Mboto pahu loa ro ^bade, pala Roh sab̄ua mpa
12:1-11
12
Ake mab̄oha loa ro ^bade-loa ro b̄ade ra mbei b̄a Roh Allah. Mab̄oha ede, d̄i ne'e b̄a nahu loakud̄u cina ro angi b̄ademu ma sapodakaina. 2 Kawarapu b̄a one wakatu nggomid̄oho sawatipu imbimu Ruma, nggomid̄oho pangaru b̄a dou loakud̄u ^batumu berhala ma mpongi. 3 Nggomid̄oho pab̄uapu b̄ade b̄a one dou ra d̄anda ro wa'a b̄a Roh Allah wati loana nggahi, <<Ihara Isa!>> Ndede rau wati kone sab̄ua dou rau maloa nggahi, <<Isa Al Masih eded̄u Ruma!>> Nggara dou ede watisi ra d̄anda ro wa'a b̄a Roh Allah.4 Wara mboto pahu loa ro b̄ade ra d̄i Roh Allah, pala sara'ana ede ra mbei b̄a Roh ma sab̄ua mpa. 5 Wara mboto pahu karawi d̄ikarawi weakai d̄i ru'u b̄a Ruma, pala Ruma d̄ikarawi wea ede, Ruma ma sab̄ua mpa. 6 Wara mboto cara d̄ikarawi weakai karawi Ruma, pala ma mbei tenggo ro wale d̄i ru'u b̄a ede d̄i sanikina dou eded̄u Allah Ta'ala ma sab̄ua mpa. 7 D̄i taho kai ndai sara'a, Roh Allah nakarawiku d̄i sanikina dou kai cara cua-cua ndaina. 8 D̄i sab̄ua dou, Roh ede mbeina loa ro b̄ade ^diloakai nuntu ro nggahi kai hikima, ro ^dimakalaina Roh ma sama ede mbeina loa ro b̄ade ^diloakaina ngoa ro tei kab̄ae mab̄oha Allah Ta'ala. 9 D̄i ru'u b̄a sab̄ua dou wali Roh ma sama rau mbeina loa ro b̄ade ^diloakaina imbi d̄i Al Masih; pala ma kalai walina Roh ede mbeina kuasa ^diloakaina kataho dou ma supu. 10 D̄i sab̄ua dou, Roh mbeina kuasa ^diloakaina karawi ma b̄isa ro guna, ro d̄i makalaina Roh ede mbeina loa ro b̄ade ^diloakaina ngoa au-au ra nia b̄a Allah Ta'ala. Ro ^dimakalai walina Roh ede mbeina loa ro b̄ade ^diloakaina pata cengga mboto pahu roh. D̄i ru'u b̄a sab̄ua dou Roh mbeina loa ro b̄ade ^diloakaina nuntu ro nggahi kai bahasa roh, ro ^dimakalaina Roh ede mbeina loa ro b̄ade ^diloakaina ka'ao wea bahasa roh ede. 11 Pala sara'ana ede rakarawi b̄a Roh ma sab̄ua mpa, sanikina dou mbeina loa ro b̄ade b̄une ra kane'ekai b̄a Roh ede.
Mboto anggota pala sab̄ua sarumbu
12:12-31
12 Al Masih eded̄u b̄une sarumbu manusia; sarumbu ede sa^bua, pala mboto anggotana. Sara'a anggota ede, konena mboto, pala sarumbuna sab̄ua mpa. 13 Ade sab̄ua Roh ndai sara'a, nataho dou Yahudi, ro dou ma laina Yahudi, nataho ada dou ro laina ada dou, wa'ura kandeu raso b̄a Roh ma sama loakud̄u ndai ndad̄i sab̄ua lab̄o sarumbu Al Masih. Ro ndai sara'ana kuasa b̄a Roh ede.
14 B̄ara ndai sarumbu ede laina sab̄ua anggota mpoa mpa pala mboto anggotana. 15 Nggara nanggahisi b̄a e^di, <<Nahu laina rima, b̄ara ndedena nahu laina anggota sarumbu,>> ede laina aona b̄a one ed̄i ede laina anggota sarumbu. 16 Ro nggara nanggahisi b̄a fiko, <<B̄a one nahu laina isi mada, ndad̄i nahu laina anggota sarumbu,>> ede rau laina aona b̄a one fiko ede laina anggota sarumbu. 17 Misakai sara'a anggota sarumbu ede eded̄u isi mada mpa, b̄uneku loana sarumbu ringa ro kade'e? Misakai sara'ana eded̄u fiko, b̄uneku loana sarumbu ede loa sangufi? 18 Pala Allah Ta'ala wa'ura tohona anggota-anggota sarumbu ede d̄i cua-cua hid̄i ndaina b̄une ra kane'ekai b̄a Allah Ta'ala. 19 Misampara sab̄ua mpa anggota, ede watipu loa ^dipehekai sarumbu. 20 Ncihi romo wara mboto anggota sarumbu, pala sab̄ua mpa sarumbu.
21 Ndad̄i isi mada wati loana nggahi d̄i rima, <<Nahu wati paraluku nggomi.>> Ro tuta wati loana nggahi d̄i e^di, <<Nahu wati paraluku nggomi.>> 22 Sapodakaina anggota-anggota sarumbu ra wi'ikai mamapu ro marome ede, nawancuku d̄iparalu b̄a ndai; 23 ro anggota-anggota ra wi'ikai b̄a ndai wati ipi ^dikaco'i, pala edeku anggota-anggota ma ipi ^dikaco'i b̄a ndaita. Anggota-anggota sarumbu ma wati ntika ^di'eda, edeku ma ncewi d̄i kandad̄i au b̄a ndaita. 24 Anggota-anggota sarumbu ra eda b̄a ndai ntika, watid̄u paralu d̄i kandad̄i au b̄a ndai. Allah Ta'ala wa'ura atona sarumbu ndai kai ndede pahu ndad̄ina anggota-anggota ma wati ipi ^dikaco'i, edeku ^di'ipi kaco'i. 25 Kai ndedena sarumbu ede wati rancengga-ncenggana; cua-cua anggota sarumbu nakandad̄i auku sab̄ua lab̄o ma kalaina. 26 B̄ara ndedena nggara sab̄ua anggota sarumbu napilisi, ndad̄i sara'a anggota sarumbu makalaina na'iuku pili rau; nggara sab̄ua anggota sarumbu ^diroi, sara'a anggota sarumbu makalaina na'iuku sana.
27 Nggomid̄oho sara'ana eded̄u sarumbu Al Masih ro cua-cua nggomid̄oho rau eded̄u anggota sarumbu ede. 28 Ndede rau ade ela Ruma, Allah Ta'ala wa'ura katantuna hid̄i d̄i cua-cua dou: Saramba-rambakaina eded̄u rasul-rasul; ma ka^duakaina eded̄u nabi-nabi, ma katolukaina eded̄u guru-guru, edempara dou-dou ma karawi ma^bisa ro guna, sawa'u b̄a ede siad̄oho ra mbei kuasa ^diloakaina kataho dou ma supu, atao ^dimabantu dou makalai, atao ^dimana'ekaina, atao ^dimanuntu ro nggahi kai mboto pahu bahasa roh atao ^dimangoa ao ro ma'anana bahasa ede. 29 Siad̄oho laina sara'a rasul, atao nabi, atao guru. Wati sara'ana mantau kuasa d̄imakarawi b̄isa ro guna, 30 atao ^dimakataho dou masupu, atao ^dimanuntu kai mboto pahu bahasa roh, atao ^dimaka'ao wea ao ro ma'anana bahasa ede. 31 B̄ara ndedena, pab̄uapu nggomid̄oho usaha karawi kapoda ade ^diloakaimu raka loa ro ^bade-loa ro b̄ade ma ipi penti. Pala ta awa ake, nahu ^dimatei katada d̄i nggomid̄oho ncai ma ncewi taho wali.