La Paulus karawina d̄i ru'u b̄a dou-dou ma laina Yahudi
3:1-13
3
B̄ara ndedena nahu, la Paulus, rabui b̄ara Isa Al Masih d̄i ru'u b̄a nggomid̄oho ma laina Yahudi. 2 Tantu nggomid̄oho wa'ura ringamu b̄a one Allah Ta'ala, b̄ara taho ade-Na, wa'ura mbeina d̄i nahu, taki ro puta ake d̄i ru'u b̄a nggomid̄oho. 3 Allah Ta'ala katadana rahasia au ra nia-Na ro ngoana d̄i nahu. Mab̄oha lampa rawi ake wa'ura tunti kaporo b̄a nahu ta ese, 4 ro nggara bacasi b̄a nggomid̄oho, nggomid̄oho ^dimaloa ka'ao rahasia mab̄oha Al Masih b̄une ra loa ka'ao b̄a nahu. 5 Ntoina rahasia ede wati parana rangoa d̄i manusia, pala ake Roh Allah wa'ura ngoana d̄i rasul-rasul ro nabi-nabi-Na. 6 Rahasia ede eded̄u: Kai ncai Injil ede, dou ma laina Yahudi na'iu rauku bareka-bareka Allah Ta'ala ma ntoina ra sadia wea d̄i ru'u b̄a dou Yahudi mpoa mpa. Dou-dou ma laina Yahudi wa'ura ndad̄i anggota sarumbu ma sama, ro b̄atu tarima ao au ra sake b̄a Allah Ta'ala kai ncai Isa Al Masih.7 Allah Ta'ala mbeina d̄i nahu bareka -- eded̄u taki ro puta -- ^dimangoa ro kahaba Injil ede. Nahu tarimaku bareka ede, kai ncai kuasa Allah Ta'ala ma karawi d̄ei weki nahu. 8 D̄i ade weki samenana ela Allah Ta'ala, nahuku ma cumpukai b̄awa ro tuna. Pala Allah Ta'ala mbeina d̄i nahu bareka ake eded̄u taki ro puta ^dimangoa ro kahaba Injil d̄i dou-dou ma laina Yahudi mab̄oha ntau ro wara Al Masih ma wati ntau cumpu; 9 ro loakud̄u kai ncai nahu rau sara'a dou b̄adena b̄uneku Allah Ta'ala, Sia kandad̄ina dunia lab̄o isina ake, kalampana nia-Na ra'aipu ntoi wa'una ra'ili ro pita d̄i dunia. 10 Aona nggahi Allah Ta'ala ede eded̄u loakud̄u wakatu ake kai ncai ela-Na, samenana ma nenti kuasa ese woha ai nab̄ade timba ro lemba Allah Ta'ala ade sara'a pahu. 11 Allah Ta'ala kalampana ede ncihi ncao lab̄o nia-Na ma ede ro hi^di, ra karawi-Na kai ncai Isa Al Masih, Ruma ndaita. 12 Kai imbi d̄i Al Masih ro b̄ara sab̄ua lab̄o Sia, ndai d̄imbei wakatu ^dika^denikai weki d̄i Allah Ta'ala kai imbi ma poda. 13 B̄ara ndedena, raho b̄a nahu eded̄u: aina darura ade mab̄oha au ra susa ro ncoki nahu b̄ara nggomid̄oho, b̄ara sara'ana ede eded̄u d̄itahokai nggomid̄oho.
Do'a la Paulus
3:14-21
14 B̄ara ndedena, nahu sujuku d̄i tando Ama. 15 Ra d̄i Siaku sanikina iwa ro weki d̄i saroga ro d̄i dunia tarima ngarana. 16 Nahu do'aku raho-raho to'i mpa Allah Ta'ala ma wancu d̄ese ro ntasa katenggona ade nggomid̄oho kai Roh-Na. 17 Raho-raho to'i mpa nggomid̄oho b̄ara imbimu d̄i Al Masih, Sia nangge'e d̄i ademu, ro morimu kai dasa meci ro ca'u ro kuasakai b̄a meci ro ca'u. 18 Nahu do'aku raho-raho to'i mpa sama-sama lab̄o sara'a ela Allah Ta'ala loamu ka'ao, nawancuku lembo ro pajana ro d̄ese ro ^deina meci ro ca'u Al Masih, 19 ma kai fiki ro kananu manusia wati loa ^dika'ao sa^dei-^deina. Raho-raho to'i mpa nggomid̄oho patamu meci ro ca'u b̄a Al Masih ede, ndad̄ina nggomid̄oho b̄ini b̄a tabe'a-tabe'a Allah Ta'ala ma mpuruna.
20 Kai kuasa Allah Ta'ala ma tedi karawi d̄i sarumbu ndaita, Allah Ta'ala naloa karawi ma d̄o'o ncewi mboto ntewikaisi au ra loa raho b̄a ndai atao kananu b̄a ndaita. 21 Pab̄uaku Allah Ta'ala d̄ikad̄ese ro kantasa b̄a londo ro mai sandundu ro ndaka d̄i ade ela-Na, kai ncai Isa Al Masih. ^Dese ro ntasara Allah Ta'ala santoi-ntoina! Amin.