11
^Batupu conto rawi nahu, b̄une nahu rau ma b̄atu conto rawi Al Masih.Mab̄oha kani to^du tuta wakatu sambea ro ibada
11:2-16
2 Nahu maroi nggomid̄oho b̄ara nggomid̄oho makawara ncauku nahu ro ^batumu au ra tei b̄a nahu d̄i nggomid̄oho. 3 Pala nahu kane'e nggomid̄oho b̄ademu sab̄ua lampa rawi wali, eded̄u b̄a one ma ndad̄i mana'ekaina d̄i sanikina dou mone eded̄u Al Masih; ma ndad̄i mana'ekai wei eded̄u rahi, ro ma ndad̄i mana'ekai Al Masih eded̄u Allah Ta'ala. 4 Nggara sab̄ua dou mone wakatu do'ana atao wakatu karonggana haba ra d̄i Allah Ta'ala d̄i tando dou mamboto kai kanina to^du tuta, ndad̄i dou ede nakab̄awa ro katunaku Al Masih. 5 Ro nggara sab̄ua dou siwe wakatu do'a atao wakatu karonggana haba ra d̄i Allah Ta'ala d̄i tando dou mamboto kai wati kanina to^du tuta, ndad̄i dou siwe ede nakab̄awa ro katunaku rahina ma ndad̄i dou mana'ekai d̄i wekina. Ede sama mpa b̄une-b̄une tuta dou siwe ede wa'ura ^boru kakola. 6 B̄ara nggara dou siwe watisi ne'ena to^du tutana nancewi tahopu dompo honggona. Pala nggara dou siwe na^borusi tutana atao nadomposi honggona, ndad̄i ede aona wa'ura kab̄awa ro katunana ndai sia. B̄ara ndedena nancewi tahopu sia to^duna tuta. 7 Dou mone wati paraluna kani to^du tuta, b̄ara sia nakatadaku wekina ro d̄ese ro ntasa Allah Ta'ala. Pala dou siwe nakatadaku na'e ro ntoru dou mone. 8 B̄a one dou mone watira kandad̄i ra d̄i dou siwe, dou siweku ra kandad̄i ra d̄i dou mone. 9 Dou mone wati ra kandad̄i rau d̄i ru'u kapentikai dou siwe, malaisi dou siwe ra kandad̄i d̄i ru'u kapentikai dou mone. 10 B̄ara ndedena, ^dikasanakai mala'eka-mala'eka, dou siwe pab̄uaku kanina to^du tuta d̄ikatandakai b̄a one ma ntau kuasa d̄i sia eded̄u rahina. 11 Kone ade ndedekaina ade mori ro woko ndai kai dou ela Al Masih, dou siwe wati mori kesena, hori weki ra d̄i dou mone, ro dou mone rau wati mori kesena, hori weki ra d̄i dou siwe. 12 B̄a one sama b̄une dou siwe ma sarambana, rakandad̄i ra d̄i dou mone, pala sawa'u b̄a ede dou mone ranggana b̄a dou siwe; ro sara'ana ramaina ra d̄i Allah Ta'ala.
13 Kananu katahopu b̄a ndai nggomid̄oho mab̄oha lampa rawi ake: Sab̄ua nataho dou siwe nggara nado'asi d̄i Allah Ta'ala d̄i tando dou mamboto kai wati to^duna tuta? 14 Ranginakai b̄a dou mamboto, nggomid̄oho wa'ura tei b̄a one dou mone nggara nakanarusi honggona, ede wati patuna. 15 Pala d̄i ru'u b̄a dou siwe, honggo rambei d̄i sia ^di^bontokai tutana ro honggo manaru eded̄u tanda na'e ro ntoru d̄i ru'u b̄a sia. 16 Pala nggara nawarasi ma ne'e cence ncihi mab̄oha masa'ala ake, nami ro ela Allah Ta'ala ma kalaina wati ranginamu karawi b̄une ede.
Do'a jamu Ruma
11:17-34
17 Ade atoran-atoran ma wara ta awa ake, nahu wati loaku roi nggomid̄oho, b̄ara d̄i ade sanikina ka^borokai weki nggomid̄oho wati kamaimu ma taho, pala makamaiku lampa rawi ma da^bae. 18 Saramba-rambakaina nahu ringaku b̄a one ade edakai angi menamu wara kalompo-kalompo ma wati ncihi ncao. Ro iu b̄a nahu haba ede napodaku. 19 Wara romo mbi'a ro ncengga d̄i ade weki nggomid̄oho, loakud̄u tadana peade cou d̄i ade weki nggomid̄oho ela Al Masih masapodakaina. 20 Pala wakatu nggomid̄oho ka^boromu weki, ra karawi b̄a nggomid̄oho ede laina do'a jamu Ruma. 21 B̄ara wakatu nggomid̄oho wunga ngahamu, nggomid̄oho macua lepiku weha ngaha d̄i ru'u b̄a ndaimu, sampe wara ma wati raka au-au, pala ma kalai nangaha sampe mawuna. 22 ^Ba^bauku ndedekaina? Sab̄ua nggomid̄oho wati ntaumu uma ndaimu? Nggomid̄oho maloa ngaha ro nono d̄i uma ndaimu ede! Atao nggomid̄oho mane'eku kab̄awa ro katuna ela Allah Ta'ala ro mane'e kamaja dou-dou mancoki mori? Auku d̄ipab̄ua nggahi b̄a nahu d̄i nggomid̄oho? Sab̄ua pab̄uaku nahu roiku nggomid̄oho? Wati! Sakali-kali nahu wati ^dimaroi nggomid̄oho.
23 B̄a one au ra tei b̄a nahu d̄i nggomid̄oho, ede ra tarima b̄a nahu d̄i ndai Ruma: d̄i ai manga^di ede wakatu Ruma Isa, Ruma ndaita d̄onggo d̄i dou-dou ma musu-Na, Sia wehana roti, 24 ro sawa'u b̄a Sia rentana syuku d̄i Allah Ta'ala, Sia to^be-to^bena roti ede kai rima-Na, edempara nggahina, <<Akeku sarumbu Nahu ra d̄onggo d̄i ru'u b̄a nggomid̄oho.Karawipu ake d̄i kawarakaimu Nahu.>> 25 Ndede rauku Sia wehana gla sawa'u b̄a ngaha, edempara nggahina, <<Anggo ake eded̄u tanda sake Allah Ta'ala ma b̄ou, rakasaha kai ra'a Nahu. Sanikina nggomid̄oho nonomu anggo ake, karawipu ake d̄i kawarakaimu Nahu.>> 26 Ncihi romo sanikina nggomid̄oho ngahamu roti ro nonomu anggo ake, nggomid̄oho ma ngoa ro kahabaku madekai Ruma, sampe Sia mai mbalina.
27 B̄ara ndedena, dou ma ngaha roti Ruma atao manono anggo Ruma kai cara ma wati patu, dou ede nadosa d̄i Ruma ma wa'ura koroba sarumbu ro ra'a-Na. 28 Ndad̄i, sanikina dou pab̄uaku paresa weki ndai wa'una, ede ampona loa ngaha roti ro nono anggo ede. 29 B̄a one cou-cou ma ngaha ro nono do'a jamu kai wati mangakuna sarumbu Ruma, sia nakamaiku hukuman d̄i ru'u b̄a weki ndaina. 30 B̄ara ndedena mboto d̄i ade weki nggomid̄oho ma supu ro marome, ro wara rau ma made. 31 Pala nggara paresa wa'usi b̄a ndai weki ndaita, ndai wati d̄ihukum b̄a Allah Ta'ala. 32 Pala nggara ndai nahukumsi b̄a Allah Ta'ala, Sia ^dimacambona ndaita, loakud̄u ndai wati b̄oha b̄a hukuman sama-sama lab̄o dunia ake.
33 B̄ara ndedena, cina ro angiku, nggara nggomid̄oho makab̄orosi wekimu ne'e ngaha wakatu do'a jamu Ruma, nggomid̄oho pab̄uapu cua ngena angi. 34 Nggara nawarasi ma hi^do, sia pab̄uaku ngaha wa'una d̄i umana. Kai ndedena d̄i saniki edakai angi sambea ro ibadamu, wati ^dimakamaina hukuman Allah Ta'ala d̄i ru'u b̄a ndai nggomid̄oho.Mab̄oha masa'ala-masa'ala ma kalai, nahu ^dimangoa kab̄ae nggomid̄oho, nggara maisi nahu peade.