SURA PAULUS
D̄I RU'U B̄A ELA RUMA ^DI
GALATIA
Salam
1
1-3 Cina ro angi ela Ruma d̄i dana ro rasa Galatia, nahu la Paulus, ro sara'a cina ro angita ela Al Masih ma wara sama-sama lab̄o nahu, ma pamao raho-raho to'i mpa Allah Ta'ala, Ama ndaita ro Ruma Isa Al Masih mbeina bareka ro taho ro ntai d̄i nggomid̄oho.Nahu nda^diku rasul laina kai ncai manusia atao b̄ara hanta b̄a manusia, malaisi b̄ara Isa Al Masih ro Allah Ta'ala, Ama ndaita ma wa'ura kamori mbali Sia ra d̄i madekaina, 4 b̄ara to'ana d̄i au ra kane'ekai b̄a Allah Ta'ala, Ama ndaita, ndad̄i Al Masih d̄onggona weki-Na ndad̄i koroba d̄i ru'u b̄a dosa-dosa ndaita, loakud̄u ndai ^dikasalama ra d̄i jaman ma dab̄ae ake. 5 ^Dese ro ntasara Allah Ta'ala santoi-ntoina! Amin.
Sab̄ua mpa Injil
1:6-10
6 Nahu mbora akaku mab̄oha nggomi^doho! Nggomid̄oho ra kad̄ale b̄a Allah Ta'ala b̄ara rahmat Al Masih,a pala ake nggomid̄oho roci poda sakontumu Allah Ta'ala ro ^batumu haba mataho ma kalai, 7 ma sapodakaina laina Injil. Wara dou ma kakacona nggomid̄oho ro mane'e rungka Injil Al Masih. 8 Dou ma ngoa ro kahaba <<Injil>> ma lai lab̄o Injil ra wa'u ngoa ro kahaba b̄a nami, co'opu dou ede d̄ihukum b̄a Allah Ta'ala – konena dou ede weki ndai nami atao mala'eka ra d̄i saroga! Ihara nggomid̄oho ma rawa'a haba ede. 9 Ntoina wa'ura nggahi b̄a nami, ro ake nahu manggahi sakali wali: Dou ma ngoa ro kahaba d̄i nggomid̄oho <<haba mataho>> ma kalai ari mai b̄a Injil ra wa'u tarima b̄a nggomid̄oho d̄i nami, dou ede pab̄uaku d̄ihukum b̄a Allah Ta'ala!
10 Ndad̄i b̄uneku ake: sab̄ua wara nahu ngupaku ^disanakai ade manusia atao ^dikaco'i b̄a Allah Ta'ala? Sab̄ua nahu wunga ngupaku ^dine'ekaiku weha ade manusia loakud̄u ca'u b̄a dou? Nggara nahu mbuipusi karawiku b̄une ede, nahu laina ada Al Masih.
Ra^bunena la Paulus ndad̄ikaina rasul
1:11-24
11 Cina ro angi, nahu mangoa kapoda d̄i nggomid̄oho b̄a one Injil ra ngoa ro kahaba b̄a nahu laina ra maina ra d̄i manusia. 12 Injil ra tarima b̄a nahu ede laina ra d̄i manusia, ro wati kone sab̄ua dou rau ma rateina lampa rawi ede d̄i nahu. Ndai Isa Al Masih ma ra katada sara'a isi Injil ede d̄i nahu.
13 Tantu nggomid̄oho wa'ura ringamu mab̄oha mori ro woko nahu ntoina wakatu nahu mbuipu agama Yahudi. Nggomid̄oho ma^badeku, nahu karawiku kai toku ro kasa d̄i ela Allah Ta'ala ro nahu kane'e poda kaleli siad̄oho sara'ana. 14 Ro d̄i ade kalampakaiku agama Yahudi, nahu kancewi ese ntewikaisi lab̄o lenga^dohoku ma sapangka lab̄o nahu. Nahu kawancu to'a kalampa rawi rasa ra nginakai kalampa b̄a wa'i ro waro nami.
15 Pala b̄ara taho ade Allah Ta'ala, Sia kad̄alena nahu sawatipu nahu ranggana ro ouna nahu d̄imakarawi wea Sia. 16 Allah Ta'ala katadana Ana-Na d̄i nahu loakud̄u Injil mab̄oha Ana-Na loa d̄ingoa ro kahaba b̄a nahu d̄i dou-dou ma laina Yahudi. Aipu wakatu ede nahu wati laoku kone d̄i sab̄ua dou rau d̄i rahokaiku ngoa ro tei d̄i ru'u b̄a nahu. 17 Nahu wati lao rauku d̄i dou-dou d̄i Yerusalem ma rawa'u ulu ndad̄i rasul ntewikaisi nahu. Pala nahu laoku aka dana ro rasa Arab, sawa'u b̄a ede nahu tu'u wi'iku hid̄i ede ro lao mbaliku aka Damsyik. 18 Tolu mba'a sawa'u b̄a ede, nahu laoku aka Yerusalem d̄i patakaiku angi lab̄o la Petrus. Nahu ngge'eku lab̄o sia sampuru lima nai mpa ntoina. 19 Nahu wati edaku rasul-rasul ma kalai, selasi la Yakub,b ari Ruma Isa.
20 Au ra tunti b̄a nahu ake poda. Allah Ta'ala nab̄adeku b̄a one nahu wati cowaku!
21 Sawa'u b̄a ede nahu laoku aka dana ro rasa Siria ro Kilikia. 22 Sampe wakatu ede ela Al Masih d̄i Yudea ngge'e mpa wati patana nahu. 23 Siad̄oho ringana ra nggahi b̄a dou mpa, <<Dou ma rakancoki nami ntoina, ake nangoa ro kahabaku imbi ma ntoina rane'ena kambora b̄a siad̄oho.>> 24 Ndad̄i siad̄oho roi ro wadina Allah Ta'ala b̄ara nahu.