Sakali wali mab̄oha loa ro b̄ade ra mbei b̄a Roh Allah
14:1-25
14
Nggomid̄oho pab̄uapu meci ro ca'u dou makalai. Ro usaha raupu ^ditarima aokaimu loa ro b̄ade rambei b̄a Roh Allah, ma ipi penti poda eded̄u loa ro ^bade-loa ro b̄ade ^diloakaimu karongga au-au ra nia b̄a Allah Ta'ala d̄i ru'u b̄a manusia. 2 Dou ma nuntu ro nggahi kai bahasa roh, dou ede laina nuntu ro nggahina d̄i manusia; sia nanuntu ro nggahiku lab̄o Allah Ta'ala. Wati wara dou ma loana ka'ao au ra nggahi b̄a sia, b̄ara Roh Allah ma rakandad̄ina sia rentana lampa rawi-lampa rawi ma ili weki. Ro Allah Ta'ala mpoa mpa ma b̄adena au ra renta b̄a dou ede. 3 Pala dou ma karongga haba ra d̄i Allah Ta'ala, nakaronggaku d̄i manusia; ^dikatenggokaina siad̄oho, d̄ingoa ro teikaina siad̄oho ro ^direrekaina ade siad̄oho. 4 Dou ma nuntu ro nggahi kai bahasa roh ^dimakatenggo weki ndai mpoana, dou ma karongga haba ma ramai ra d̄i Allah Ta'ala nabantuku ela Allah Ta'ala loakud̄u nanaha tenggo imbina.5 Nawancuku tahona nggara nggomid̄oho sara'a loa nuntu ro nggahi kai bahasa roh. Pala ma ipi taho eded̄u nggara nggomid̄oho loamu ngoa ro kahaba au ra nia b̄a Allah Ta'ala. B̄ara dou ma karongga haba ma ramai ra d̄i Allah Ta'ala, nancewi na'e ntewikaisi lab̄o dou ma loa nuntu ro nggahi kai bahasa roh; nalai b̄une dou ma nuntu ro nggahi kai bahasa roh ede ma loa ngoa katantu au ra nggahina ede, loakud̄u sara'a ela Ruma naloa raka onena. 6 Nggara misakai maisi nahu d̄i nggomid̄oho ro nuntu ro nggahiku kai bahasa roh, auku onena ede d̄i ru'u b̄a nggomid̄oho? Wati wara onena kone sato'i rau! Nalai wali, nggara nahu makatadana au ra ngoa b̄a Allah Ta'ala, atao nahu mangoa kab̄aena mab̄oha Allah Ta'ala, atao nahu makaronggana au ra nia b̄a Allah Ta'ala, atao nahu matei.
7 Jalitu ro gambo ma wati ntau nawa kone sato'i rau, nggara watisi ^di'ufi ro ko^bi ro pi^da kataho wea elina, b̄uneku loa ^di^badekai b̄a dou rawa au ra wa'ana ede? 8 Conto ma kalai wali: Nggara ufisi tarompe kai eli b̄e rane'e ndaina, cou mangawa lao lewa? 9 Ndede rau lab̄o loa ro wa'umu nuntu ro nggahi ade bahasa roh. Nggara nggomid̄oho marentasi nggahi ma wati loa ^dika'ao, wati wara kone sab̄ua dou rau maloana ka'ao au ra nggahi b̄a nggomid̄oho ede. Nggahi ro eli nggomid̄oho ede ^dimambora wati b̄ae laona. 10 D̄i dunia ake wara mboto pahu bahasa, pala wati wara kone sab̄ua rau ra d̄i bahasa-bahasa ede ma wati ntau ao ro ma'anana. 11 Pala nggara nahu watisi loaku ka'ao bahasa ra renta b̄a sab̄ua dou, ndad̄i dou ma nuntu kai bahasa ede eded̄u dou lai rasa d̄i ru'u b̄a nahu; ndede rau nahu, dou lai rasa d̄i ru'u b̄a sia. 12 Mab̄oha ndai nggomid̄oho, nahu kab̄adeb̄a one nggomid̄oho mane'e poda raka loa ro ^bade-loa ro b̄ade d̄i Roh Allah. Pala ma penti poda, nggomid̄oho pab̄uapu usaha ^dimakani tenggo ro wa'umu ma bantu ela Ruma ndad̄i naha tenggo imbi.
13 B̄ara ndedena dou ma nuntu ro nggahi kai bahasa roh, pab̄uaku rahona d̄i Allah Ta'ala loakud̄u sia d̄imbei rau tenggo ro wa'u ^diloakaina ngoa ro tei kab̄ae au ra nggahina ede. 14 B̄a one nggara nahu kado'asi kai bahasa roh, ndad̄i roh nahu ma do'a, pala fiki ro kananu nahu wati do'ana. 15 Ndad̄i, auku d̄ipab̄ua karawi b̄a nahu? Akeku d̄ipab̄ua karawi b̄a nahu. Nahu ^dimado'a kai roh nahu, pala nahu ^dimado'a rau kai fiki ro kananu nahu. Nahu ^dimarawa kai roh nahu, pala nahu kane'e rawa kai fiki ro kananu nahu rau. 16 B̄a one nggara nggomid̄oho marentasi syuku d̄i Allah Ta'ala kai roh mpoamu, ro wara dou makalai ma wati loa ka'ao bahasa roh ma ramai ra d̄i Roh Allah ede, ndad̄i dou ede wati loana nggahi, <<Amin>> d̄i do'a syukumu ede; b̄ara sia wati b̄adena au ra renta b̄a nggomid̄oho. 17 Konena do'a syukumu d̄i Ruma ede nawancuku tahona, pala do'a ede wati wara onena kone sato'i rau d̄i ru'u b̄a dou makalai.
18 Nahu marenta syuku d̄i Allah Ta'ala b̄ara ndai nahu kaloa nuntu ro nggahi kai bahasa roh ma ncewi ese, ese mai b̄a nggomid̄oho sara'ana. 19 Pala, d̄i ade edakai angi d̄i nembakai Ruma, wakatu ngoa ro teiku dou, nahu kancewi ca'upu kaniku 5 mpu'u nggahi ^diloakai ka'ao b̄a dou ntewikaisi d̄i riwu-riwu nuntu ro nggahi ade bahasa roh.
20 Cina ro angi! Aina fiki ro kananu b̄une d̄ambe to'i. Pala nggomid̄oho pab̄uapu b̄une d̄ambe to'i ma watipu pata rawi ma da^bae. Ade fiki ro kananu, nggomid̄oho pab̄uapu ndad̄i b̄une dou ma wa'ura na'e. 21 Ade Kitab Suci wara ratunti ndake,
<<Nggahi Ruma, <Kai ncai dou-dou
ma nuntu kai bahasa ma wati loa ^dika'ao,
Nahu ^dimanuntu d̄i ela Ruma ake.
Kone kai ncai dou-dou lai rasa, Nahu ^dimanuntu ro nggahi d̄i ela-Ku;
kone ade ndedekaina siad̄oho wati ne'ena kade'e nggahi ro eli Nahu.> >>
22 Ndad̄i loa ro b̄ade ^dimaloa nuntu kai bahasa roh eded̄u mandad̄i tanda d̄i ru'u b̄a dou ma wati imbi, laina d̄i ru'u b̄a dou ma imbi. Ro loa ro b̄ade ^dimangoa au ra niakai b̄a Allah Ta'ala d̄i ru'u b̄a manusia eded̄u tanda d̄i ru'u b̄a dou ma imbi, laina d̄i ru'u b̄a dou ma watipu imbi. 23 B̄ara ndedena, misakai d̄i ade edakai angi ela Ruma, samenana ela Ruma manuntu ade bahasa roh, edempara mai pila-pila dou makalai atao dou ma laina ela Al Masih, tantu dou-dou ede nakacaiku nggomid̄oho wa'ura ringu sara'a! 24 Pala nggara nggomid̄oho sara'a makaronggasi haba ma ramai ra d̄i Allah Ta'ala, edempara mai sab̄ua dou ma laina ela Al Masih atao sab̄ua dou makalaina, ndad̄i lampa rawi-lampa rawi ra karongga b̄a nggomid̄oho sara'a d̄imakatadana dosa-dosa dou ede lab̄o nakandad̄iku sia kawara wekina b̄ara dosa-dosana. 25 Lampa rawi-lampa rawi ma cili weki d̄ei adena ^dikatada, ndad̄ina sia naka'awaku wekina, edempara nembana Allah Ta'ala. Sia ^dimamangaku b̄a one Allah Ta'ala poda-poda wara ade woha nggomid̄oho.
Atoran ade ela Ruma
14:26-40
26 Ndad̄i, cina ro angi, auku aona sara'ana ede? Nggara nggomid̄oho makab̄orosi wekimu ^dinembakaimu Ruma, wara ma rawa, wara ma ngoa ro tei, wara ma karongga au-au ma ramai ra d̄i Allah Ta'ala, wara ma nuntu ro nggahi kai bahasa roh, ro wara ma ngoa kab̄ae au ra nggahi ede. Pala sara'ana ede pab̄uaku d̄ikalampa d̄ingoa ro teikai ro d̄i ru'u taho menakai. 27 Nggara nawarasi ma ne'e nuntu ro nggahi kai bahasa roh, pab̄uaku d̄ua atao tolu dou mpa kai kali cempe angi. Ro pab̄uaku wara ^dimangoa kab̄aena au ra nggahi b̄a dou ma nuntu ede. 28 Nggara watisi wara ma loa ngoa ka^baena, ndad̄i dou-dou ma nuntu kai bahasa roh ede pab̄uaku midina ade edakai angi ede. Co'opu siad̄oho nuntu ro nggahina d̄ei ade mpoana d̄i Allah Ta'ala. 29 ^Dua atao tolu dou ma ntau haba ra d̄i Allah Ta'ala pab̄uaku karonggana haba ede, pala ma kalaina makananu kataho-tahona au ra nggahi ede. 30 Pala misakai nggara haba ra d̄i Allah Ta'ala maina d̄i sab̄ua dou makalai ma doho ade edakai angi ede, ndad̄i dou ma wunga nuntu ro nggahi, pab̄uaku denggana. 31 Kai cara b̄une ede, nggomid̄oho sara'ana, sab̄ua-sab̄ua loa karongga haba ma ramai ra d̄i Allah Ta'ala; loakud̄u sara'ana tarima ngoa ro tei ro nanaha tenggo imbi. 32 Loa ro b̄ade ra d̄i Roh ^dimakarongga haba ra d̄i Allah Ta'ala loa ^dikantiri b̄a dou makarongga haba ede. 33 Allah Ta'ala eded̄u Allah Ta'ala ma ca'u ^ditaho ro sana; Sia laina Allah Ta'ala ma ca'u d̄i lampa rawi ma ngango ro ngora.
^Bune ranginakai kalampa ade sara'a ela Allah Ta'ala. 34 Dou siwe pab̄uaku midina ade edakai angi ela Ruma. Siad̄oho wati kau b̄a dou nuntu ro nggahi. Siad̄oho wati loana ndad̄i mana'ekaina; ede ncihi ncao lab̄o hukum Taurat. 35 Nggara siad̄oho nane'esi b̄ade au-au, siad̄oho pab̄uaku sod̄ina d̄i rahina mab̄oha lampa rawi ede wakatu rongga rahina d̄i uma. Nawancuku d̄imajakai nggara dou siwe nanuntu ro nggahisi d̄i ade edakai angi ela Ruma.
36 Sab̄ua nggahi ro eli Allah Ta'ala ra maina ra d̄i nggomid̄oho? Atao d̄i nggomid̄oho mpa nggahi ro eli ede ^dikarongga? 37 Nggara warasi dou ma iu weki ntauna loa ro b̄ade ^dimakarongga haba ma ramai ra d̄i Allah Ta'ala, atao sia nantau loa ro b̄ade makalai ra d̄i Roh Allah, dou ede pab̄uaku iuna weki b̄a one au ra tunti b̄a nahu ake eded̄u parenta ra d̄i Ruma. 38 Pala nggara warasi ma wati ngawa tarima ake, aina kandad̄i aumu sia.