Da^baena rawi manusia
2:1-12
2
Mab̄oha maikai Isa Al Masih, Ruma ndai, ro mab̄oha d̄ikab̄orokaina ndai lab̄o Sia, ro nahu ma raho poda-poda d̄i nggomid̄oho loaku^du: 2 Nggomid̄oho aina roci dahu atao darura ade, b̄ara wara haba b̄a one wa'ura raka ainaina mai mbalikai Ruma Isa, kombisi haba ede ra d̄i Ruma ra karongga b̄a dou atao ra tei b̄a dou, atao loa ndad̄i wara ma nggahi b̄a one nami parana tuntimu mab̄une ede d̄i ade sab̄ua sura nami ma wara. 3 Nggomid̄oho aina co'omu weki ^dikasantuda b̄a dou kai cara-cara au rau! B̄a one sawatipu b̄a mai ainaina ede, pab̄uaku mai ulu murtad ro pab̄uaku katada Manusia Madab̄ae ra wa'u katantu ^dikaleli d̄i ade afi anaraka. 4 Kai kasombona weki sia ^dima'ao Allah Ta'ala ro ^dimaka'ese weki d̄i samenana ra nemba b̄a manusia, atao sara'a berhala ra wi'ikaina Allah Ta'ala b̄a manusia. Sia ^dimadoho ade Bait Allah ro ngoana d̄i dou-dou b̄a one siaku Allah Ta'ala.5 Kawarapu b̄a one nahu wa'ura ngoa sara'aku ede ra'aipu nahu mbuipu wara sama-samaku lab̄o nggomid̄oho. 6 Ro ake nggomid̄oho mab̄adeku au ma tapana sia, ndad̄ina sia d̄imakatada weki, d̄i wakatu ra wa'u katantu b̄a Allah Ta'ala d̄i ru'u b̄a sia. 7 Tenggo ro wale ma karawina lampa rawi madab̄ae ede wa'ura tampu'u karawina kai cara rahasia, pala mbuipu wara ma tapana. Peasi nggara ma ratapana ede wa'ura kambora, 8 ede ampona tada Manusia Madab̄ae ede. Ndad̄i nggara namaisi Ruma Isa, Sia ^dimahade Manusia Madab̄ae ede kai nawa ma ralosa ra d̄i asa-Na, ro kalelina kai d̄ese ro ntasa maikai-Na. 9 Manusia Madab̄ae ede ^dimawontu kai kuasa ma na'e ma ramai ra d̄i Iblis. Sia ^dimandawi mboto pahu lampa rawi ma^bisa ro guna ro lampa rawi maheba poda ma b̄ini kai b̄a kukukeko. 10 Sia ^dimakani samenana kukukeko ma dab̄ae d̄i kasantudakaina dou-dou ^dima'iha leli. Siad̄oho ^dima'iha leli b̄ara tula aona ro wati ca'una haba ma poda ma ramai ra d̄i Allah Ta'ala ma loana kasalama siad̄oho. 11 B̄ara ndedena Allah Ta'ala kamaina d̄i siad̄oho sab̄ua kuasa ma kasantudana, ndad̄ina siad̄oho na'imbiku d̄i au ma wati poda. 12 Nda^dikaina, sara'a dou ma ca'u d̄i dosa ro ma wati imbi d̄i mapoda ede, ^dihukum.
Nggomid̄oho rakad̄ale ^dikasalama
2:13-17
13 Cina ro angi ra meci ro ca'u b̄a Ruma! Nami pab̄uaku renta syuku ncau d̄i Allah Ta'ala mab̄oha nggomid̄oho, b̄a one ra'aipu saramba wa'una Allah Ta'ala wa'ura kad̄alena nggomid̄oho loakud̄u ^dikasalama-Na.b Lampa rawi ede ndad̄ina b̄a au ra karawi b̄a Roh Allah d̄i nggomid̄oho ^dikandad̄ikaina nggomid̄oho ela Allah Ta'ala ma raso ro b̄ara nggomid̄oho imbimu d̄i haba ma poda ra d̄i Allah Ta'ala. 14 B̄ara ndedena Allah Ta'ala ouna nggomid̄oho kai ncai Injil ra ngoa ro kahaba b̄a nami d̄i nggomid̄oho.Allah Ta'ala ouna nggomid̄oho, b̄ara Sia nane'eku loakud̄u nggomid̄oho iumu d̄ese ro ntasa Isa Al Masih, Ruma ndai. 15 B̄ara ndedena, cina ro angi, katenggopu wekimu ro nenti kaciapu d̄i au ra ngoa ro tei-ngoa ro tei ra wa'u mbei b̄a nami d̄i nggomid̄oho, nataho kai ngoa asa ro kai sura.
16-17 Raho-raho to'i mpa Isa Al Masih, Ruma ndaita, ro Allah Ta'ala Ama ndaita marere ro makatenggona ademu, loakud̄u nggomid̄oho loa karawi ro ngoa ro kahabamu au ma taho. B̄ara Allah Ta'ala mameci ro ca'u ndaita, ro b̄a taho ade-Na, Sia kandad̄ina ndai ngge'e mpa lembo ade, ro au ra ne'emu ma taho.