Be nde bana-Mokonga
3
Bolengɛ to sinde Ebha asokóndi nee nga, basokogɛ bate, be nde ban'aɛ! Na indɔ a nde domi†. Ang'a indɔ, bato nde ba na lɛɛngɔ nnda basoúbha nga, nnda bamúbha Mokonga. 2 Badhami bakóndaga, mbènɔ nde be nde bana-Mokonga. Mpa asɔɔngii-mbɛ sinde bebá mande nee domi-domi. Inde beúbha a nde bende, mbènɔ nde Kilisitɔ aóbela mande nee, benkènga mande nga, bɛmɔna mande sinde aiki nee. 3 Kela nto nde aɛkɛtɛli Kilisitɔ, aɛlɔlia iyɛ nganga sinde Kilisitɔ a nee.4 Mmbe akɔla ilɔlɔ, angoisa nde maanɔ nda Mokonga. Nga, kɔla la ilɔlɔ a nde ngoisa la maanɔ. 5 Boúbha bende, Kilisitɔ ai abhii na lɛɛngɔ nde bhia tosa la ilɔlɔ nd'asu, na nnd'a na ilɔlɔ asub'aɛ. 6 Ang'a indɔ, kela nto nde aiki asub'aɛ nnd'aanga aye akɔla ilɔlɔ. Mmbe akɔla ilɔlɔ kesi amɔni-mbɛ na amúbhi-mbɛ.
7 Ban'ami, nto anodhema-i mɛnɔ. Nto nde akɔla domi, a nde nto a domi sinde Yesu Kilisitɔ iyɛ nganga a nde nto a domi ndɔ. 8 Mmbe akɔla ilɔlɔ a nde nto nde ma Nketi. Nga, toa l'a kɛngɛtisa la lɛɛngɔ, Nketi ai akɔlaga ilɔlɔ. Ang'a indɔ, Muna-Mokonga aóbeli bhia gbɔlaga la nkási nda Nketi.
9 Kela nto nde abɔtɛani ang'a Mokonga, nnd'aanga aye akɔla ilɔlɔ nga, yɔnga nda Mokonga a asub'aɛ bía mbo. Na nnd'aanga akɔla go ilɔlɔ nga bende, abɔtɛani ang'a Mokonga. 10 Ibende yɛu bana-Mokonga na bana-Nketi baúbhianana: Kela nto nde nnd'atamba asub'a domi aɔ go nnd'a n'ekóndi ang'a dh'aɛ, mmbɔ nnd'abɔtɛani ang'a Mokonga.
Atɔlɛli bekóndanɛ
11 Na yɔnga nde ai bɔɔkí toa l'a kɛngɛtisa a nde bende: Bekóndanɛi nkunguan'asu†. 12 Bebá-i bía Kaini, nto nde ma mmbe Majede ndɔ, ab'ai ammóa muna-amáɛ. Ai ammói nde nga ee? Nga bende, ɛkɔli nda Kaini ai ajede, na ind'a muna-amáɛ n'a nde ind'a kodomi†.
13 Badhami bàlebei, anobangisa-i n'aye bato nde ba na lɛɛngɔ banoya†. 14 Beúbha bende, bɛnyɛni a kukua na ngia la asub'a lenda la mɛyɔ nga, beekóndi badh'asu. Mpa, mmbe nnd'a n'ekóndi aiki nde asub'a kukua. 15 Kela nto nde an'ye muna-amáɛ, a nde mosinja. Boúbha go bende, kela mosinja nnd'a na lenda la mɛyɔ asub'aɛ. 16 Ibende yɛu beúbhilila ekóndi: Yesu Kilisitɔ ai agabhi lenda l'aɛ a yɔnga l'asu. Atɔlɛli na besu begabhɛ lenda l'asu a yɔnga la badh'asu. 17 Nabana nto a na lua na lɛɛngɔ oni, ab'amɔna dh'aɛ n'a na bungu, mpa ab'adega meema aɛ kanga bende ankulii ngomi, iboni yɛu aanga ayɔnga ate, ankóndi Mokonga? 18 Ban'ami, ekóndi asu abá-i masa a nyɔɔ na a yɔngaga bosa, abɛ gɔɛ nde ind'a domi, na inda ɛkɔli nd'asu.
Ja la na bɔɛkɛtɛla mosá la Mokonga
19 Ìbo ndɔ, beúbha mande bende, be nde bato a domi. Mpa, meema asu akɔlɔmana mande mosá la Mokonga. 20 Nga, nangɛ meema asu n'asochoela, iyɛ a mati nyɛna la meema asu na aúbha éma-li bhulibhu. 21 Badhami bakóndaga, nabana meema asu nnd'asochoela éma a nde nga, be na bɔɛkɛtɛla mosá la Mokonga. 22 Iyɛ asopa éma bhulibhu nde bɛmmɛma nga, besikisa maanɔ nd'aɛ, na kɔla la éma nde am'bɔngɛli. 23 Na maanɔ nd'aɛ yɛu yunde: Belebeɛ ina a Naɛ Yesu Kilisitɔ, na kóndana nkunguan'asu sinde ai asososii† nee ndɔ. 24 Mmbe asikisa maanɔ nda Mokonga, aiki asub'a Mokonga na Mokonga asub'aɛ. Ai asopi Meema aɛ, na indɔ yɛu aangisi beúbha bende Mokonga aiki asub'asu.