La Paulus lab̄o rasul-rasul ma kalaina
2:1-10
2
Sampuru upa mba'a sawa'u b̄a ede, nahu lao mbaliku aka Yerusalem lab̄o la Barnabas, ro nahu wa'a rauku la Titus. 2 Nahu laoku aka Yerusalem b̄a one Allah Ta'ala wa'ura katadana d̄i nahu b̄a one nahu pab̄uaku lao. Wakatu ndai nahu edaku angi lab̄o dou-dou ma na'ekai ta aka, nahu ngoa ka^baeku d̄i siad̄oho mab̄oha Injil ra ngoa ro kahaba b̄a nahu d̄i ru'u b̄a dou-dou ma laina Yahudi. Nahu karawi ndedekaiku loakud̄u au ra karawi b̄a nahu nataho ntoina ro ake wati lao ncauna. 3 La Titus ma lab̄ona nahu, eded̄u dou Yunani, pala sia wati rakau pab̄ua b̄atu atoran suna, 4 konena wara dou-dou ma kau pakasa mab̄oha lampa rawi ede. Siad̄oho eded̄u dou-dou ma lu'u cili d̄i ade kalompo ndai ro wa'ana pahu b̄une cina ndai. Siad̄oho lu'una kai wati b̄ade b̄a dou ^ditapakaina ndai ma wa'ura mardeka d̄i ade Isa Al Masih. Siad̄oho nane'eku wa'a mbali ndai ndad̄i ada b̄une aipu sarambakaina, 5 pala nami wati ne'emu b̄atu au ra kane'ekai b̄a siad̄oho kone sato'i rau, b̄ara nami mane'e sandaka loakud̄u poda ro ncihina Injil ede ngge'e mpa warana d̄i nggomid̄oho.6 Kone ade ndedekaina, wati wara lampa rawi-lampa rawi b̄ou ^dikau pab̄uana nahu b̄a siad̄oho ra wi'i kai dou-dou ma tuakaina – nggahi b̄a nahu wati wara cua laina nggara siad̄oho eded̄u dou-dou ma tuakaina atao laina, b̄a one Allah Ta'ala wati ntanda kalaina dou. 7 Pala, dou-dou ra wi'i kai dou ma tuakai ede mangakuna b̄a one Allah Ta'ala wa'ura mbeina taki ro puta d̄i nahu ^dimangoa ro kahaba Injil d̄i dou ma laina Yahudi, sama b̄une Sia wa'ura mbeina taki ro puta d̄i la Petrus ^dimangoa ro kahaba Injil ede d̄i dou Yahudi. 8 B̄a one Allah Ta'ala mbeina la Petrus tenggo ro wa'u d̄imandad̄i rasul dou Yahudi, mbei rauna d̄i nahu tenggo ro wa'u d̄imandad̄i rasul dou ma laina Yahudi. 9 La Yakub, Petrus, ro la Yahya, ma ndad̄i dou-dou mana'ekai ela Ruma, mangakuna b̄a one Allah Ta'ala wa'ura mbeina d̄i nahu taki ro puta ma penti ake. Ndad̄i siad̄oho japatangana la Barnabas lab̄o nahu tanda kasobakai angi. Edempara siad̄oho ro nami ngawa b̄a one nami d̄imakarawi d̄i woha bangsa-bangsa ma laina Yahudi, ro siad̄oho d̄imakarawi d̄i woha dou Yahudi. 10 Sab̄ua mpa raho b̄a siad̄oho eded̄u loakud̄u nami ntanda ro eda dou mancoki mori. Ro nahu sana adekuc kalampa rawi ede.
La Paulus rojona la Petrus d̄i Antiokhia
2:11-14
11 Wakatu la Petrus maina d̄i Antiokhia, nahu rojo kantiriku sia b̄ara ruku ro rawina ma ncara. 12 Saramba-rambakaina sia doho ngaha samana lab̄o cina ro angi ma laina Yahudi. Pala sawa'u b̄a rongga dou-dou ra nggadu b̄a la Yakub, sia kad̄o'ona weki ra d̄i cina ro angi ma laina Yahudi ro watid̄u ngawa walina ngaha sama lab̄o siad̄oho, b̄ara sia nadahuku d̄i dou-dou ma wa'ura suna ede. 13 Cina ro angi dou Yahudi ma kalai rauna nab̄atu rauku rawi ma munafik b̄une la Petrus, ndad̄ina la Barnabas rau b̄oha b̄a pangaru ruku ro rawi b̄une siad̄oho. 14 Ndede eda b̄a nahu ruku ro rawi siad̄oho ma wati ncihi ncao lab̄o Injil ede, nggahi nahu d̄i la Petrus d̄i tando sara'a dou ma wara ta ede, <<Nggara nggomi dou Yahudi morimu wa'ura b̄une dou ma laina Yahudi, b̄ab̄auku ake nggomi ne'ekaimu pakasa dou-dou makalai mori b̄une dou Yahudi?>>
Dou Yahudi ro laina Yahudi ^dikasalama b̄ara imbina d̄i Al Masih
2:15-21
15 Ra aipu ra nggana wa'u b̄a inamu, nami eded̄u dou Yahudi ro laina ra d̄i bangsa-bangsa makalaina ma dosa. 16 Kone ade ndedekaina nami mab̄adeku b̄a one dou taho mbalina lab̄o Allah Ta'ala b̄ara imbina d̄i Isa Al Masih mpoa mpa, ro laina b̄ara kalampana hukum Taurat. Ndai nami rau imbi d̄i Isa Al Masih mpa, loakud̄u nami taho mbali lab̄o Allah Ta'ala kai ncai imbi nami ede, laina b̄ara nami kalampamu hukum Taurat. B̄ara kai kalampa hukum Taurat wati kone sab̄ua dou rau maloa taho mbali lab̄o Allah Ta'ala. 17 Nami ma usaha taho mbali lab̄o Allah Ta'ala kai mori sab̄ua lab̄o Al Masih. Pala nggara sawa'u b̄a kalampa b̄une ede, palasi nami mbuipu <<dou-dou ma dosa>> ma b̄une dou-dou ma laina Yahudi, sab̄ua ake aona b̄a one Al Masihku ma kandad̄ina nami ndad̄i dosa? Tantu wati! 18 Pala nggara nahu katampu'u mbalisi au ra wa'u bongka b̄a nahu, nahu makatada wekiku kai dou ma sapa hukum Taurat. 19 Pala nahu wa'ura made b̄ara hukum Taurat – rahade b̄a hukum ede – loakud̄u nahu loa mori d̄i ru'u b̄a Allah Ta'ala. Nahu wa'ura salib lab̄o Al Masih. 20 Pala nahu mori, pala laina ndai nahu wali ma mori, malaisi Al Masih ma mori d̄ei weki nahu. Mori ake ra'iu b̄a nahu eded̄u mori b̄a imbi d̄i Ana Allah1 ma meci ro ca'u nahu ro ma wa'ura koroba weki-Na d̄i ru'u b̄a nahu. 21 Nahu wati wi'ikaiku mod̄ana rahmat Allah. Nggara hubungan dou lab̄o Allah Ta'ala ndad̄i taho mbali b̄ara kalampana hukum Taurat, ede aona made Al Masih wati wara onena.