SURA PAULUS
D̄I RU'U B̄A ELA RUMA ^DI
KOLOSE
Salam
1
1-2 Cina ro angi ela Allah Ta'ala d̄i Kolose ma to'a kasab̄ua weki lab̄o Al Masih!Kai rasul Isa Al Masih -- ra hanta b̄a Allah Ta'ala -- nahu, la Paulus, sama-sama lab̄o cina ndaita la Timotius, ma pamao raho-raho to'i mpa Allah Ta'ala, Ama ndaita mbeina bareka ro taho ro ntai d̄i ru'u b̄a nggomid̄oho.
Do'a Syuku
1:3-14
3-4 Nami wa'ura ringamu b̄a one nggomid̄oho ma'imbi d̄i Isa Al Masih ro nggomid̄oho mameci ro ca'uku samenana ela Allah Ta'ala. B̄ara ndedena, wakatu nami do'a weamu d̄i ru'u b̄a nggomid̄oho, nami marenta ncau syuku d̄i Allah Ta'ala, Ama, Isa Al Masih, Ruma ndaita. 5 Nggomid̄oho ma'imbi ro mameci ro ca'uku, b̄ara nggomid̄oho mane'eku d̄i au ra sadia b̄a Allah Ta'ala di saroga d̄i ru'u b̄a nggomid̄oho.Nggomid̄oho wa'ura ringamu mab̄oha lampa rawi ede, wakatu Injil ma poda ro ma ncihi ra karongga d̄i nggomid̄oho. 6 Injil ede, mbou d̄i sara'a dunia, ro mori dou bareka ncau b̄a Injil ede, sama b̄une mori nggomid̄oho ra bareka ratampu'u wakatu nggomid̄oho ringamu mab̄oha rahmat Allah ro poda-poda kalu'umu d̄ei ademu. 7 Sara'ana ede wa'ura b̄ade b̄a nggomid̄oho ra karongga b̄a la Epafras, lenga ma sama karawi lab̄o nami. Sia eded̄u dou makarawi wea d̄i ru'u b̄a Al Masih ma to'a karawi d̄i ru'u b̄a ndaita.a 8 Siaku ma rangoana nami b̄a one kai kuasa Roh Allah, nggomid̄oho loa cua meci ro ca'u angi.
9 B̄ara ndedena, nami do'a ncaumu d̄i ru'u b̄a nggomid̄oho, ratampu'u nami ringamu mab̄oha nggomid̄oho.Raho b̄a nami d̄i Allah Ta'ala loakud̄u Roh Allah mbeina d̄i nggomid̄oho loa timba ro lemba ro loa ka'ao ndad̄ina nggomid̄oho maloaku b̄ade kai mpuruna au ra kane'ekai b̄a Allah Ta'ala. 10 Kai ndedena nggomid̄oho maloaku mori b̄atu au ra kane'ekai b̄a Allah Ta'ala, ro kasana ncau wea ade-Na, ndad̄ina d̄i ade samenana au-au nggomid̄oho maloaku raka hasi d̄i ade sanikina lampa rawi ma taho. Ro loa ro b̄ade nggomid̄oho mab̄oha Allah Ta'ala rau ^dimanaha ore wali. 11 Raho-raho to'i mpa kai kuasa Allah Ta'ala ma d̄ese ro ntasa, nggomid̄oho ^dikatenggo ndad̄ina nggomid̄oho mawa'uku sia iu d̄i ade susa ro ncoki kai lembo ade, 12 ro kai renta syuku ^dib Ama ndaita. B̄a one Ama ndai edeku ma rakandad̄ina nggomid̄oho patu d̄imatarima au ra sadia b̄a Allah Ta'ala d̄i ru'u b̄a ela-Na d̄i ade karaja'an-Na. 13 Allah Ta'ala wa'ura hori kalosana ndaita ra d̄i kuasa Iblis ma rindi ro lao wa'a pesona ndai aka karaja'an Ana meci-Na. 14 Ana-Na edeku ma rahorina ndaita, ede aona Allah Ta'ala wa'ura kangampuna dosa-dosa ndaita.
Al Masih Ro Karawi-Na
1:15-23
15 Al Masih eded̄u gambaran Allah Ta'ala ma tada d̄i weki ndai Allah Ta'ala ma wati loa ^di'eda; Al Masih eded̄u Ana sarambana, mancewi penti ra d̄i samenana ra kanda^di. 16 B̄ara kai ncai Siaku Allah Ta'ala kandad̄ina samenana au-au d̄i saroga ro au-au ma wara d̄i wawo dunia, samenana au-au ma tada ro ma wati tada, ndede rau sara'a roh ma kuasa ro ma parenta. Dunia lab̄o sara'a isina ake rakandad̄i kai ncai Al Masih ro d̄i ru'u b̄a Al Masih. 17 Sawatipu b̄a wara samenana au-au, Al Masih nawa'ura ulu wara. Ro b̄ara Sia rau ndad̄i samena au-au warana d̄i cua-cua hid̄i ndaina. 18 Siaku ma ndad̄i tuta d̄i ru'u b̄a sarumbu eded̄u ela Ruma, b̄ara Siaku fu'una mori ro woko ela Ruma ede. Siaku ana sasa'e ma sarambakaina ra kamori mbali ra d̄i madekaina, loakud̄u ndai Sia mpa ma ndad̄i ipi penti ra d̄i samenana ma wara. 19 B̄ara sara'a tabe'a Allah Ta'ala eded̄u tabe'a Ana Allah rau.1 20 Ro kai ncai Ana-Na ede rau Allah Ta'ala kandad̄i sara'ana ma wara taho mbali lab̄o Sia -- nataho sara'a ma wara d̄i dunia, ro ma wara d̄i saroga. Allah Ta'ala kalampana ede kai ncai made Ana-Na d̄i haju salib.
21 Ntoina nggomid̄oho d̄o'o lab̄o Allah Ta'ala. Nggomid̄oho mamusuku Allah Ta'ala kai ruku ro rawi ro fiki ro kananumu mada^bae. 22 Pala ake, kai made Ana-Na, Allah Ta'ala kandad̄ina hubungan nggomid̄oho lab̄o Sia ndad̄i taho mbali. Kai made Ana-Na ede nakandad̄iku nggomid̄oho raso, ro wati wara ma ihamu d̄i tando Allah Ta'ala. 23 Pala nggomid̄oho pab̄uapu ngge'e mpa imbimu d̄i Injil, ndad̄ina nggomid̄oho ndad̄i tenggo poda. Ai to'ina nggomid̄oho horimu au ra rakamu ede ndad̄i ntaumu b̄une wakatu nggomid̄oho ringamu Injil. Injil ede wa'ura ngoa ro kahaba d̄i sanikina dou d̄i sara'a dunia. Ro d̄i ru'u b̄a ede rauku nahu, la Paulus wa'ura ndad̄i ada Ruma.
La Paulus Karawi Weana D̄i Ru'u B̄a Ela Ruma
1:24–2:5
24 Ake nahu neo adeku iu susa ro ncoki d̄i kapentikai nggomid̄oho.B̄ara kai susa ro ncoki sarumbu nahu, nahu makancihina susa ro ncoki ma mbuipu pab̄ua ^di'iu b̄a Al Masih d̄i ru'u b̄a ela-Na, eded̄u sarumbu-Na. 25 Allah Ta'ala kauna nahu ndad̄i dou makarawi wea d̄i ru'u b̄a ela-Na, d̄i ru'u paralukai b̄a nggomid̄oho.Nahu pab̄uaku karongga sara'aku Injil; 26 eded̄u haba ra aipu ratu-ratu mba'a ma uluna ra ili ro pita b̄a Allah Ta'ala d̄i sara'a dou, pala ake katadana d̄i ela-Na. 27 D̄i ela-Na ede, Allah Ta'ala nane'e katada, nawancuku tahona ro d̄ese ro ntasana ra ili ro pita b̄a Allah Ta'ala ede d̄i ru'u b̄a sara'a manusia. Ra ili ro pitana ede eded̄u: Al Masih wara d̄i ade wekimu, aona nggomid̄oho d̄ima'iu na'e ro ntoruna Allah Ta'ala. 28 Al Masih edeku ra ngoa ro kahaba b̄a nami d̄i sanikina dou. Nami mangoa ro kawara ro ma ngoa ro tei siad̄oho sara'ana kai samenana timba ro lemba. D̄i ne'e b̄a nami eded̄u sanikina dou loa ^diwa'a d̄i Allah Ta'ala, kai dou ma wa'ura tenggo imbi d̄i Ruma ade lampa rawi-lampa rawi ma raso, b̄ara wa'ura sab̄ua lab̄o Al Masih. 29 ^Dirakakai lampa rawi ede nahu karawi kapodaku ade. Nahu karawi kapodaku ade kai sara'a tenggo ra mbei b̄a Al Masih d̄i nahu ro ma karawi d̄ei ade weki nahu kai b̄ini b̄a kuasa.