Mardeka d̄i ade Al Masih
5:1-15
5
Ake ndai poda-poda wa'ura mardeka, b̄ara Al Masih wa'ura horina ndaita! B̄ara ndedena katenggopu wekimu, ro aina ngawa wali ndad̄i ada.2 Kawarapu, nggara nggomid̄oho marahosi suna, ede aona Al Masih wati wara onena d̄i ru'u b̄a nggomid̄oho.Ma nggahi ake eded̄u ndai nahu, la Paulus. 3 Sakali wali nahu ma ngoa kapoda-poda wali d̄i ru'u b̄a dou ma raho suna, b̄a one sia pab̄uaku kalampa sara'ana hukum Taurat! 4 Nggara nggomid̄oho mane'esi usaha taho mbali lab̄o Allah Ta'ala kai ncai hukum Taurat, ede aona hubunganmu lab̄o Al Masih wa'ura kompo. Kai ndedena nggomid̄oho mori ari mai b̄a rahmat Allah. 5 Pala d̄i ru'u b̄a nami, raho b̄a nami loakud̄u kai bantu b̄a Roh Allah ro kai dasa imbi nami d̄i Al Masih, Allah Ta'ala ma kandad̄ina nami ndad̄i taho lab̄o Sia. 6 B̄a one nggara ndai wa'usi rasab̄ua lab̄o Isa Al Masih, b̄atu atao wati b̄atu atoran suna wati wara b̄une-b̄une walina. Ma penti eded̄u imbi d̄i Al Masih, ro ede natada d̄ei ade meci ro ca'u ndai d̄i dou makalai.
7 Ntoina nggomid̄oho ma'usaha kapodaku ade kalampa rawi ma taho. Ake cou ma tapa nggomid̄oho, ndad̄ina nggomid̄oho wati b̄atu walimu rawi ma poda ro ma ncihi? 8 Tantu ma karawi ede laina Allah Ta'ala ma wa'ura ou nggomi^doho! 9 Ranggahi b̄a dou, <<^Buha ma sato'i ^dimakateka sara'ana mub̄u ra ncambu.>> 10 Kone ade ndedekaina nahu mbuipu imbiku b̄a one nggomid̄oho wati d̄imab̄atu kananu ma kalai, b̄ara ndai tawa'ura sab̄ua lab̄o Al Masih. Ro nahu ka'imbi poda b̄a one cou-cou rau ma kakaco kananu nggomid̄oho, d̄ihukum b̄a Allah Ta'ala.
11 Mab̄oha nahu, cina ro angiku, b̄ab̄auku nahu ^dimusu ncaukai b̄a dou nggara nahu mbuipusi ngoa ro kahabaku b̄a one atoran suna ede paralu? Nggara podasi nahu ma ngoa ro kahaba b̄une ede, ndad̄i au ra ngoa ro kahaba b̄a nahu mab̄oha salib Al Masih wati kamaina masa'ala. 12 Nancewi tahopu dou-dou ma kakaco kananu nggomid̄oho ede losa lalona ra d̄i ade woha ela Ruma!
13 Nggomid̄oho wa'ura ou d̄imandad̄i dou ma mardeka. Pala aina kanimu lampa rawi ede d̄ikarawi ncau-ncaukaimu au ra d̄i ne'e karawi b̄a nggomid̄oho.Pala satahona, nggomid̄oho pab̄uapu cua meci ro ca'u angi ro cua karawi wea. 14 B̄a one sara'a hukum Taurat wa'ura lu'u ade parenta ma sab̄ua ake, <<Pab̄uapu nggomid̄oho meci ro ca'u sasamamu manusia b̄une nggomid̄oho meci ro ca'umu weki ndaimu.>> 15 Pala nggara nggomid̄oho macua mususi angi, jaga, pea nggomid̄oho ^dimasama-sama leli.
Mori b̄une ra kane'ekai b̄a Roh Allah atao ra kane'ekai b̄a manusia
5:16-26
16 Nggahi nahu ede aona eded̄u: Co'opu Roh Allah mad̄anda ro wa'a nggomid̄oho ro aina morimu b̄atu rakane'ekai b̄a tabe'a manusiakai. 17 B̄a one au ra kane'ekai b̄a manusia nasakontuku angina lab̄o au ra kane'ekai b̄a Roh Allah, ro au ra kane'ekai b̄a Roh Allah nasakontu angi lab̄o au ra kane'ekai b̄a manusia. ^Duana ede cua sakontu angi, ndad̄ina nggomid̄oho wati loamu karawi au ra kane'ekai b̄a nggomid̄oho. 18 Pala nggara Roh Allah na^dende ro wa'asi nggomid̄oho, ndad̄i nggomid̄oho wati kuasakai b̄a hukum Taurat.
19 Au ra kane'ekai b̄a tabe'a manusiakai natada d̄i karawi-karawi ma dab̄ae, ma sampu ro nggele, ro wati patuna; 20 nemba berhala, sihi, musu angi, ncao, wu'u, roci mbani, ro kapenti weki ndai; ncengga ro mbi'a, horu dou ma ncara 21 ro hiana ade, nono sampe mawu, ngaha ndiha ma kalalo hampa. D̄i samenana ede nahu mangoa ro kawara nggomid̄oho ake b̄une ra ngoa ro kawara b̄a nahu nggomid̄oho ntoina, b̄a one dou-dou ma karawi lampa rawi b̄une ede wati d̄imandad̄i anggota ela Karaja'an Allah.
22 Pala hasi Roh Allah eded̄u: meci ro ca'u, neo ade, taho ro ntai, lembo ade, ncera ro mbura ade, taho ade, to'a, 23 mapu nggahi ro eli, pi'i ade. Wati wara hukum ma kantana lampa rawi-lampa rawi b̄une ede. 24 Cou-cou ma ndad̄i ntau Isa Al Masih, sia ede wa'ura hadena tabe'a manusiakaina ro samenana nawasu ro au ra kane'ena. 25 Nggara ndai mori ^batusi au ra kane'ekai b̄a Roh Allah, satahona mori ndai rau ^di^dende ro wa'a b̄a Roh Allah. 26 Ndai wati loata ndad̄i sombo, ro cua ka'iha ade angi, ro hiana ade d̄i sab̄ua lab̄o ma kalaina.