Ntau ro wara ra d̄i saroga ra wi'i d̄i ade roa dana
4:1-15
4
Nami kalampamu rawi ake b̄ara ncera ro mbura ade Allah Ta'ala. B̄ara ndedena nami wati kompo kananumu. 2 Nami wati kanimu cara-cara ma rindi ^dimajakai. Nami wati ne'emu karawi kai kukukeko atao rungkamu nggahi ro eli Allah Ta'ala. Nami karawi weamu d̄i ru'u b̄a Allah Ta'ala kai ade ma raso b̄une ra kane'ekai-Na. B̄ara ndedena, d̄i ne'e b̄a nami sara'a dou manilai nami kai taho d̄ei ade mpidana. 3 Nggara Injil ra ngoa ro kahaba b̄a nami ede mbui ngge'epu wati loa ^dika'ao, ndad̄i dou-dou ma wunga lao aka lelikaina mpa ma wati loa ka'ao. 4 Berhala madab̄ae ma kuasakai dunia ake ma^bonto fiki ro kananu dou-dou ma wati imbi ede. Siaku ma ratapana siad̄oho loakud̄u siad̄oho wati edana taroa d̄i Injil ede mab̄oha na'e ro ntoruna Al Masih, eded̄u gambaran Allah Ta'ala. 5 Haba ra karongga b̄a nami ede laina haba mab̄oha ndai nami. Haba ede eded̄u haba mab̄oha Isa Al Masih; b̄a one Sia eded̄u Ruma; ro nami eded̄u dou-dou ma karawi wea d̄i ru'u b̄a nggomid̄oho b̄ara rakane'ekai b̄a Isa Al Masih. 6 Allah Ta'ala ma nggahi, <<Pab̄uaku d̄i hid̄i marindi wontu taroa,>> Allah Ta'ala ede rau ma kawontuna taroa ede d̄ei ade ndaita, loakud̄u fiki ro kananu ndaita ndad̄i taroa d̄i loakai ka'ao d̄ese ro ntasa Allah Ta'ala ma taroa d̄i pahu Al Masih.7 Pala ntau ro wara rohani ma ntika ede, nami wa'amu d̄i weki ndai nami ma wati ntau co'i ake ra ndawi kai dana. Kai ndedena tadara b̄a one na'e ro ntoruna kuasa ede wara d̄i Allah Ta'ala ro laina d̄i nami. 8 Nami radei heko b̄a sara'a kalompo, pala wati loana hapi nami. Nami mbora akamu, pala wati sampe kompo kananumu. 9 Mboto ma musu nami, pala nami wati parana iumu ngge'e ndai kese. Ro kone ntuwu nami ra^boe sampe mbo'omu, pala nami wati mademu. 10 Nami ntuwu iumu made Isa Al Masih d̄i sarumbu nami, loakud̄u mori ro woko rau-Na natada d̄i sarumbu nami. 11 Santoi mori nami, nami ntuwu kadahu b̄a made b̄ara Isa, loakud̄u kai ndedena mori ro woko Isa rau loa ^dikatada d̄i sarumbu nami ma loa made. 12 Ake aona b̄a one d̄i ade sarumbu nami made wunga kapodana ade kalampa kuasa-kuasana, pala nami neo ademu b̄a one mori ro woko wunga kuasana ade sarumbu nggomid̄oho.
13 D̄i ade Kitab Suci wara ratunti ndake, <<Nahu ka'imbi, b̄ara ndedena nahu nuntukaiku.>> Kai kapoda ade imbi b̄une ede rau, nami nuntu ro nggahimu b̄ara nami imbimu. 14 Nami ma'imbi podaku b̄a one Allah Ta'ala ma wa'ura kamori mbali Ruma Isa, d̄imakamori mbali nami rau lab̄o Isa, ro mawa'a nggomid̄oho ro nami aka tando-Na. 15 Sara'ana ede d̄i ru'u kapentikai nggomid̄oho.B̄a one nanaha mboto dou ma'iu meci ro ca'u Allah Ta'ala, nanaha mboto rau do'a syuku rakarongga d̄i Allah Ta'ala; Kai ndedena Allah Ta'ala d̄ikad̄ese ro kantasa.
Aina darura ade kone wakatu ncao tando lab̄o made
4:16–5:10
16 B̄ara ndedena nami wati kompo kananumu. Konena sarumbu nami nawa'ura naha mapu ro rome, pala kai ade mpida, nami rakandad̄i b̄ou d̄i sanikina ainaina. 17 Ro susa ro ncoki ma wati ipi ake, ^di'iu b̄a nami ru'u samporo mpa, d̄imambei hasi d̄i ru'u b̄a nami taho ro sana ma'ipi poda ro ma ede ro hi^di. Taho ro sana ede nancewi na'e poda nggara ntewikaisi lab̄o susa ro ncoki ede. 18 B̄ara nami wati tio ka^baemu lampa rawi ma tada, malaisi ma wati tada. Ma tada nawara samporo mpa, pala ma wati tada ede, na'ede ro hid̄i sampe santoi-ntoina.