Ngoa ro kawara mab̄oha berhala
10:1–11:1
10
Cina ro angi! D̄i ne'e b̄a nahu loakud̄u nggomid̄oho pab̄uapu kawaramu au ma wa'ura ndad̄i d̄i wa'i ro waro ndai aipu siad̄oho b̄atuna la Musa. Siad̄oho sara'a rakanggawo b̄a apu, ro kai salama sapana Moti Teberau. 2 D̄i mandad̄i dou-dou ma b̄atu la Musa, siad̄oho sara'a wa'ura kandeu raso d̄i ade apu ro d̄i ade moti ede. 3 Siad̄oho sara'a ngahana, ngaha ro nono rohani ma sama, 4 ro nanono, nono rohani ma sama, b̄ara siad̄oho nanono ra d̄i wadu doro rohani ma lab̄ona sia^doho; doro wadu ede eded̄u ndai Al Masih. 5 Kone ade ndedekaina, mboto d̄i ade weki siad̄oho ra wati ca'u b̄a Allah Ta'ala, ro b̄ara ndedena Allah Ta'ala hadena siad̄oho sarundena aka so sarae.6 Sara'ana ede d̄imandad̄i conto d̄i ru'u b̄a ndaita, ^dimakawarana ndai loakud̄u aina ne'emu lampa rawi-lampa rawi ma dab̄ae b̄une siad̄oho. 7 Ro loakud̄u ndai aina nemba berhala b̄une ra karawi b̄a sarunde dou d̄i ade weki siad̄oho.Ade Kitab Suci wara ratunti, <<Ndad̄i bangsa ede natampu'ura ngaha ro nono, ro tari d̄inembakaina berhala.>> 8 Ndai wati loata karawi ma sampu ro nggele b̄une ra karawi b̄a sarunde dou d̄i ade weki siad̄oho.B̄ara d̄ua mpuru tolu riwu dou ade weki siad̄oho made ade sanai b̄ara karawina ede. 9 Ndai wati loata coba Rumal b̄une ra karawi b̄a sarunde dou d̄i ade weki siad̄oho ntoina, ndad̄ina siad̄oho made b̄ara noto b̄a sawa mawari. 10 Ndai wati loa rauta badare^de, b̄une ra karawi b̄a sarunde dou d̄i ade weki siad̄oho ntoina, ndad̄ina siad̄oho hade b̄a Mala'eka mataki hinti nawa dou.
11 Sara'a lampa rawi ede ndad̄ina d̄i siad̄oho d̄imandad̄i conto d̄i ru'u b̄a dou-dou makalai. Ro sara'ana ede ratunti rau ^dimangoa ro kawarana ndai. B̄ara ndai ake mori d̄i wakatu cumpukai jaman.
12 Cou-cou ma kacai b̄a one sia naloa ki^di kante'e, sia ede aina kabare loakud̄u aina ma^buna! 13 Sanikina coba'an ra'iu b̄a nggomid̄oho eded̄u coba'an ra nginakai ^di'iu b̄a manusia. Pala Allah Ta'ala nato'a d̄i au ra sake-Na b̄ara ndedena Allah Ta'ala wati co'ona nggomid̄oho b̄oha b̄a coba'an ma kalalo tenggomu. Wakatu nggomid̄oho hina b̄a coba'an, Sia d̄imambei nggomid̄oho tenggo ro wale, ndad̄ina nggomid̄oho maloaku tenggo d̄i ade coba'an ede.
14 B̄ara ndedena, cina ro angi ra meci ro ca'u b̄a nahu, pab̄uapu nggomid̄oho kad̄o'omu weki d̄i berhala. 15 Nahu nuntu ro nggahiku d̄i nggomid̄oho b̄une d̄i ru'u b̄a dou-dou ma loa timba ro lemba. Pab̄uapu nggomid̄oho ka'ao b̄a ndaimu au ra nggahi b̄a nahu ake. 16 D̄i wakatu ndai nono anggo kai renta syuku d̄i Allah Ta'ala, sab̄ua laina ede nakatadaku b̄a one ndai sab̄ua lab̄o mboho ra'a Al Masih? Ro wakatu ndai cengga-cenggata roti ^dingaha sama-sama, sab̄ua laina ede nakatadaku b̄a one ndai sab̄ua lab̄o sarumbu Al Masih? 17 B̄a one wara sab̄ua mpa roti, ndad̄i ndai konena mboto, eded̄u sab̄ua mpa sarumbu, b̄ara ndai ngahata roti ma sab̄ua ede.
18 Tio kab̄aepu dou-dou Yahudi, siad̄oho ma ngaha, ngaha ro nono ra^donggo ro mbei ese wawo mezba, eded̄u dou-dou ma sab̄ua lab̄o mezba ede. 19 Auku aona nggahi nahu ede? Berhala atao ngaha ro nono ra^donggo d̄i ru'u b̄a berhala ede, sara'ana wati wara ao ro onena. 20 Au ra d̄onggo ro mbei d̄i mezba d̄i ru'u b̄a berhala wati ^di^donggo ro mbei d̄i ru'u b̄a Allah Ta'ala, malaisi d̄i ru'u b̄a roh-roh setan. Ro nahu wati ne'eku nggomid̄oho kasab̄ua weki lab̄o roh setan. 21 Nggomid̄oho wati loamu nono ra d̄i gla anggo Ruma, ro ra d̄i gla anggo roh setan rau. Nggomid̄oho wati loamu ngaha d̄i meja Ruma, ro d̄i meja roh setan rau. 22 Atao ndai ne'eta kandad̄i Ruma ndad̄i wu'u? Sab̄ua ndai ncewi tenggo ntewikaisi Ruma?
23 Nggahi dou, <<Ndai taloaku karawi au-au ra kane'ekai b̄a ndai.>> Ncihi romo! Pala wati sara'a au ra kane'ekai b̄a ndai ede wara onena. <<Ndai taloaku karawi au-au rakane'ekai b̄a ndai>> – pala wati sara'a au ra kane'ekai b̄a ndai ede nakatu'uku mori ro woko ndaita. 24 Aina kone sab̄ua dou rau ma mpou kapoda ru'u d̄iparalu b̄a ndai mpoana. Sanikina dou pab̄uaku mpouna d̄i ru'u b̄a dou makalai rau.
25 Nggomid̄oho maloaku ngaha au-au ra landa d̄i amba uta hi'i. Aina palinga ulumu, loakud̄u aina wara makatanina d̄ei ade mpidamu. 26 B̄ara ade Kitab Suci wara ratunti, <<Dunia ake lab̄o samenana isina eded̄u ntau Ruma.>>
27 Nggara nggomid̄oho na'undasi ngaha b̄a dou ma laina ela Al Masih, ro nggomid̄oho tarimamu ra'unda ede, ngahapu au ra sadiana d̄i ru'umu. Aina paresamu ramaina ta b̄e ngaha ro nono ede, loakud̄u aina wara makatanina d̄ei ade mpidamu. 28 Pala nawarasi ma nggahi d̄i nggomid̄oho, <<Ngaha ro nono ake wa'ura d̄onggo ro mbei d̄i berhala,>> aina ngahamu ngaha ro nono ede, b̄ara lampa rawi ede wa'ura ngoana d̄i nggomid̄oho ro b̄ara eli ade mpida. 29 Aona nggahi nahu laina eli ade mpida nggomid̄oho, pala eli ade mpida dou ede.
Kombisi wara ma so^di, <<Io, b̄ab̄auku au ra ne'e b̄a nahu pab̄ua ^dikahampa b̄a eli ade mpida dou makalai? 30 Nggara nahu kangahasi ngaha ro nono kai rentaku syuku d̄i Allah Ta'ala, b̄ab̄auku dou nuntu ka'ihakaina nahu b̄ara ngaha ro nono ede, sapodakaina nahu wa'ura rentaku syuku d̄i Allah Ta'ala?>>
31 Au-au rau ra karawi b̄a nggomid̄oho – nataho nggomid̄oho ngaha atao nonomu – karawi sara'apu ede d̄i kad̄ese ro kantasakaimu Allah Ta'ala. 32 Nggomid̄oho pab̄uapu mori kai wati kandad̄imu dou makalai karawi dosa; nataho siad̄oho dou Yahudi atao dou laina Yahudi atao ela Allah Ta'ala. 33 Moripu b̄une nahu. Nahu ka'usahaku kasana wea ade samenana dou ade sara'a lampa rawi, kai wati wara ne'e b̄a nahu kapenti d̄i ru'u b̄a weki ndai. D̄i ne'e b̄a nahu loakud̄u siad̄oho sara'ana loa ^dikasalama.