SURA PAULUS MA KA^DUAKAINA
D̄I RU'U B̄A ELA RUMA ^DI
KORINTUS
Salam
1
Cina ro angi ela Allah Ta'ala d̄i Korintus ro samenana ela Allah Ta'ala d̄i sara'a dana ro rasa Akhaya.Nahu, la Paulus, rasul Isa Al Masih, ra hanta kai rakane'ekai b̄a Allah Ta'ala, masama-sama lab̄o cina ndaita la Timotius, 2 mapamao raho-raho to'i mpa Allah Ta'ala, Ama ndaita ro Ruma Isa Al Masih mbeina bareka ro taho ro ntai d̄i ru'u b̄a nggomid̄oho.
La Paulus rentana syuku d̄i Allah Ta'ala
1:3-11
3 ^Dese ro ntasara Allah Ta'ala, Ama b̄a Ruma Isa Al Masih, Ruma ndaita. Sia Ama ma wancu ncera ro mbura ade, ro Sia eded̄u Allah Ta'ala ma mbei tenggo ro wale d̄i ru'u b̄a manusia. 4 Sia katenggona ade nami d̄i sanikina susa ro ncoki ra iu b̄a nami, loakud̄u kai tenggo ro wale ra tarima b̄a nami ra d̄i Allah Ta'ala ede, nami rau maloa katenggo wea ade sara'a dou ma wunga susa ro ncoki. 5 Sara'a susa ro ncoki ra iu b̄a Al Masih wa'ura mboto iu b̄a nami rau. Ro kai ncai Al Masih rau, ade nami wancuku ^dikatenggo rau. 6 Nggara nami ma'iusi susa ro ncoki, ede aona ^dikatenggokai ade nggomid̄oho, d̄isalamakai nggomid̄oho.Nggara ade nami ^dikatenggosi, ndad̄i nggomid̄oho ^dikatenggo rau, ndad̄ina nggomid̄oho ^dimalembo ade d̄i ade sara'a susa ro ncoki b̄une ra iu b̄a nami rau. 7 Nami ma'imbi ncau ro wati parana mbali mbua ademu mab̄oha nggomid̄oho, b̄ara nami mab̄adeku b̄a one nggomid̄oho ma iu rauku susa ro ncoki lab̄o nami. Ro b̄ara ndedena nggomid̄oho ma iu rauku tenggo sama-sama lab̄o nami.
8 Cina ro angi! D̄i ne'e b̄a nami, nggomid̄oho b̄ademu mab̄oha susa ro ncoki ra iu b̄a nami d̄i dana ro rasa Asia. Susa ro ncoki ra iu b̄a nami ede na'ipiku tanina, ndad̄ina nami wa'ura kompo kananumu ^dimamori; 9 ^di'iu b̄a nami b̄une-b̄une nami wa'ura b̄ab̄u kai hukuman made. Pala lampa rawi ede ndad̄ina loakud̄u nami aina wi'i weki d̄i tenggo ro wale weki ndai nami, malaisi d̄i Allah Ta'ala ma kamori mbali dou mamade. 10 Sia ma wa'ura kasalamana nami ra d̄i bahaya made ma samangikai adea ede. Ro Sia rauku ma kasalamana nami peade d̄i ainaina ma kento, 11 nami ma imbi b̄ara do'a-do'a nggomi^doho^di ru'u b̄a nami, Allah Ta'ala kasalamana nami ra d̄i bahaya. Allah Ta'ala naca'u mbei bareka ^dicambekaina do'a dou mamboto d̄i ru'u b̄a nami rau, b̄ara ndedena mboto dou ma renta syuku d̄i Allah Ta'ala.
La Paulus rungkana niana
1:12–2:4
12 Nami ma loa roi weki ndai nami, b̄a one d̄ei ade mpida nami ma'imbi podaku b̄a one mori nami d̄i dunia ake mapenti poda eded̄u hubungan nami lab̄o nggomid̄oho wa'ura kalampa b̄a nami kai nira poda ademu.b Au ra karawi b̄a nami ede, laina kai timba ro lemba manusia, pala kai loa ro b̄ade ra mbei b̄a Allah Ta'ala. 13-14 Ra tunti b̄a nami d̄i ru'u b̄a nggomid̄oho eded̄u mab̄oha lampa rawi ma loa ^dibaca ro ka'ao b̄a nggomid̄oho mpa. Ake nggomid̄oho wati loa podamu ka'ao sara'a mab̄oha nami, pala raho b̄a nahu d̄i nggomid̄oho poda-poda loamu ka'ao nami. Kai ndedena, d̄i wakatu maikai Ruma Isa peade, nggomid̄oho ^dimaroi weki b̄ara nami, b̄une nami rau maroi weki b̄ara nggomid̄oho.
15 B̄ara imbi podaku ede ndad̄i nahu aipu sarambakaina, nahu ne'eku lao lamba nggomid̄oho loakud̄u nggomid̄oho rakamu bareka d̄ua kali mbotona. 16 Nahu kane'e lao lamba nggomid̄oho wakatu ade lampa ro laokai nahu aka Makedonia ro sai wali d̄i nggomid̄oho wakatu nahu dulaku, loakud̄u nggomid̄oho bantumu nahu wunga ade lampa ro lao walikai aka Yudea. 17 Pala nahu wa'ura rungkaku niaku ede; sab̄ua ede aona nahu wati kaco'iku au ra niaku? Wakatu nia b̄a nahu ede, sab̄ua nahu ndawiku b̄une ra kane'ekai b̄a ndai nahu, samporo kanggahi, <<Io,>> ro samporo wali <<Wati>>? 18 Kai ngara Allah Ta'ala ma loa ^di'imbi, au ra sake b̄a nahu d̄i nggomid̄oho laina<<Ka'io>> ro laina ma <<Kawati>>. 19 B̄a one Isa Al Masih, Ana Allah,1 ra ngoa ro kahaba d̄i nggomid̄oho b̄a la Silas, Timotius, ro b̄a ndai nahu laina dou ma <<Ka'io>> ro <<Kawati>>. Pala Sia eded̄u cambe kai <<Io>> ra d̄i Allah Ta'ala. 20 B̄a one kai ncai Sia, Allah Ta'ala wa'ura nggahina <<Io>> d̄i sara'a au ra sake-Na. Kai dasa edeku ndai rentata <<Amin>> d̄i Allah Ta'ala b̄ara Isa Al Masih. Karawikai b̄a nami b̄une ede loakud̄u d̄ikad̄ese ro kantasakai Allah Ta'ala. 21 Ndai Allah Ta'ala marakandad̄ina nami ro nggomid̄oho tenggo kasab̄ua weki lab̄o Al Masih; Sia rau marakad̄ale kalaina ndai d̄i ru'u b̄a weki Sia mpa. 22 D̄i ru'u b̄a edeku Allah Ta'ala wa'ura kasahana ndaita ndad̄i ntau-Na ro mbeina roh-Na d̄ei ade ndaita ^dinenti b̄a one Sia d̄imambei d̄i ndai sara'a au ra sake-Na.
23 Allah Ta'ala ma ndad̄i sakasi d̄i ru'u b̄a nahu – b̄a one Sia nab̄ade sara'aku isi ade nahu – b̄a one nahu wati ndad̄i laoku aka Korintus, b̄ara nahu wati ne'eku kasusa ade nggomid̄oho. 24 Nahu wati pakasaku nggomid̄oho mab̄oha auku d̄ipab̄ua imbi b̄a nggomid̄oho, b̄ara nggomid̄oho mawa'ura ipi imbimu d̄i Al Masih. Nahu b̄a karawi sama mpa lab̄o nggomid̄oho loakud̄u nggomid̄oho naha taho ro sana.