Mab̄oha nika ro neku
7:1-16
7
Ake nahu kane'e nuntu mab̄oha masa'ala ade sura ra tunti b̄a nggomid̄oho d̄i ru'u b̄a nahu. Sab̄ua dou mone nggara watisi nikana, ede taho.e 2 Pala loakud̄u wati b̄oha b̄a goda'an d̄ikarawikai lampa rawi ma sampu ro nggele, satahona sanikina dou mone pab̄uaku ntauna wei ndaina ro sanikina dou siwe pab̄uaku ntauna rahi ndaina. 3 Rahi pab̄uaku kancihina au d̄iparalu b̄a weina, ro wei pab̄uaku kancihina au d̄iparalu b̄a rahina. 4 Wei wati ntauna kuasa d̄i sarumbu ndaina; ma ntau kuasa d̄i sarumbuna eded̄u rahina. Ndede rau rahi wati ntauna kuasa d̄i sarumbu ndaina; ma ntau kuasa d̄i sarumbuna eded̄u weina. 5 Aina kad̄o'omu weki sab̄ua lab̄o sab̄ua dou sacara rahi lab̄o wei. D̄i ru'u b̄a samporo wakatu loa, sura d̄uana ede wa'ura mafaka samana. Kai ndedena cua-cua loa do'a kai wati wara ma hako. Pala sawa'u b̄a ede, pab̄uapu nggomid̄oho mbali d̄i rahi ro weimu. Nggara watisi ndedena, pea nggomid̄oho mab̄atuku au ra goda b̄a roh setan, b̄ara nggomid̄oho wati wa'umu taha ro tapa nawasu.6 Nahu nggahiku ake laina parentaku nggomid̄oho, pala nahu mangoa ro tei kataho. 7 Sapodakaina nahu kancewi ca'upu nggara sara'a dou ndad̄i b̄une nahu. Pala cua-cua wa'ura tarimana rambei b̄a Allah Ta'ala. Sab̄ua dou mantau loa ro b̄ade ra mbei ake, ma kalai nantau loa ro b̄ade ede.
8 D̄i ru'u b̄a dou mone ma watipu nika ro d̄i ru'u b̄a dou siwe ma wa'ura mbaru mboha, akeku ngoa ro tei b̄a nahu: Nancewi tahopu nggomid̄oho ngge'e mpa mori kesemu b̄une nahu. 9 Pala nggara nggomid̄oho watisi wa'umu tapa nawasu, nggomid̄oho natahopu nikamu. Loakud̄u nggomid̄oho aina kuasa ncaukai b̄a nawasu nggara watisi wa'umu tapa ro taha nawasu. 10 D̄i ru'u b̄a siad̄oho ma wa'ura nika, akeku parenta b̄a nahu: (Sapodakaina laina nahu ma mbei parenta ake, pala Ruma.) Sab̄ua dou siwe ma wa'ura nika aina tu'u wi'i rahina. 11 Pala nggara wa'usi ratu'u wi'i b̄a sia rahina, sia pab̄uaku wati ntauna rahi wali, atao mbali d̄i rahina. Ro rahi wati loana wi'i weina.
12 D̄i ru'u b̄a dou-dou ma kalaina, nahu ma ngoa ro teina eded̄u: – ake ngoa ro tei b̄a ndai nahu, laina Ruma – sab̄ua dou ela Al Masih nggara nanikasi lab̄o sab̄ua dou siwe ma wati imbi d̄i Al Masih, ro weina ede nangawa mori sama lab̄o sia, dou ede wati loana wi'i weina ede. 13 Ro nggara nawarasi sab̄ua dou siwe ma nika lab̄o sab̄ua dou mone ma wati imbi d̄i Al Masih, ro dou mone ede nangawa mori sama lab̄o sia, ndad̄i dou siwe ede wati loana wi'i rahina ede. 14 B̄ara dou mone ma wati imbi d̄i Al Masih ede nakarasoku b̄a weina ede. Ndede rau lab̄o dou siwe ma wati imbi d̄i Al Masih nakarasoku b̄a rahina. Nggara watisi ndedena, imbipu anad̄ohona eded̄u ana-ana haram, pala ake siad̄oho eded̄u ana-ana ma wa'ura raso! 15 Pala nggara dou ma wati imbi ede nawi'isi weina atao rahina ma imbi d̄i Al Masih, aina tapamu sia. Ade lampa rawi ake nggomid̄oho wa'ura hori weki, b̄ara d̄i ne'e b̄a Allah Ta'ala loakud̄u nggomid̄oho mori kai taho-taho. 16 B̄ara dou siwe ma wa'ura nika – ma wa'ura imbi d̄i Ruma – b̄uneku loakaimu b̄ade tantu b̄a one nggomi wati loamu kasalamaf rahimu? Ndede rau dou mone ma wa'ura nika ma imbi d̄i Al Masih, b̄uneku loakaimu b̄ade tantu b̄a one nggomi wati loamu kasalama weimu?
Moripu b̄une nggomi ra d̄anda ro wa'a b̄a Ruma
7:17-24
17 Pab̄uapu cua-cua dou atona mori ro woko ndaina b̄une ra kane'ekai b̄a Ruma ra katantu b̄a Allah Ta'ala d̄i ru'una wakatu Allah Ta'ala ouna sia ndad̄i imbi d̄i Allah Ta'ala. Edeku atoran ra ngoa ro tei b̄a nahu d̄i sanikina ela Ruma. 18 Misampara, nggara sab̄ua dou wa'ura suna aipu wakatu sia tarimana ou b̄a Allah Ta'ala, ndad̄i aina dou ede ne'ena kambora tanda-tanda suna ede. Ndede rau nggara sab̄ua dou watipu rasuna wakatu sia ou b̄a Allah Ta'ala, aina rahona loakud̄u sia ede ^disuna. 19 B̄a one b̄atu atoran suna atao wati, d̄ua mbua lampa rawi ede sama mpa wati ntauna ao au-au. Ma penti eded̄u b̄atu parenta-parenta Allah Ta'ala. 20 Pab̄uaku sanikina dou ngge'e mpa mori ade ka'ada'an b̄une aipu sia ou b̄a Allah Ta'ala. 21 Nggara nggomi imbimu d̄i Al Masih wakatu nggomi ndad̄imu ada dou, nggomi aina kasusamu weki mab̄oha lampa rawi ede. Pala nggara warasi wakatu d̄ihorikamu weki, kanipu wakatu ma wara ede.g 22 B̄a one sab̄ua dou ada ma wa'ura imbi d̄i Ruma, eded̄u dou ma hori weki, ndad̄i wa'ura ntau Ruma. Ndede rau dou ma wa'ura hori weki ma wa'ura imbi d̄i Al Masih, eded̄u ada Al Masih. 23 Allah Ta'ala wa'ura welina nggomi ro wa'ura cola kanggorina. B̄ara ndedena, nggomi aina d̄onggomu weki ndad̄i ada manusia. 24 Ndad̄i cina ro angi, kone b̄une b̄e rau ka'ada'an nggomi wakatu saramba imbimu d̄i Allah Ta'ala, nggomi pab̄uapu ngge'e mpa morimu b̄une ede lab̄o Allah Ta'ala.
Mab̄oha dou-dou siwe sampela ro mab̄oha dou-dou siwe mbaru mboha
7:25-40
25 Ake mab̄oha dou-dou ma watipu nika. Mab̄oha lampa rawi ede, nahu wati tarimaku parenta au-au ra d̄i Ruma. Pala kai dou ma loa d̄i'imbikai b̄ara rahmat Allah, nahu kane'e ngoa ro tei.
26 Kawarasi mab̄oha samenana susa ake, nahu manggahi natahopu dou ngge'e mpa kalampana mori b̄une ka'ada'an wakatu ake. 27 Nggara nggomi mawa'usi rantau wei, aina ne'emu wi'i weimu ede. Nggara nggomi watipusi ntaumu wei aina ngupa wei. 28 Pala nggara nggomi manikasi, ede laina dosa. Ndede rau nggara sab̄ua dou siwe sampela nanikasi, aona sia wati karawina dosa. Pala siad̄oho ma nika ede d̄ima'iu mboto susa. Ro d̄i ne'e b̄a nahu loakud̄u nggomid̄oho d̄o'o lab̄o susa ede.
29 Ndakeku aona nggahi nahu ake, cina ro angi: Ndai watid̄u wara wakatu ma mboto wali. Tampu'u ake, sanikina dou ma wa'ura ntau wei aina kananu ncau weina; 30 dou ma nangi, aina ncoki ncau ade; dou ma hari, aina kad̄ihi ncau ade; dou ma wa'ura weli au-au, aina kananu ncau au-au ra welina ede; 31 porona, dou-dou ma kani barang-barang dunia, aina karepo weki lab̄o lampa rawi ede. B̄ara dunia ra pata b̄a ndai ake ^dimambora!
32 D̄i ne'e b̄a nahu loakud̄u nggomid̄oho hori weki ra d̄i susa ro ncoki. Dou ma wati ntau wei nakasab̄ua mpa fiki ro kananuna d̄i lampa rawi mab̄oha Ruma, b̄ara sia nane'eku kasana ade Ruma. 33 Pala dou ma wa'ura ntau wei d̄imamboto fiki ro kananu lampa rawi dunia ake, b̄ara sia nane'eku kasana wea ade weina; 34 ndad̄ikaina fiki ro kananuna wa'ura ncengga-ncengga. Sab̄ua dou siwe ma wati ntau rahi, atao sab̄ua dou siwe sampela, d̄imamboto fiki ro kananu d̄i lampa rawi mab̄oha Ruma, b̄ara sia nane'eku sarumbu ro nawana ndad̄i ntau Allah Ta'ala. Pala sab̄ua dou siwe ma wa'ura ntau rahi, nakasa^buaku fiki ro kananuna d̄i lampa rawi dunia ake, b̄ara sia nane'e kasana wea ade rahina.
35 Nahu tuntikaiku samenana ede d̄itahokai ndai nggomid̄oho, laina b̄a ne'eku kanta ede ro ake. D̄i ne'e b̄a nahu loakud̄u nggomid̄oho karawipu ma poda ro ma patu mpa, ro loakud̄u nggomid̄oho kasab̄uamu fiki ro kananumu d̄i Ruma.
36 Nggara sab̄ua dou iuna weki wati kalampana ma patu ro ambi d̄i ru'u b̄a dou sod̄ina, nggara sia watisi wa'una tapa nawasuna, ro sia iuna pab̄uaku nika lab̄o dou sampela siwe ede, co'opu sia karawina au d̄iwi'ikai b̄a sia taho.h Sia wati dosana, nggara siad̄oho nanikasi. 37 Pala nggara dou nawa'usi rawehana nggahi d̄ei adena, b̄a one sia wati d̄imanika lab̄o dou so^dinai ro au ra nggahina ede wati kai rapakasa, ndad̄i au ra karawina ede taho, sura sia tenggona karawi ede. 38 Ndad̄i, dou ma nikaj lab̄o dou sod̄ina, sia nakarawiku ma taho, ro dou ma wati nikak lab̄o dou sod̄ina nakarawi ma ncewi taho wali.
39 Sab̄ua dou siwe ma wa'ura nika lab̄o dou mone nad̄ikiku b̄a nika ede santoi mori rahina. Nggara wa'usi ramade rahina, dou siwe ede naloa nika wali lab̄o dou raca'una; sura dou mone ede ela Al Masih. 40 Pala nancewi tahopu nggara sia watisi nika walina, ake ranggahi b̄a ndai nahu. Ro au ra nggahi b̄a nahu ede eded̄u kai kuasa Roh Allah.