Mab̄oha d̄onggo ro mbei d̄i berhala
8:1-13
8
Ake mab̄oha ngaha ro nono ra wa'ura d̄onggo ro mbei d̄i berhala. Ncihi romo b̄une ra nggahi b̄a dou, <<Ndai sara'a wa'ura loa.>> Pala loa ro b̄ade nakamaiku dou ndad̄i sombo, pala meci ro ca'u nakatenggoku ade dou. 2 Dou ma kacai b̄a one sia mboto ^badena, sapodakaina watipu poda-poda d̄ei ^badena. 3 Pala dou ma poda-poda meci ro ca'u Allah Ta'ala, dou ede napataku Allah Ta'ala.4 Mab̄oha masa'ala ngaha ro nono ra wa'u d̄onggo ro mbei d̄i berhala, ndai ta^badeku b̄a one wati wara kone sab̄ua rau berhala ma mori. Ro ndai tab̄aderauku b̄a one Allah Ta'ala sab̄ua mpa; wati wara ma kalai. 5 Mboto romo ratangara rau kai berhala ro ruma; nataho ma wara ese langi ro ma wara ese wawo dunia. 6 Pala d̄i ru'u b̄a ndai, Allah Ta'ala sab̄ua mpa. Sia Ama ma rakandad̄ina samenana ma wara. D̄i ru'u b̄a Sia mpa ndai mori. Ro Ruma sab̄ua rau mpa, eded̄u Isa Al Masih. Kai ncai Sia samenana ra kandad̄i, ro b̄ara Sia ndad̄i ndai loa mori.
7 Kone ade ndedekaina, wati sara'a dou mab̄adena lampa rawi ede. Wara ma ntoina ma ngina nemba berhala. Ndad̄i, b̄ara ndedena saraka ake rau siad̄oho mbuipu iuna b̄a one ngaha ro nono, ra wa'u d̄onggo ro mbei d̄i ru'u b̄a berhala, eded̄u ngaha ro nono berhala. Ndad̄i nggara ngahasi b̄a siad̄oho ngaha ro nono ede, siad̄oho na'iu weki dosa; b̄ara imbi siad̄oho watipu tenggona. 8 Sapodakaina ngaha ro nono wati lao wa'ana ndai naha rapu lab̄o Allah Ta'ala. Ndai wati rugita au-au, nggara watisi ngaha b̄a ndai ro nggara ngahasi b̄a ndai, ndai wati raka au-au.
9 Pala, aina kabare! Ai to'ina dou makalai ma watipu tenggo imbina ndad̄i dosa b̄ara edana nggomid̄oho ma ngaha b̄e raca'u ndaimu. 10 Nggahi nahu ake aona: Nggara nggomid̄oho, ma ntausi imbi ma tenggo poda, ma wunga doho ngaha aka uma berhala, edempara sab̄ua dou ma'eda nggomid̄oho madoho ngaha ta ede. Nggara imbi dou ede watisi tenggona, lampa rawi ede nakamaiku dou ede disa ngaha, ngaha ro nono ra wa'u d̄onggo d̄i ru'u b̄a berhala ede. 11 Ro b̄ara ndedena, ndad̄i imbi nggomid̄oho nakandad̄iku dou ma watipu tenggo imbi ede ndad̄i santuda. Sapodakaina Al Masih madena d̄i ru'u b̄a dou ede rau. 12 Ro nggara nggomid̄oho makarawisi mancara b̄une ede d̄i ru'u b̄a cina ro angi ela Al Masih – ede aona nggomid̄oho maka'ihaku imbi siad̄oho ma kura tenggo – ndad̄i nggomid̄oho mandad̄i dosa d̄i Al Masih. 13 B̄ara ndedena, nggara ngaha ro nono ma rakamaina cina nahu ndad̄i dosa, ndad̄i nahu wati poda d̄imangaha hi'i wali. Aito'ina b̄ara nahu, cina nahu ede ndad̄i dosa.