Boosobela ang'a Mùna-Mokonga abhìsa ekanda la tɛmba la lɛɛngɔ
5
Kela nto nde alebei bende Yesu a nde Kilisitɔ, mmbɔ abɔtɛani ang'a Mokonga, na mmbe ankóndi Ebha aekóndi na bana-ebha ndɔ. 2 Ibende yɛu beúbha bende beekóndi bana-Mokonga, a nde n'aye benkóndi Mokonga na sikisa la maanɔ nd'aɛ. 3 A nde bende, kónda la Mokonga a nde sikisa la maanɔ nd'aɛ. Na maanɔ nd'aɛ nndaga atiadi, 4 nga, kela mmbe abɔtɛani ang'a Mokonga atɛmbi lɛɛngɔ. Na boosobela l'asu yɛu asɔtɔisisa tɛmba la lɛɛngɔ. 5 Màni yɛu aanga atɛmba lɛɛngɔ? A nde mmbe alebei bende Yesu a nde Mùna-Mokonga.Bɔtɔndɔlisi a yɔnga la Yesu Kilisitɔ
6 Yesu Kilisitɔ a nde mmbe abhii na íbo na nsangi. Iyɛ, nndaga abhii masa a íbo, mpa gɔɛ a íbo na a nsangi. Meema a Bobhu atɔndɔlisi bende indɔ a nde domi nga, n'iyɛ a nde domi. 7 Be na batɔndɔlisi† basalɔ: 8 Meema, íbo na nsangi. Na basalɔ l'abɔ balebeani. 9 N'aye belebea bɔtɔndɔlisi a bato, mpa bɔtɔndɔlisi nda Mokonga atiadi kpɛɛ, n'a nde inde atɔndɔlisi a yɔnga la Naɛ. 10 Kela nto nde anebei Muna-Mokonga a na bɔtɔndɔlisi ndɔ asub'a meema aɛ. Mmbe nnd'anebei Mokonga, kesi agii nde bende Mokonga a nde nto a mbéa. Nga, nnd'alebei inde Mokonga atɔndɔlisi ang'a naɛ. 11 Bɔtɔndɔlisi ndɔ ayunde: Mokonga asopi lenda la mɛyɔ, na lenda ndɔ, a nde asub'a naɛ. 12 Mmbe a na Mùna-Mokonga a na lenda la mɛyɔ, na mmbe nnd'a na Mùna-Mokonga nnd'a na lenda la mɛyɔ†.
Bɔɛkɛtɛla la Yesu Kilisitɔ
13 Nenoandekei yɔnga nde, benu nde bonebei Muna-Mokonga nga, boúbhɛ bende bo na lenda la mɛyɔ.
14 Mpa inde yɛu a nde bɔɛkɛtɛla nde be nee mosá la Mokonga: n'aye bɛmmɛmi éma nde iyɛ akóndi, asɔɔka. 15 Na sinde beúbha nee bende asɔɔka n'aye bɛmmɛmi éma, beúbha domi bende asopa inde bɛmmɛmi ndɔ.
16 N'aye nto amɔni dhaɛ n'akɔla ilɔlɔ nde nnd'aanga abhìsa kukua, atɔlɛli amɛmɛ a yɔnga l'aɛ, na Mokonga ammòa nto ndɔ lenda. Yɔnga nde aelengi nde bande bakɔla ilɔlɔ nde nnd'abhìsa kukua. Mpa awe ilɔlɔ nde abhìsa kukua, nndaga nɛyɔngi bende amɛmɛ a yɔnga la indɔ. 17 Mbènɔ bhulibhu nde nto akɔla éma ajede, kesi akɔli ilɔlɔ. Mpa nndaga bende ilɔlɔ-li bhulibhu yɛu abhìsa kukua.
18 Beúbha bende mmbe abɔtɛani ang'a Mokonga, nnd'aanga aye akɔla ilɔlɔ nga, Mùna-Mokonga ananga. Mmbe Majede nnd'aanga ankɔla na-éma.
19 Beúbha bende, be nde bana-Mokonga na bende lɛɛngɔ-li bhulibhu a nde asub'a bokama nda mmbe Majede.
20 Ago beúbha bende Mùna-Mokonga aye abhii na lɛɛngɔ oni, asopi maɛnɛkɔ a úbha la Mokonga nde maa domi. Bɛlɔngani na Mokonga nde maa domi nyɛnɛla la ang'a naɛ Yesu Kilisitɔ. Iyɛ yɛu a nde Mokonga domi, na lenda la mɛyɔ.
21 Ban'ami bakóndaga, boikɛ dhɔlɔ a elimelime a baesòmba.