SURA PAULUS
D̄I RU'U B̄A ELA RUMA ^DI
FILIPI
Salam
1
Cina ro angi ela Allah Ta'ala sara'a ma ngge'e d̄i Filipi, ro ma wa'ura kasab̄ua weki lab̄o Isa Al Masih. Ro cina ro angi mana'ekai ro mabantu ela Ruma!Nahu, la Paulus lab̄o la Timotius, ada Isa Al Masih, 2 mapamao raho-raho to'i mpa Allah Ta'ala, Ama ndaita ro Ruma Isa Al Masih mbeina bareka ro taho ro ntai d̄i nggomid̄oho.
Do'a la Paulus d̄i ru'u b̄a ela Ruma
1:3-11
3 Sanikina nahu kawaraku nggomid̄oho, nahu rentaku syuku d̄i Allah Ta'ala. 4 Ro sanikina nahu do'a weaku d̄i ru'u b̄a nggomid̄oho sara'ana, nahu kado'a kai sana adeku. 5 Nahu rentaku syuku d̄i Allah Ta'ala, b̄ara ratampu'u ainaina sarambakaina saraka ake, nggomid̄oho wa'ura bantumu nahu ngoa ro kahaba Injil. 6 Ndai Allah Ta'ala ma ratampu'una karawi ma taho ede d̄i nggomid̄oho, ro nahu ka'imbi poda Sia d̄imakanggorina karawi ede sampe nggorina d̄i wakatu mai mbalikai Isa Al Masih. 7 Ncihi romo nahu wara iuku b̄une ede d̄i nggomid̄oho, b̄a one nggomid̄oho sara'a ^deni ncau d̄i ade nahu. B̄a one nggomid̄oho ma tarima sama-sama lab̄o nahu, bareka ra mbei b̄a Allah Ta'ala d̄i nahu; nataho ake wakatu nahu ade uma bui ro wakatu nahu waraku ari lua ^dimahoru ro ma nenti kacia Injil ede. 8 Allah Ta'ala nab̄adeku b̄a one nahu lingi poda adeku d̄i nggomid̄oho kai iuku meci poda angi ra mbei b̄a Al Masih.
9 Akeku do'a nahu d̄i ru'u b̄a nggomi^doho: raho-raho to'i mpa meci ro ca'u nggomid̄oho nanaha remba ade loa ro tingimu ma ncihi ro ade sara'a loa timba ro lemba, 10 ndad̄ina nggomid̄oho maloaku kad̄ale au ma taho, loakud̄u nggomid̄oho rasomu ro wati wara ma ihamu wakatu maikai Al Masih. 11 Mori nggomid̄oho ^dimaremba kai ruku ro rawi ma poda-poda taho ra mbei b̄a ndai Isa Al Masih mpoa mpa; ndad̄i Allah Ta'ala d̄ikad̄ese ro kantasa ro d̄iroi ro wadi.
Mori d̄i ru'u b̄a Al Masih
1:12-30
12 D̄i ne'e b̄a nahu nggomid̄oho ^bademu, b̄a one lampa rawi-lampa rawi ra wa'u ngoa b̄a nahu nakandad̄iku naha mboto dou ma ringa ro imbi d̄i Injil ede. 13 Nda^dina sara'a dou ma jaga asi ro dou-dou ma kalai d̄i kota ake nab̄adeku b̄a one nahu rabui b̄ara karawi weaku Al Masih. 14 Ro b̄ara buikai nahu ede, nakandad̄iku dou-dou ma imbi d̄i Al Masih ma wara d̄i kota ake nawa'ura naha imbi wali d̄i Ruma, ndad̄ina siad̄oho nanaha disa ngoa ro kahaba mab̄oha nggahi ro eli Allah Ta'ala.a
15 Wara romo pila-pila dou d̄i ade weki siad̄oho mangoa ro kahaba mab̄oha Al Masih b̄ara hiana adena ro nane'eku cence ncihi, pala ma kalaina nangoa ro kahabaku Al Masih b̄ara wara ne'ena ma raso. 16 Dou-dou ede nakarawiku b̄ara siad̄oho nameci ro ca'uku Allah Ta'ala ro nahu, b̄ara siad̄oho nab̄adeku b̄a one Allah Ta'ala wa'ura mbeina taki d̄i nahu eded̄u d̄imakatada b̄a one Injil ede poda-poda ncihi. 17 Pala dou makalai ngoa ro kahabana mab̄oha Al Masih kai wara d̄i ne'ena ma wati taho; siad̄oho ngoa ro kahabana d̄i ru'u kapentikai weki ndaina. Kai ndedena siad̄oho nane'eku loakud̄u nahu ncewi ncoki wali d̄i ade uma bui ake.
18 Pala wati ^bunena! B̄a one kone b̄une b̄e wali rau, nataho ede ra karawi kai wara d̄ine'ena ma raso atao kai rakane'ena ma ncara, Al Masih ngge'e mpa d̄ingoa ro kahaba rau; ndad̄i nahu neo adeku. Ro nahu ngge'e mpa iuku b̄une ede, 19 b̄a one nahu kab̄adekai do'a-do'a nggomid̄oho ro kai ra bantu b̄a Roh Isa Al Masih, nahu d̄ihori kalosa. 20 D̄i ne'e poda b̄a nahu eded̄u d̄i ade karawikaiku ake ai to'ina lao ncauna. Pala d̄i ne'e b̄a nahu loakud̄u sanikina wakatu, ma penti poda wakatu ake, nahu loa katada disa, ndad̄ina kai samenana sarumbu ro nawaku -- nataho nahu mori atao madeku -- Al Masih d̄ikad̄ese ro kantasa. 21 B̄ara d̄i ru'u b̄a nahu, moriku d̄i ru'u b̄a Al Masih mpa! Ro made aona laba. 22 Pala nggara kai mori d̄i dunia ake, nahu kaloa kalampa rawi ma ncewi ntau one, ndad̄i nahu wati ^badeku ma b̄eku d̄i pab̄ua kad̄ale b̄a nahu. 23 Nahu rahinti ra d̄i d̄ua b̄ae hi^di. Nahu kane'e poda tu'u wi'i dunia ake ro lao ngge'e sama-sama lab̄o Al Masih, b̄ara edeku ma ncewi taho; 24 pala, d̄i ru'u kapentikai nggomid̄oho, nancewi tahopu nggara nahu ngge'e mpa midiku d̄i dunia. 25 Nahu ka'imbi poda d̄i lampa rawi ede. B̄ara ndedena nahu kab̄adeb̄a one nahu ^dimangge'e mpa midi lab̄o nggomid̄oho sara'ana, loakud̄u loa bantu nggomid̄oho d̄imandad̄i naha tenggo ro naha sana ademu d̄i ade imbimu d̄i Ruma. 26 B̄ara ndedena, nggara nahu kamai mbalisi d̄i nggomid̄oho peade, nggomid̄oho ma wa'ura kasab̄ua weki lab̄o Isa Al Masih ^dimantau ncewi mboto wali alasan ^dika'esekaimu weki b̄ara nahu.
27 Ma penti wakatu ake eded̄u b̄a one nggomid̄oho mamoriku kai ncihi ncao lab̄o au ra kane'ekai b̄a Injil mab̄oha Al Masih ede. Kai ndedena, kombisi nahu loa eda angi lab̄o nggomid̄oho atao wati, nahu d̄imaringa b̄a one nggomid̄oho tenggo kasab̄ua weki ro usaha kapoda ade sama-sama d̄i ru'u sab̄ua nia ro sab̄ua mpa d̄i ne'e; eded̄u d̄i imbi mapoda ma ncihi ncao lab̄o Injil ede. 28 Pab̄uapu nggomid̄oho disa ncau; aina dahu d̄i dou-dou ma musu nggomid̄oho.Kai ndedena nggomid̄oho makatadaku b̄a one siad̄oho tantu ^dimakoa, ro nggomid̄oho ^dimangolu, b̄ara ndai Allah Ta'ala mambeina ngolu d̄i nggomid̄oho. 29 B̄a one Allah Ta'ala nawa'ura mbei bareka d̄i nggomid̄oho laina d̄i imbi mpoakai d̄i Al Masih, pala d̄ima'iu susa ro ncoki rau d̄i ru'u b̄a Al Masih. 30 Ake nggomid̄oho b̄atu raumu lab̄o nahu d̄i ade lampa rawi ma sama; eded̄u ra wa'u eda b̄a nggomid̄oho ntoina, nahu makarawi kapoda ade ro saraka ake nahu mbuipu kapodaku ade, b̄une ra wa'u ringa b̄a nggomid̄oho ake.