Meema a Mokonga na meema a mbéa
4
Badhami bakóndaga, bolebea-i kela meema, mpa bokengeɛ gɔɛ nde mbénɔ atoi nɔngɔ a Mokonga nga, baúbhilili a mbéa batì baóbeli asub'a lɛɛngɔ. 2 Ibende yɛu aanga boúbhilila bende nto a na Meema a Mokonga. Kela nto nde alebei bende Yesu Kilisitɔ abɔtɛani na ngobho a koto domi-domi, a na Meema a Mokonga. 3 Mpa, mmbe nnd'anebei Yesu, nnd'a na Meema a Mokonga. A gɔɛ nde na meema a masani nde ma Kilisitɔ, mmbe ai bɔmɔki bende abhia, n'iyɛ aye kala na lɛɛngɔ. 4 Mpa benu Ban'ami, benu bo nde bana-Mokonga, na bɔɛtɛmbi baúbhilili a mbéa nga, mmbe a asub'anu a mati nyɛna la mmbe a asub'a lɛɛngɔ. 5 Baúbhilili a mbéa ndɔ, bande bato nde ba na lɛɛngɔ. Ang'a indɔ yɛu aangisi na bayɔnga bía bato nde ba na lɛɛngɔ. Na bato nde ba na lɛɛngɔ baɛɔkanea. 6 Besu be nde bato nde ba Mokonga. Mmbe amúbha Mokonga, asɔɔka. Mmbe nndaga nto nde ma Mokonga nnd'asɔɔka. Ìbo yɛu aanga bemúbha mmbe a na Meema a domi na mmbe a na meema a mbéa.Mokonga a nde tine a ekóndi
7 Badhami bakóndaga, bekóndanɛi nga, Mokonga a nde tin'a ekóndi. Mmbe a na ekóndi mmbɔ yɛu abɔtɛani na Mokonga na amúbha Mokonga. 8 Mmbe nndag'a na ekóndi nnd'amúbha Mokonga nga, Mokonga a nde ekóndi. 9 Ibende yɛu Mokonga ai asoangelisi ekóndi aɛ ang'asu: ai antei ngɔmu nde maɛ na lɛɛngɔ nga bende, bebɛ na lenda la mɛyɔ nyɛnɛla l'aɛ†. 10 Inde yɛu a nde ekóndi: Besu yɛu nndag'ai benkóndi Mokonga, iyɛ yɛu gɔɛ ai asokóndi, ab'antea Naɛ bhia boegabha bía bɔɛmbɔ a yɔnga la gɛgia la ilɔlɔ nd'asu.
11 Badhami bakóndaga, sinde Mokonga ai asokóndi nee bo ndɔ, abɔngi na besu bekóndanɛi bo. 12 Nnd'a we mmbe aye mɛnɔ amɔni Mokonga†. Mpa n'aye bekóndani, Mokonga aiki asub'asu, na ekóndi aɛ akakamani asub'asu. 13 Beúbha bende beiki asub'a Mokonga, n'iyɛ aiki asub'asu nga, asopi Meema aɛ. 14 Na besu bɛɔni na tɔndɔlisa la bende Ebha antei Naɛ nga, abɛ Namisi nde ma na lɛɛngɔ†. 15 N'aye nto alebei bende Yesu a nde Mùna-Mokonga, kesi Mokonga aiki asub'aɛ, n'iyɛ aiki asub'a Mokonga. 16 Na besu, beúbha na belebei bende Mokonga asokóndi.
Mokonga a nde ekóndi. Kela mmbe aiki asub'a ekóndi, aiki asub'a Mokonga na Mokonga aiki asub'aɛ. 17 N'aye ekóndi nda Mokonga akakamani asub'asu, nnd'aanga bebá na bɔɔ a esa nde Mokonga asɔ̀a mande nee lɛɛngɔ. Nnd'aanga bebá na bɔɔ nga lenda l'asu asub'a lɛɛngɔ ani nde akèngi lenda la Yesu. 18 Mmbe a n'ekóndi nndag'a na bɔɔ. Ekóndi niina atosa bɔɔ bhulibhu nga, tea la mokpata yɛu aangisi bato babɛ na bɔɔ. Mmbe a na bɔɔ, kesi akakamani-mbɛ asub'a ekóndi.
19 Ang'asu, besu be na ekóndi nga, Mokonga ai asokóndi mamosá-mosá. 20 N'aye nto ayɔnga ate: «Nenkóndi Mokonga», mpa na an'ye dhaɛ, mmbɔ a nde nto a mbéa. Nga, nabana nto nnd'ankóndi dhaɛ mmbe amɔna, nnd'aanga atɔa n'ankóndi Mokonga mmbe nnd'amɔna.
21 Maanɔ nde Yesu ai asopi yɛu nde: Mmbe ankóndi Mokonga atɔlɛli ankóndɛ go na dhaɛ†.