtisa†. Na maanɔ nda kala ndɔ, a nde yɔnga nde ai n'aye bɔɔkí. 8 Mpa maanɔ nde nenoandekei nde a nde ind'a mbènɔ-mbènɔ. Kilisitɔ ai aɔngiani domi-li asub'a lenda l'aɛ na a ind'anu nga, dhoda asi na bobhu niina aye akɛngɛtisi njenja. 9 Mmbe ayɔngi bende aiki a bobhu, mpa na an'ye muna-amáɛ, kesi aha asub'a dhoda. 10 Mmbe ankóndi muna-amáɛ, mmbɔ yɛu aiki asub'a bobhu. Nnda ang'aɛ éma nde aanga anngisa asub'a ilɔlɔ. 11 Na mmbe an'ye muna-amáɛ, a asub'a dhoda. Atamba asubi makanga úbha la naande aga nee nga, dhoda anjisi timetime.
Bokónda-i lɛɛngɔ
12 Ban'ami, nenoandekei nde nga, Mokonga alilii ilɔlɔ nd'anu a ina a Yesu Kilisitɔ. 13 Baebha, nenoandekei nde nga, bomúbha mmbe a be toa l'a kɛngɛtisa. Baluana, nenoandekei nde nga, aye bɔntɛmbi mmbe Majede ndɔ. 14 Ban'ami, nenoandekei nde nga bende, aye bomúbhi Ebha. Baebha, nenoandekei nde nga bende, bomúbhi mmbe a be toa l'a kɛngɛtisa. Baluana, nenoandekei nde nga bende, bo na ekanda, na yɔnga nda Mokonga a asub'anu na bɔntɛmbi mmbe Majede ndɔ.
15 Mpa, bokónda-i lɛɛngɔ nangɛ éma nde a asubi. Nabana nto akóndi lɛɛngɔ, kesi ekóndi a Ebha nndaga ang'aɛ. 16 Nga, éma bhulibhu nde a na lɛɛngɔ, abɛ sei-sei ajede nda ngobho, bá la na iso-iso, boebhebha a yɔnga la botondi, indɔ bhulibhu nnd'atoa nɔngɔ a Ebha, mpa atoa gɔɛ nde na lɛɛngɔ. 17 Lɛɛngɔ anyɛna na sei-sei a éma nde a asubi bhulibhu. Mpa mmbe akɔla inde Mokonga akóndi, alenda mande mɛyɔ.
Masani nde ma Kilisitɔ
18 Ban'ami, mbènɔ a sungia aye akidi. Bɔɔkí gela bende, Masani nde ma Kilisitɔ abhia. Mpa, bamasani nde ba Kilisitɔ batì aye bakidi na beúbha bende mbènɔ a sungia a yunde†. 19 Bamasani ndɔ, ai batoi nde nɔngɔ asu, mpa nndaga bai adha besu. A nde bende, nabana bai adha besu, mmbɛ ai baiki áma imoti na besu. Mpa ai batoi nde nga bende, aúbhiananɛ hɛlɛ bende, nndaga bai adha besu.
20 Mpa benu, Kilisitɔ anopi Meema a Bobhu nga bende, benu bɔbhu boúbhɛ domi. 21 Mpa nabana nenoandekei nndaga nde nga, nnda boúbha domi, a gɔɛ nde nga, boúbha yu. Na boúbha bende, mbéa nnd'atoa a domi.
22 Màni yɛu mpa a nde nto a mbéa? A nde mmbe ayɔngi bende, Yesu nndag'a Kilisitɔ. Mmbɔ yɛu a nde masani nde ma Kilisitɔ. Ankɔ́mi Ebha bona Naɛ. 23 A nde bende, kela nto nde ankɔ́mi Muna-Mokonga, ankɔ́mi na Abhaɛ. Mmbe anebei Muna-Mokonga anebei na Abhaɛ†.
24 Na benu mpa, yɔnga nde ai bɔɔkí toa l'a kɛngɛtisa aikɛ asub'anu. N'aye inde ai bɔɔkí toa l'a kɛngɛtisa aiki asub'anu, kesi na benu boika mande asub'a Muna-Mokonga na asub'a Abhaɛ. 25 Mɔkɔ̀ nde Kilisitɔ ai asolàki, a nde lenda la mɛyɔ.
26 Nenoandekei éma nde nde a yɔnga la bande bakaba bungisaga l'anu. 27 Na benu mpa, Meema nde Kilisitɔ anopi ndɔ aiki asub'anu. Na nndaga bo na sei a ngolisi matɔɔ nga, Meema a Bobhu anogolisa éma-li bhulibhu. Na egolisi nd'aɛ a nde nda domi, kanga inda mbéa. Ang'a indɔ, boikɛi asub'a Kilisitɔ sinde Meema a Bobhu ai anogolisi nee.