Karawi la Paulus d̄i Tesalonika
2:1-16
2
Cina ro angi! Ndai nggomid̄oho mab̄adeku b̄a one nami ma mai lamba nggomid̄oho wati lao ncauna. 2 Nggomid̄oho mab̄adeku b̄a one sawatipu nami mai rakamu nggomid̄oho d̄i Tesalonika, nami wa'ura kancoki ro kab̄awa ro katuna b̄a dou d̄i Filipi, pala kai ra bantu b̄a Allah Ta'ala, Ruma ndaita, ndad̄i nami madisaku ngoa ro kahaba Injil Allah d̄i nggomid̄oho. 3 B̄a one au ra ngoa ro tei b̄a nami d̄i nggomid̄oho laina ngoa ro tei ^disantudakai ro lai rauna kai ade ma wati raso atao ^ditipukaimu nggomid̄oho. 4 Wati! Nami wati nuntu ro nggahimu ^dikasanakai ade dou, malaisi ^dikasanakai ade Allah Ta'ala, ma ujina ade nami. B̄a one Allah Ta'ala ma imbikaina d̄i nami mangoa ro kahaba Injil. 5 Ndai nggomid̄oho mab̄adeku b̄a one nami wati paranamu kantika nuntu ro nggahi ro eli atao na'e ade d̄i piti. Allah Ta'ala ma ^badena! 6 Nami wati parana raumu ngupa d̄iroi b̄a manusia, nataho d̄i nggomid̄oho ro d̄i dou-dou ma kalai, nami ma loa mpa karawi ndede d̄i nggomid̄oho b̄ara nami ake rasul Al Masih. 7 Pala nami ma karawi kai mapu nuntu ro nggahi wakatu nami wara d̄i woha nggomid̄oho, sama b̄une sab̄ua inaa ma kab̄ua ro sandaka kataho ana^dohona. 8 Ndedeku nami meci ro ca'umu nggomid̄oho, nami mangawa ngoa ro kahaba d̄i nggomid̄oho laina mab̄oha Injil Allah mpoa, pala mori nami rau, b̄ara nami mawancuku meci ro ca'u nggomid̄oho. 9 Tantu nggomid̄oho mbuipu kawaramu nami ma karawi kapoda ade. Aimarai aimangad̄i nami karawimu loakud̄u nami wati kasusamu kone sab̄ua dou rau d̄i ade weki nggomid̄oho aipu wakatu nami ngoa ro kahabamu Injil Allah d̄i nggomid̄oho.10 Allah Ta'ala ro nggomid̄oho ma ndad̄i sakasi b̄a one nami ma mori kai ade ma raso, adil ro wati wara ruku ro rawi nami ma iha d̄i woha nggomid̄oho. 11 Nggomid̄oho mab̄adeku b̄a one au ra ngoa ro tei b̄a nami d̄i nggomid̄oho sama b̄une ama ma ngoa ro tei d̄i ana^dohona. 12 ro nami ma raho poda-poda d̄i nggomid̄oho loakud̄u nggomid̄oho mori ma ncihi ncao lab̄o au ra kane'ekai b̄a Allah Ta'ala, ma wa'ura kad̄ale nggomid̄oho lu'u ade Karaja'an Allah ro d̄ese ro ntasa-Na.
13 B̄ara ndedena nami renta ncaumu syuku d̄i Allah Ta'ala, b̄a one nggomid̄oho wa'ura tarimamu nggahi ro eli Allah Ta'ala ra ngoa ro kahaba b̄a nami ede, laina ra nggahi b̄a manusia pala poda-poda ra d̄i Allah Ta'ala. Sia edeku ma wunga karawi d̄i ade weki nggomid̄oho ma imbi d̄i Al Masih. 14 Cina ro angi, lampa rawi ra'iu b̄a nggomid̄oho wa'ura iu rau b̄a sara'a ela Allah Ta'ala d̄i Yudea eded̄u dou-dou ma imbi d̄i Isa Al Masih. Bangsa ndai nggomid̄oho makamaina susa ro ncoki ra iu b̄a nggomid̄oho, sama b̄une rawi dou Yahudi makancoki ela Allah Ta'ala d̄i Yudea. 15 Dou-dou ede ma rahade Ruma Isa ro nabi-nabi, ro ma rakancoki nami. Siad̄oho wati kandad̄i auna au ra kane'ekai b̄a Allah Ta'ala ro sara'a dou namusuku b̄a siad̄oho.Ro Allah Ta'ala wati ca'u podana siad̄oho. 16 Siad̄oho tapa-tapana nami mangoa ro kahaba Nggahi ro eli Allah Ta'ala d̄i bangsa-bangsa ma kalaina. Siad̄oho nane'eku tapa rero nami ma d̄anda ro wa'a bangsa ma kalaina ede loakud̄u bangsa ede salama. Kai ndedena dou-dou Yahudi ede nanaha sala'iku dosa sampe ^binina. Ndad̄i ake Allah Ta'ala na'ipiku mbanina ro hukumna siad̄oho.
La Paulus nane'e lao lamba dou-dou Tesalonika sakali wali
2:17-20
17 Pala cina ro angi, ra aipu nami ngalamu samporo lab̄o nggomid̄oho -- d̄o'o d̄i mada pala d̄i ade wati -- nami nanaha lingi ademu d̄i nggomid̄oho ro nami mane'e poda eda angi wali lab̄o nggomi^doho! 18 Ntoina, nami mane'e lao lamba nggomi^doho; ro nahu la Paulus, wa'ura cobaku pila-pila kali, pala Iblis matapana nami. 19 Poda romo nggomi^dohoku ma rakandad̄ina wara d̄ine'e ro d̄ibanggakai b̄a nami. B̄a one pea wakatu mai Ruma Isa, Ruma ndai ro ndai ^dimasatando-Na, ndad̄i nggomi^dohoku maka'esena nami ro nami sana ademu. 20 Poda nggomi^dohoku d̄ibanggakai b̄a nami ro ^di^dihikai b̄a ade nami!