Do'a weapu d̄i ru'u b̄a nami
3:1-5
3
Cina ro angi, do'a weapu d̄i ru'u b̄a nami, loakud̄u haba ma ramai ra d̄i Ruma roci mbou rerona ro tarima kataho b̄a dou, sama b̄une ma wa'ura ndad̄i d̄i nggomid̄oho ntoina. 2 Do'a raupu loakud̄u Allah Ta'ala kasalamana nami ra d̄i dou-dou ma sampu ro nggele ro dou-dou ma da^bae. B̄a one wati sara'a dou ma imbi d̄i haba ma ramai ra d̄i Ruma ede.3 Pala Ruma nataho. Sia ^dimakatenggona ade nggomid̄oho ro d̄imajaga ro sandaka nggomid̄oho ra d̄i Iblis. 4 Ro nami ma'imbi podaku d̄i Ruma mab̄oha nggomid̄oho, b̄a one nggomid̄oho wunga kalampamu ro ^dimakalampana au ra kaukai b̄a nami d̄i nggomid̄oho.
5 Raho-raho to'i mpa Ruma ngge'e mpa lab̄ona nggomid̄oho loakud̄u nggomid̄oho ncewi loamu ka'ao b̄a one Allah Ta'ala mameci ro ca'u nggomid̄oho ro Al Masih mambei lembo ade d̄i nggomid̄oho.
Ngoa ro tei loakud̄u aina ^daju
3:6-15
6 Cina ro angi, kai kuasa Ruma Isa Al Masih, nami maparenta loakud̄u nggomid̄oho kad̄o'omu weki lab̄o sara'ana cina ro angimu ma mori ka^daju weki, ro ma wati b̄atu ngoa ro tei-ngoa ro tei ra mbei b̄a nami d̄i siad̄oho. 7 Ndai nggomid̄oho mab̄adeku b̄a one nggomid̄oho pab̄uapu ^batumu au ra karawi b̄a nami. Nami wati ka^dajumu weki aipu nami waramu d̄i woha nggomid̄oho. 8 Nami wati ngahamu ngaha ro nono dou kai wati colamu. Pala aimarai aimangad̄i nami karawi kapodamu ade loakud̄u nami wati kasusamu cou-cou rau d̄i ade weki nggomid̄oho. 9 Nami karawimu ede laina b̄ara nami wati ntaumu hak d̄i kau pa^buakaimu nggomid̄oho loakud̄u bantumu nami, pala b̄ara nami mane'e ndad̄i conto ma taho d̄i ru'u b̄a nggomid̄oho. 10 Aipu wakatu nami mbuipu wara d̄i woha nggomid̄oho, nami mbeimu atoran ake, <<Dou ma wati ngawa karawi, wati loana ngaha.>>
11 Nami nggahi ndedekaimu b̄ara ringa b̄a nami haba, wara dou-dou d̄i ade weki nggomid̄oho ma mori ka^daju weki. Siad̄oho wati karawina au-au, selasi repo kalu'u weki d̄i rawi dou makalai. 12 Kai kuasa Ruma Isa Al Masih nami makau d̄i dou-dou ede ro mangoa kapodana, loakud̄u siad̄oho karawina kai sana ade ro ngupa ngaha ro nono d̄i ru'u b̄a ndai siad̄oho.
13 Pala nggomid̄oho aina mawu ademu karawi mataho. 14 Kombisi peade, wara dou ma wati ngawa b̄atu au ra nggahi b̄a nami d̄i ade sura ake. Aina kabare ro aina rewo lab̄omu dou ede loakud̄u sia maja. 15 Pala aina wi'ikaimu sia ede musumu, pala ngoa ro kawarapu sia b̄une sa'e lab̄o ari.
Nggahi ro eli cumpukaina
3:16-18
16 Ruma eded̄u fu'u ramaikai taho ro ntaikai ndai. Nami mado'a loakud̄u Sia mbei ncauna nggomid̄oho taho ro ntai d̄i ade samenana lampa rawi. Nami ma do'a loakud̄u Ruma malab̄ona nggomid̄oho sara'ana.
17 Salam nahu, la Paulus. Ndai nahu ma ratuntina sura ake. Akeku tandana ra tunti b̄a nahu d̄i sara'a sura nahu.
18 Nami ma do'a loakud̄u nggomid̄oho sara'ana bareka b̄a Isa Al Masih, Ruma ndaita.
Salam ro horoma nami, Paulus