Asii anja la lenda la bakilisitɔ
3
Mpa, ookanisisɛ bato bende, baedhidhisɛ kusi a bakama na baomi†, baesikisɛ na lebea la kɔla la ɛkɔli bhulibhu nde a anja. 2 Oengodeɛ bende, bankumbisa-i mɛnɔ nto yɔnga ajede, babɛ gɔɛ nde bakɔlɔ na bato a bonja na bande baɛkɔlɔmisa mosá la bato-li bɔbhu. 3 Nga mosá, na besu nnd'ai beúbha éma, na nnda bensikisa Mokonga, bei nde bam'bungɔgɔ, bei nde bakɔbɛ la sei-sei a éma ajede na bujede ntuantua nda na lɛɛngɔ. Ai belendi a bujede na boso. Bei nde bato nde aanga baeya na besu beeyana a nkunguan'asu. 4 Mpa mbènɔ nde Mokonga Namisi nde masu, ai aɔngɛani bonja nd'aɛ na ekóndi aɛ ang'a bato, 5 ab'asolamisa. Nndag'ai akɔli ìbo nde a yɔnga la ɛkɔli nd'asu anja, mpa a gɔɛ nde a kulia l'asu ngomi. Ai asosi bujede nd'asu, a pa l'asu lenda nda mbènɔ-mbènɔ nyɛnɛla l'a Meema Mbhumani. A nde bende bɔtɛana la nkobà ibale†. 6 Mokonga ai asoduii Meema Mbhumani a botì, a nyɛnɛla la ang'a Yesu Kilisitɔ, Namisi nde masu. 7 Mokonga akɔli ìbo a boangɔ nd'aɛ, nga bende asolebeɛ bía bato a kodomi mosá l'aɛ, a dɔ̀a la lenda l'a mɛyɔ nde bɛɛkɛtɛli.8 Yɔnga nde a nde domi. Nekabi nte ɔyɔngɛ yu n'ekanda kpɛɛ, nga bende bande aye banebei Mokonga baegabhɛ na babɛ na mouɔ asub'a ɛkɔli anja. Yɔnga ndɔ a anja ago n'iyu a na ɛmbɔ ang'a bato. 9 Mpa oongisaga-i a bóaka la kobhobho na ind'a tɔlɔngɛnɛ†, esani, emani a yɔnga la maanɔ nda Mósa. Nga indɔ a nde ind'a bosa ago nnd'a na ɛmbɔ. 10 Nto nde abhìsa katanaga, bonhanɛ nkobà imoti na nkobà l'inda ibale†. Nabana akɔ́mi ɔka, bɔn'dɔlɛlanɛ. 11 Nga oúbha bende nto bía mmbɔ abungigi, na ilɔlɔ nd'aɛ anamoli iyu nganga.
Yɔnga nda sungia
12 Mpa, mbènɔ nde nentea mande Alatɛma aɔ Tikikɔ nɔngɔɔ, okamisɛgɛ mande bhia dhonda l'ami Nikɔpɔli nga, nekabi ga nyɛnisa la elemɔ a heɔ akpɛ iweli. 13 Ɔbɔngisɛgɛ hɛlɛ tamba nda Jɛnasi nsɔ̀i yɔnga bona Apɔlɔ†, nga bende babola-i éma nde ba nee sei a tamba nd'abɔ. 14 Atɔlɛli bato nde basu, n'ibɔ baegabhɛ na babɛ na mouɔ a kɔla la bonja nga, baetabelɛ bande ba na bungu domi. N'aye bakɔli ìbo, kesi lenda l'abɔ abá na ɛmbɔ. 15 Bato bɔbhu nde ne na abɔ, baosesei. Mpa na owɛ oeseseɛ bande basokóndi asub'a boosobela.
Boangɔ nda Mokonga abɛ na benu bɔbhu.