5
B̄ara nami mab̄adeku b̄a one nggara uma – eded̄u sarumbu – ra ngge'ekai b̄a ndai d̄i dunia ake ^diwujasi, ndad̄i Allah Ta'ala ^dimasadia wea d̄i ru'u b̄a ndai sab̄ua uma d̄i saroga, ra ndawi b̄a ndai Allah Ta'ala ro ma kante'e santoi-ntoina. 2 D̄i ade uma ma wakatu ake, ndai tawetaku b̄ara ndai ne'e poda ngge'e d̄i ade uma ndaita ma wara d̄i saroga ede. 3 Uma edeku sarumbu ndaita ma ^bou. 4 Santoi ndai ngge'e d̄i ade uma ma ra d̄i dunia ake, ndai tawetaku b̄ara tani d̄i ru'u b̄a ndai. Laina b̄ara ndai ne'eta hori weki ra d̄i sarumbu ndai ma wara d̄i dunia ake, pala b̄ara ndai tane'eku kani sarumbu ma wara d̄i saroga ede, loakud̄u sarumbu ndai ma loa made ake d̄i kuasakai b̄a sarumbu ma mori. 5 Ma sadia wea ndai d̄i ru'u b̄a ede eded̄u ndai Allah Ta'ala, ro Sia mbeina Roh-Na d̄i nenti b̄a ndaita.6 B̄ara ndedena ade nami ma iu ncauku tenggo. Nami ma ^badeku b̄a one santoi nami mbuipu ngge'emu d̄ei sarumbu nami ake, nami d̄o'o ra d̄i uma ^dingge'ekai b̄a nami sama-sama lab̄o Ruma. 7 B̄ara nami morimu kai dasa imbimu d̄i Al Masih, laina kai dasa au ma loa ^di'eda, 8 b̄ara ndedena nami lembo ademu. Nami mancewi ca'u hori weki ra d̄i sarumbu nami ake, loakud̄u nami loa ngge'e sama lab̄o Ruma. 9 B̄ara ndedena nami ma'usaha poda-poda ^dikasanakai ade-Na, nataho wakatu nami mbuipu wara d̄i uma nami ta ake, atao ta aka rau. 10 B̄a one tantu ndai sara'a ^diwa'a satando aka pangadilan Al Masih, ro cua-cua d̄imaraka ufa mancihi ncao lab̄o ruku ro rawina d̄i dunia ake – ruku ro rawi mataho atao ruku ro rawi ma'iha.
Taho mbali lab̄o Allah Ta'ala kai ncai Al Masih
5:11-21
11 Nami mab̄adeku auku aona dahu d̄i Ruma; b̄ara ndedena nami usahamu ngoa kapoda d̄i dou mab̄oha weki nami. Allah Ta'ala napataku nami sa^dei-^deina, ro d̄i ne'e b̄a nahu, nggomid̄oho rau patamu nami d̄ei ademu. 12 Ake nami wati rahomu loakud̄u nggomid̄oho roimu nami. Nami mane'e mbei sab̄ua alasan mpa ma taho d̄i ru'u b̄a nggomid̄oho loakud̄u nggomid̄oho roimu nami. Kai ndedena nggomid̄oho ma ^badeku cambe d̄i dou-dou ma kapenti pahu dou ro laina tabe'ana. 13 Nggara nami ^di'edamu wa'ura ringu, ede d̄i ru'u kapentikai Allah Ta'ala. Ro nggara nami ^di'edamu wati ringu, ede d̄i ru'u kapentikai nggomid̄oho. 14 Meci ro ca'u Al Masih ma kuasakaina nami; ro nami makawara weki b̄a one nggara sab̄ua dou wa'ura made d̄i ru'u b̄a sara'a dou, ndad̄i ede aona b̄a one sara'a dou wa'ura made. 15 Al Masih made d̄i ru'u b̄a sara'a dou, loakud̄u dou-dou ma mori, watid̄u morina d̄i ru'u b̄a weki ndaina, malaisi d̄i ru'u b̄a Al Masih ma wa'ura made ro kamori mbali b̄ara d̄i kapentikai siad̄oho.
16 B̄ara ndedena, nami watid̄u ntandamu dou kai sacara manusiakai. Poda romo nami parana nilaimu Al Masih kai sacara manusiakai, pala ake watira. 17 Dou ma wa'ura sab̄ua lab̄o Al Masih, nandad̄i manusia b̄ou poda. Ma ntoi watid̄u wara walina – sara'ana wa'ura ndad̄i ^bou. 18 Sara'ana ede rakarawi b̄a Allah Ta'ala. Kai ncai Al Masih, Allah Ta'ala kandad̄ina ndai ndad̄i taho mbali lab̄o Allah Ta'ala, edempara imbikaina d̄i ndai taki loakud̄u dou-dou ma kalai loa taho mbali lab̄o Allah Ta'ala rau.
19 Nami mangoa ro kahaba b̄a one kai ncai Al Masih, Allah Ta'ala kandad̄ina manusia taho mbali lab̄o weki ndai-Na.d Allah Ta'ala karawina ede kai wati rekena ncara ro kancaru ra karawi b̄a manusia d̄i weki ndai-Na. Ro nami wa'ura kau b̄a Allah Ta'ala ^dimangoa ro kahaba haba ede.
20 Ndad̄i nami eded̄u dou-dou ra nggadu b̄a Al Masih. Kai ncai nami, ndai Allah Ta'ala karonggana au ra nggahi-Na. Kai ngara Al Masih, nami maraho poda-poda, tarimapu au ra mbei b̄a Allah Ta'ala ma kandad̄ina nggomid̄oho taho mbali lab̄o Sia. 21 Al Masih wati wara dosana, pala Allah Ta'ala kandad̄ina Sia ma tundu ro lembana dosa ndaita, loakud̄u ndai ndad̄i taho mbali lab̄o Allah Ta'ala b̄ara sab̄ua lab̄o Al Masih.