Hak-hak ro d̄ipab̄ua karawi b̄a rasul
9:1-27
9
Sab̄ua laina nahu ake dou mahori weki? Sab̄ua nahu ake laina rasul? Sab̄ua nahu watipu parana edaku Isa, Ruma ndaita? Sab̄ua nggomid̄oho laina hasi rakarawi nahu d̄i ru'u b̄a Ruma? 2 Kone dou-dou makalai ma nggahi b̄a one nahu laina rasul, pala nggomid̄oho manggahi b̄a one nahu rasul. B̄a one morimu kai dou ela Al Masih eded̄u bukuti b̄a one nahu rasul.3 Nggara dou narojosi nahu, nahu d̄imacambe ndakena: 4 Sab̄ua nahu wati ntauku hak d̄imatarima ngaha ro nono? 5 Sab̄ua nahu wati ntauku hak d̄imawa'a wei ma imbi d̄i Al Masih ade lampa ro laokai nahu, b̄une ra karawi b̄a cina ro angi Ruma Isa, rasul-rasul makalaina ro la Petrus rau? 6 Atao la Barnabas lab̄o nahu mpa ma pab̄ua ngupa ndai ngaha ro nono? 7 Wati wara anggota tentara ma pab̄ua cola b̄a ndaina ade lao lewa ro lakakaina! Wati wara dou makanggihi ma nggud̄a anggo d̄i nggarona edempara wati ngahana hasi anggo d̄i nggarona ede! Wati wara dou ma ompukai jimba ma ntadi jimba, edempara wati nonona susu ra d̄i jimba-jimbana ede!
8 Au ra nggahi b̄a nahu ede laina fiki ro kananu manusia mpoa, pala wara rau ra tunti d̄i ade Hukum Taurat. 9 B̄a one ade Kitab Taurat wara ratunti: <<Capi ma wunga tonda-tonda gandum d̄ikahorokai isina, aina pulamu asana.>> Sab̄ua capi ^ditio b̄a Allah Ta'ala? 10 Atao ra nggahi b̄a Allah Ta'ala ede eded̄u ndai? Io romo ede ra tunti d̄i ru'u b̄a ndai. B̄a one dou ma karawi oma ro dou ma karaso gandum wa'ura patu romo d̄imakarawi kai ne'ena tarima sarundena ra d̄i hasi karawina. 11 Nami wa'ura parimu d̄ei rohani d̄i ade mori nggomid̄oho, sab̄ua na'ipi ncewi lalo nggara nami ma weha hasi d̄i nggomid̄oho b̄une ranginakai d̄i dunia? 12 Nggara dou-dou makalai nantau hak weha d̄ine'ena d̄i nggomid̄oho, sab̄ua nami wati ncewi ntaumu hak ntewikaisi lab̄o siad̄oho?
Pala nami watipu kanimu hak ede. Nami ma su'u ro tunduna sara'a au-au, loakud̄u nami aina kamaimu lampa rawi ma tapamu ade ngoa ro kahabakai Injil mab̄oha Al Masih. 13 Nggomid̄oho tantu mab̄adeku b̄a one dou ma karawi ade Bait Allah natarima ngaha ro nono d̄i Bait Allah. Ro dou-dou ma taki kab̄ua hid̄i d̄onggo ro mbeikai koroba, naraka sarundena d̄i koroba ra d̄onggo ro mbei ta ede. 14 Ndede rau Ruma wa'ura katantuna b̄a one dou ma ngoa ro kahaba Injil ede pab̄uaku rakana ngaha ro nono d̄i hasi ngoa ro kahabakaina ede.
15 Pala nahu watipu parana kaniku kone sab̄ua rau d̄i hak-hak ede. Ro nahu tuntiku sura ake lai rauna loakud̄u lampa rawi-lampa rawi ede d̄ikarawi ake d̄i ru'u b̄a nahu. Nancewi tahopu madeku, nggara namborasi lampa rawi d̄ibanggakai b̄a nahu ede. 16 B̄a one nggara nahu kangoa ro kahabasi Injil, nahu wati ntauku alasan d̄ika'esekaiku weki. B̄a one ede d̄ipab̄ua karawi b̄a nahu. Ihara nahu, nggara nahu watisi ngoa ro kahabaku Injil! 17 Misampara nahu karawiku kai au ra kane'ekai b̄a weki ndaiku, ndad̄i nahu kantau hak d̄imatarima ufa. Pala b̄ara nahu karawiku laina b̄ara au ra kane'ekai b̄a ndaiku, ngoa ro kahaba ede eded̄u taki d̄ipab̄ua su'u ro tundu b̄a nahu ra mbei b̄a Allah Ta'ala. 18 Nggara ndedesi, auku ufa d̄i ru'u b̄a nahu? Ufa d̄i ru'u b̄a nahu eded̄u: b̄a one nahu loa ngoa ro kahaba Injil kai wati kasusaku dou d̄imambei ufa d̄i nahu, b̄a one nahu wati kaniku hak kai dou ma ngoa ro kahaba Injil ede.
19 Nahu ake laina ada cou-cou rau; nahu eded̄u dou ma hori weki. Konena ndede, nahu wa'ura kandad̄iku weki ndaiku ada d̄i ru'u b̄a samenana dou. Nahu karawiku ede loakud̄u raka mboto dou ndad̄i imbi d̄i Al Masih. 20 D̄i ru'u b̄a dou Yahudi, nahu ndad̄i b̄une dou Yahudi loakud̄u nahu loa wa'a dou Yahudi d̄i ru'u b̄a Al Masih. D̄i ru'u b̄a dou-dou ma mori b̄atu hukum Musa, nahu karawiku b̄une-b̄une nahu mamori b̄atu hukum ede, kone sapodakaina nahu wati d̄iki b̄a hukum ede. Nahu morikaiku b̄une ede loakud̄u nahu wa'a siad̄oho ndad̄i ela Al Masih. 21 D̄i ru'u b̄a dou ma laina Yahudi, nahu ndad̄i b̄une sab̄ua dou ma laina Yahudi, ma mori ari mai b̄a hukum Musa. Nahu karawiku ede loakud̄u loa wa'a b̄a nahu siad̄oho ndad̄i ela Al Masih. Pala ede laina aona nahu wati to'aku d̄i parenta-parenta Allah Ta'ala; nahu kuasakai b̄a parenta-parenta Al Masih. 22 D̄i ru'u b̄a dou-dou ma watipu tenggo imbina, nahu kandad̄i b̄une dou ma wati tenggo imbi, loakud̄u nahu loa kasalama siad̄oho ma watipu tenggo imbina ede. D̄i ru'u b̄a sara'a dou nahu wa'ura ndad̄i b̄une siad̄oho sara'ana ede, loakud̄u nahu loa kasalama pila-pila dou d̄i ade weki siad̄oho.
23 Sara'a au ra karawi b̄a nahu ede d̄i ru'u b̄a Injil, loakud̄u nahu rakaku bareka ade ngoa ro kahabakaiku Injil ede. 24 Nggomid̄oho tantu mab̄adeku b̄a one d̄i ade taji rai, samenana weki b̄atu rai, pala sab̄ua dou mpa ma tarima hadia. B̄ara ndedena rai ka'ipipu ndad̄ina nggomid̄oho marakaku hadiana. 25 Sanikina dou ma b̄atu taji rai, napi'iku adena d̄i samenana lampa rawi. Siad̄oho karawi ndedekaina ^diloakaina raka hadia ma wati loa iha, pala ndai ^diloakaita raka hadia ma ede ro hi^di. 26 B̄ara ndedena nahu raiku kai wara ^dine'eku. ^Bune ade taji tinju, nahu wati turu jaguku. 27 Nahu kaco'o mpa sarumbuku ^ditei kai toku sampe nahu loa podaku. Nahu karawi ndedekaiku, b̄ara nahu wati ne'eku sampe ndad̄ina b̄a one sawa'u b̄a nahu receku dou makalai b̄atu taji rai ede, ndai nahu ^ditula.