Da'awa cina ro angi aka pangadilan
6:1-11
6
Sab̄ua wara dou d̄i ade weki nggomid̄oho, nggara nacence ncihisi lab̄o dou makalai, sab̄ua nadisa lao da'awa dou ra cence ncihi lab̄ona ede aka hakim ma wati pata Allah Ta'ala? Ro b̄ab̄auku sia wati rahokaina bantu d̄i ela Allah Ta'ala d̄imakanggori weana parakarana ede? 2 Sab̄ua wati b̄ade b̄a nggomid̄oho b̄a one ela Allah Ta'ala d̄imaparesa ncihi ro ncara dunia ake? Ndad̄i, nggara nggomid̄oho d̄imaparesa ncihi ro ncara dunia ake, sab̄ua nggomid̄oho wati wa'umu kanggori parakara-parakara pengadilan ma wati wara onena? 3 Sab̄ua wati b̄ade b̄a nggomid̄oho b̄a one ndai d̄imaparesa ncihi ro ncara mala'eka-mala'eka? Au walipu masa'ala-masa'ala ma wara d̄i ade mori ro woko ndai sanai-nai! 4 Ndad̄i nggara wontusi masa'ala-masa'ala b̄une ede, sab̄ua nggomid̄oho ma lao wa'aku masa'ala-masa'ala ede d̄i siad̄oho ma wati wara b̄ora ede d̄i ade ela Ruma? 5 Nahu manggahi b̄a one lampa rawi ede ^dimakamaja nggomid̄oho mpa. Sab̄ua wati wara dou d̄i ade weki nggomid̄oho ma loa timba ro lemba, ma loa kanggori masa'ala-masa'ala cina ro angina? 6 Sab̄ua wara cina ro angi ma lao kanggori masa'ala cinana ma sama imbi d̄i dou ma laina ela Ruma?7 Ai to'ina lao wa'amu parakara-parakara d̄i dou ma laina ela Al Masih. Wara cence ncihi d̄i ade weki nggomid̄oho ede wa'ura ndad̄i koa d̄i ru'u b̄a nggomid̄oho.Nancewi tahopu karawi b̄a dou ma kalai kai wati adil d̄i nggomid̄oho, atao karugina nggomid̄oho. 8 Pala ndai nggomid̄oho rau ma karawiku ma wati adil d̄i dou makalai. Ndai nggomid̄oho rauku ma karugina dou makalai. Ro ede karawi b̄a nggomid̄oho d̄i cina ro angimu masama imbi! 9 Sab̄ua wati b̄ade b̄a nggomid̄oho b̄a one dou-dou ma wati b̄atu au ra kane'ekai b̄a Allah Ta'ala, wati d̄imandad̄i anggota Karaja'an Allah? Aina b̄ohakai b̄a tipu! Dou-dou ma karawi ma sampu ro nggele, ma nemba berhala, ma jina, dou-dou mone ro siwe ma ca'u karawi d̄imajakai d̄i sama mone atao sama siwena, 10 ma mpanga, ma na'e ade, ma ca'u mawu, ma ca'u nuntu ka'iha dou, ro ma ca'u gisi au ra ntau dou makalai –samenana dou b̄une ede wati d̄imandad̄i anggota Karaja'an Allah. 11 Pila-pila dou d̄i ade weki nggomid̄oho ntoina nakarawiku b̄une ede. Pala ake nggomid̄oho wa'ura raso ra d̄i dosa. Nggomid̄oho wa'ura ndad̄i ntau Allah Ta'ala mpoa mpa. Nggomid̄oho wa'ura taho mbali lab̄o Allah Ta'ala, b̄ara nggomid̄oho imbimu d̄i Ruma Isa Al Masih ro b̄ara kuasa Roh Allah.
Kanipu sarumbumu d̄ikad̄ese ro kantasakai Allah Ta'ala
6:12-20
12 Wara ma nggahi b̄a one sanikina dou naloa karawi ro naloa kalampa au-au. Pala nahu manggahi, wati sara'ana ede wara onena. Ndad̄i konena nahu kaloa karawi au-au, pala nahu wati ne'eku co'o sarumbuku d̄i kuasakai b̄a au-au. 13 Wara rau ma nggahi b̄a one ngaha ro nono eded̄u d̄i ru'u b̄a loko, ro loko rasadia d̄i ru'u b̄a ngaha ro nono. Pala d̄uana ede ^dikaleli b̄a Allah Ta'ala. Sarumbu manusia wati loa ^di^donggo ^dimasampu ro nggele, pala d̄imakarawi wea d̄i ru'u b̄a Ruma mpa. Ro Ruma d̄imajaga ro sandaka sarumbu ede. 14 Allah Ta'ala wa'ura kamori mbalina Ruma Isa ra d̄i madekaina, Sia rau d̄imakamori mbali ndai kai kuasa-Na.
15 Sab̄ua wati b̄ade b̄a nggomid̄oho b̄a one sarumbumu eded̄u anggota sarumbu Al Masih. Ndad̄i, sab̄ua loaku nahu maweha sab̄ua anggota sarumbu Al Masih edempara kandad̄i anggota sarumbu dou masunda? Sakali-kali wati! 16 Atao kombisi nggomid̄oho watipu b̄ademu b̄a one dou ma maru campo lab̄o sab̄ua dou masunda, nandad̄i sab̄ua lab̄o dou masunda ede! B̄a one ade Kitab Suci wara ratunti, <<D̄uana ede nandad̄i sab̄ua.>> 17 Pala dou ma kasab̄ua wekina lab̄o Ruma, Roh Ruma lab̄o roh dou ede nandad̄i sa^bua.
18 Kad̄o'o lab̄opu wekimu lab̄o ruku ro rawi ma sampu ro nggele. B̄a one sara'a dosa makalaina ra karawi b̄a dou, nandad̄i ari mai b̄a sarumbu dou ede. Pala dou ma karawi ma sampu ro nggele, aona dou ede nakarawi dosa d̄i ru'u b̄a sarumbu ndaina. 19 Nggomid̄oho pab̄uapu b̄ademu b̄a one sarumbumu eded̄u hid̄i ngge'ekai Roh Allah. Roh ede nangge'e d̄ei nggomid̄oho.Ro ndai Allah Ta'ala ma mbei Roh ede d̄i nggomid̄oho.Sarumbu nggomid̄oho laina ntau ndaimu. Ede ntau Allah Ta'ala. 20 Allah Ta'ala nawa'ura weli nggomid̄oho ro nawa'ura cola kanggori. B̄ara ndedena kanipu sarumbumu d̄ikad̄ese ro kantasakaimu Allah Ta'ala!