Dosa ela Ruma
5:1-13
5
Nahu sapodakaina wa'ura ringaku nuntu b̄a dou b̄a one ade weki nggomid̄oho wara rawi ma sampu ro nggele ma wa'ura ipi lalo: Wara d̄i ade weki nggomid̄oho ma jina lab̄o ina cempena. Dou-dou ma wati pata Ruma rau wati karawina b̄une ede! 2 Kone ade ndedekaina, nggomid̄oho mbuipu sombomu. Sapodakaina nggomid̄oho pab̄uaku ncoki ade, ro fou kalosa dou ma karawi ma sampu ro nggele d̄i ade woha nggomid̄oho. 3-4 Kai sarumbu kasa nahu d̄o'o lab̄o nggomid̄oho, pala kai sacara rohani, nahu wara d̄i woha nggomid̄oho.Ndad̄i, nahu kane'e karawi b̄une-b̄une nahu wara d̄i woha nggomid̄oho, <<Kai ngara Ruma Isa, nahu makatadana b̄a one dou ma wa'ura karawi ma ipi sampu ro nggele b̄une ede, pab̄uaku ^dihukum!>> Nggara nggomid̄oho makab̄orosi wekimu, wi'ikaipu nahu wara d̄i woha nggomid̄oho, ro kai kuasa Ruma Isa, Ruma ndaita, 5 dou b̄une ede pab̄uaku d̄onggo d̄i Iblis kai ngara Ruma Isa, ndad̄ina sarumbuna naleli, loakud̄u rohna ^dikasalama wakatu Ruma mai mbalina.6 Wati tahona nggomid̄oho kasombo weki. Sab̄ua wati b̄ade b̄a nggomid̄oho b̄a one wara nggahi b̄une ake, <<B̄uha sato'i nakateka sara'aku mub̄u ra ncambu?>> 7 Paki wa'upu b̄uha ma ntoi ede, eded̄u b̄uha dosa, loakud̄u nggomid̄oho ndad̄i b̄une mub̄u ma b̄ou, raso ra d̄i b̄uha dosa ma wa'ura ntoi, ro nahu kab̄adeb̄a one nggomid̄oho poda ndedemu. B̄a one Aruraja Paskah ndai wa'ura sadia, b̄ara Al Masih ma ndad̄i jimba Paskah ndaita, wa'ura ndad̄i koroba. 8 B̄ara ndedena maira ndai tangaha ndihaku, laina kai b̄uha ma dab̄ae, pala kai roti ma wati ra kani b̄uha eded̄u kai ade ma raso.
9 D̄i ade sura nahu ma uluna, nahu ngoaku d̄i nggomid̄oho aina rewomu lab̄o dou masampu ro nggele. 10 Aona nggahi nahu laina dou masampu ro nggele atao mana'e ade, atao matipu atao manemba berhala ma wati poda pata Allah Ta'ala. Laina! Aona nggahi nahu laina b̄une siad̄oho ede; b̄a one nggara nggomid̄oho pab̄uasi kad̄o'omu weki lab̄o siad̄oho, ndad̄i tantu nggomid̄oho paralu losa mpoimu d̄i dunia ake. 11 Pala aona isi sura nahu ede eded̄u, nggomid̄oho aina rewo lab̄omu dou ma mangaku wekina dou ela Al Masih, pala dou ede nasampu ro nggele, atao nana'e ade, atao nembana berhala, atao naca'u nuntu ka'iha dou makalai, atao naca'u mawu, atao nampanga. Kone doho ngaha lab̄omu dou ede ai rauna!
12-13 Poda romo paresa ncihi ro ncara dou ma laina ela Al Masih ede laina urusan nahu. Ndai Allah Ta'ala d̄imaparesa ncihi ro ncara siad̄oho.Pala mab̄oha anggota-anggota nggomid̄oho, sab̄ua laina ndai nggomid̄oho d̄imaparesa ncihi ro ncara siad̄oho? Ade Kitab Suci wara ratunti, <<Katesapu dou madab̄ae d̄i ade woha nggomid̄oho.>>