Ngoa ro tei loakud̄u kasab̄ua weki ro ka'awa weki b̄une Al Masih
2:1-11
2
Nggomid̄oho tenggo, b̄ara nggomid̄oho kasab̄uamu weki lab̄o Al Masih. Ro nggomid̄oho neo ademu b̄ara Al Masih mameci ro ca'umu! Nggomid̄oho rad̄anda ro wa'a b̄a Roh Allah,b ro nggomid̄oho cua meci ro ca'upu angi rau ro ntaupu kasi ade sab̄ua lab̄o ma kalaina, 2 b̄ara ndedena nggomid̄oho kampurunapu neo ade nahu kai lampa rawi-lampa rawi ake: Mori kasa^buapu ademu kai meci ro ca'umu ma sama, kai fiki ro kananu ma sama ro kai kane'emu ma sama. 3 Aina karawimu au-au b̄ara ne'emu kapentikai weki ndai kesemu, atao ^dikasombokai weki ndaimu. Pala nggomid̄oho pab̄uapu cua-cua ka'awa weki ro wi'ikaipu dou makalai ncewi taho ntewikaisi d̄i ru'u b̄a weki ndaimu. 4 Tio kab̄aepu au d̄iparalu b̄a dou makalai; aina d̄iparalu b̄a ndai mpoa. 5 Pab̄uapu nggomid̄oho ntaumu fiki ro kananu b̄une Isa Al Masih:6 Al Masih ede sama lab̄o Allah Ta'ala,
pala Sia wati wi'ikaina weki b̄a one ka'ada'an-Na ma sama lab̄o Allah Ta'ala ede pab̄ua d̄i nenti kacia-Na.c
7 Pala, Sia hori sara'ana ede
edempara ndad̄i sama b̄une sab̄ua ada dou.
Sia ndad̄i b̄une manusia,
ro morina natada b̄une manusia.
8 Sia ka'awana weki, ro mori kai to'a d̄i Allah Ta'ala sampe madena --
eded̄u made d̄isalib.
9 B̄ara ndedena, Allah Ta'ala ka'esena Sia,
ro mbeina d̄i Sia kuasa ma ncewi na'e ntewikaisi samenana kuasa ma kalai,
10 loakud̄u sara'a makhluk ma wara d̄i langi ro d̄i dunia ro ma wara awa mai b̄a duniad ^dimanemba ro suju d̄i Isa Al Masih, 11 ro siad̄oho sara'ana ede ^dimamangaku b̄a one Al Masih eded̄u Ruma. Kai ndedena Allah Ta'ala d̄ikad̄ese ro kantasa.
Kalampa ncaupu rawi mab̄oha salamakaimu
2:12-18
12 Cina ro angi meciku, nggomid̄oho mato'a ncauku; b̄ara ndedena pab̄uapu nggomid̄oho ngge'e mpa kalampamu rawi mab̄oha salamamu kai dahu, lai mpoana wakatu nahu waraku d̄i woha nggomid̄oho, pala ncewi wali ake nahu ^do'oku lab̄o nggomid̄oho, 13 b̄ara ndai Allah Ta'ala ma karawi ta d̄ei wekimu nataho mab̄oha au ra ne'emu ro karawi b̄une ra kane'ekai b̄a Allah Ta'ala.
14 Karawipu samenana au-au kai wati badare^de atao cence ncihi. 15-16 Kai ndedena nggomid̄oho makatadaku b̄a one nggomid̄oho eded̄u ana-ana Allah1 ma wati wara ma iha ma mori kai ade ma raso ro ncihi d̄i woha dou madab̄ae ro d̄i woha dou madosa. Ro d̄i wakatu nggomid̄oho karonggamu d̄i siad̄oho haba ma mbei mori, pab̄uapu nggomid̄oho ndad̄imu taroa d̄i ru'u b̄a siad̄oho b̄une cahaya ma kalea makataroa dunia. Nggara nggomid̄oho mamorisi b̄une ede, peade wara alasan d̄i ru'u b̄a nahu ^dika'ese-esekaiku weki mab̄oha nggomid̄oho wakatu Isa Al Masih mai mbalina. Ede bukutina, b̄a one au ra karawi b̄a nahu kai kapoda ade wati lao ncauna, ro au ra usaha b̄a nahu wara hasina.
17 Kombisi nahu ^dihade ro ra'a nahu ndad̄i b̄une ra'a koroba ta ese wawo mezba hid̄i d̄onggo ro mbei b̄a nggomid̄oho d̄i Allah Ta'ala ma ndad̄i tanda b̄a one nggomid̄oho imbimu d̄i Sia. Nggara podasi ede pab̄uaku nda^dina, nahu ma renta syuku d̄i lampa rawi ede, ro b̄atu neo ade lab̄o nggomid̄oho. 18 Ndede rau nggomid̄oho pab̄uapu iu sana ro b̄atu neo ade lab̄o nahu.
La Timotius lab̄o la Epafroditus
2:19-30
19 Nahu ka'imbi b̄a one kai bantu b̄a Ruma Isa, nahu kaloa nggadu roci la Timotius d̄i nggomid̄oho, loakud̄u nahu loa neo adeku b̄ara haba mab̄oha nggomid̄oho. 20 La Timotius mpoa mpa dou ma sab̄ua fiki ro kananu lab̄o nahu, ro poda-poda makananu wea taho ro sana nggomid̄oho. 21 Sara'a ma kalai nakab̄ua mpa au ^dikapentikaina weki ndaina, laina au ^dikapentikai Isa Al Masih. 22 Ndai nggomid̄oho wa'ura edamu bukutina b̄a one la Timotius wara onena. Sia nawa'ura karawi kapoda ade lab̄o nahu ade ngoa ro kahabakai Injil. Nahu lab̄o la Timotius b̄une ana lab̄o ama. 23 B̄ara ndedena, sawa'u b̄a nahu ^badeku b̄uneku cumpukaina parakara nahu peade, nahu d̄imanggadu la Timotius d̄i nggomid̄oho. 24 Nahu ka'imbi b̄a one kai bantu b̄a Ruma, ndai nahu rau wati ntoi walina d̄imalao lamba nggomid̄oho rau.
25 Mab̄oha cina ndaita la Epafroditus ra nggadu b̄a nggomid̄oho ^dimabantu nahu, ^di'iu b̄a nahu, naparaluku nahu ma kau sia lao mbali d̄i nggomid̄oho.Sia nawa'ura karawi inga nahu. 26 Sia lingi poda adena d̄i nggomid̄oho sara'ana, ro sia darura adena b̄ara nggomid̄oho wa'ura ringamu haba b̄a one sia nasupuku. 27 Poda romo sia supuna ^disato'i damadekaina. Pala Allah Ta'ala kasi adena d̄i sia; ro laina d̄i sia mpoa, pala d̄i nahu rau, loakud̄u nahu aina ipi ncoki ade wali. 28 B̄ara ndedena, nahu kane'e nggadu roci sia d̄i nggomid̄oho loakud̄u nggara nggomid̄oho ma'edasi angi lab̄o la Epafroditus, nggomid̄oho maneo ade ro nahu rau ndad̄i sana adeku. 29 Ndad̄i, weha aopu sia kai sana ademu ro kai cinata ma sama imbi. Kaco'ipu samenana dou ma b̄une sia. 30 B̄ara ra karawina d̄i ru'u b̄a Al Masih, sia ^disato'i damadekaina; sia te'ena nawana ^dibantukaina nahu kai ngara nggomid̄oho.