Sab̄ua mpa hakim eded̄u Ruma
4:1-5
4
Wi'ikaipu nami kai dou-dou makarawi wea d̄i ru'u b̄a Al Masih ma ntau su'u ro tundu mangoa ro kahaba au ra kane'ekai b̄a Allah Ta'ala ma watipu b̄ade b̄a dunia. 2 Ma pab̄ua d̄iraho d̄i dou-dou makarawi wea Ruma b̄une ede eded̄u b̄a one siad̄oho loa d̄i'imbikai. 3 D̄i ru'u b̄a nahu sato'i mpa aona nataho nahu d̄iparesa ncihi ro ncara b̄a nggomid̄oho atao pangadilan manusia. Kone weki ndai nahu rau wati paresaku ncihi ro ncara ndaiku. 4 B̄ara nahu wati iuku ncara ade lampa rawi au-au rau, pala ede laina bukuti b̄a one nahu poda romo wati wara ncaraku. Ndai Rumaku makatantuna nahu ncara atao wati. 5 B̄ara ndedena, watipu raka wakatuna, nggomid̄oho aina roci-roci katantumu b̄a one sab̄ua dou nancara atao wati. Ngenapu sampe maikai Ruma. Siaku d̄imahengga sara'a rahasia ma ili weki d̄ei marindi. Siaku d̄imakatada sara'ana nia ra wi'i d̄ei ade manusia. D̄i wakatu ede ampo sanikina dou tarimana d̄i Allah Ta'ala roi ro wadi mapatu d̄i tarimana.Ka'awapu wekimu
4:6-21
6 Cina ro angi! D̄i ru'u kapentikai nggomid̄oho, ndai nahu lab̄o la Apolos wa'ura kalampa sara'aku ede. Aona loakud̄u d̄i conto rawi nami ede nggomid̄oho maloaku tana'o auku aona nggahi ro eli nahu, <<Nentipu d̄i atoran ma wara.>> Ade ndedekaina wati wara kone sab̄ua dou rau ade weki nggomid̄oho maloa roi ro ka'ese dou, edempara kab̄awa ro katuna ma kalai. 7 B̄a one cou ma wi'ikai nggomi ma ipi penti? Ro au ra ntaumu, ma wati ra tarima d̄i Allah Ta'ala? Ro nggara podasi nggomi ma tarimana, b̄ab̄auku nggomi ka'esekaimu wekimu, b̄une-b̄une nggomi wati tarimamu? 8 Nggomid̄oho wa'ura mbocu, wa'ura ntau ro wara, wa'ura ndad̄i sangaji laina b̄ara bantu b̄a nami. Paina poda lampa rawi ede nda^dina, ndad̄ina nami maloaku ndad̄i sangaji rau sama lab̄o nggomid̄oho. 9 B̄a one nggahi b̄a nahu, Allah Ta'ala mbeina d̄i nami, rasul-rasul, hid̄i ma ipi awa, sama b̄une dou-dou ra b̄ab̄u kai hukuman made, b̄ara nami wa'ura ndad̄i dou-dou ^dintanda b̄a dunia, mala'eka-mala'eka ro b̄a manusia. 10 B̄ara Al Masih, nami eded̄u dou-dou ma sampula, ro nggomid̄oho dou ela Al Masih ma loa! Nami mapu ro rome, nggomid̄oho ma tenggo! Nami ^dikasungge-sungge, ro nggomid̄oho d̄iroi ro hanta! 11 Saraka ake nami wa'ura iumu sarahid̄o ro mango wo'o; kani ro lombo nami ma wara d̄i sarumbu mpoa mpa; dou kancokina nami; nami wati ntaumu hid̄i d̄ingge'e impikaimu; 12 nami karawi kapodamu ade ^dingupakaimu ngaha ro nono. Nggara nami nasumpasi b̄a dou, nami macola cepena kai bareka; nggara nami nakancokisi b̄a dou, nami lembo ademu; 13 nggara dou nanuntu ka'ihasi nami, nami macola cepena kai nggahi ro eli ma ntika. Nami wati ncewi ra d̄i masaki dunia ake; saraka ake nami mbuipu wi'ikai b̄une masaki dunia.
14 Nahu tuntiku ake d̄i nggomid̄oho laina d̄i kamajakai nggomid̄oho, pala d̄i ngoa ro tei katahokaiku nggomid̄oho b̄une ana-ana ndaiku. 15 B̄a one nahuku ma ndad̄i ama b̄a nggomid̄oho, konena kombisi kai ela Al Masih, nggomid̄oho mawa'ura ntau 10.000 guru. D̄i ade morimu kai dou-dou ma wa'ura sab̄ua lab̄o Al Masih, nahu ma ndad̄i ama d̄i ru'u b̄a nggomid̄oho, b̄ara nahu ma rawa'a Injil d̄i ru'u b̄a nggomid̄oho. 16 B̄ara ndedena nahu maraho poda-poda loakud̄u nggomid̄oho ^batumu conto rawi nahu. 17 B̄ara ndedena nahu wa'ura nggaduku la Timotius d̄i nggomid̄oho.Kai dou mab̄atu Al Masih, sia b̄une ana meci ndai nahu. Sia loa d̄i'imbikai. Sia ^dimangoa ro kawarana nggomid̄oho mab̄oha cara mori ra b̄atu b̄a nahu sawa'u b̄a imbiku Al Masih, eded̄u cara mori ra tei b̄a nahu d̄i sanikina ela Ruma ta b̄e-b̄e rau.
18 Pila-pila dou d̄i ade weki nggomid̄oho wa'ura ndad̄i sombo, b̄ara kacai b̄a siad̄oho nahu wati d̄imamai d̄i nggomid̄oho. 19 Pala nggara nakane'esi b̄a Ruma, wati ntoi walina nahu d̄imamai rau d̄i nggomid̄oho.Pea wakatu ede nahu d̄ima'eda rau auku d̄i loa karawi b̄a dou-dou ma sombo ede; laina nuntu ro nggahi siad̄oho mpoa. 20 B̄ara Karaja'an Allah laina nuntu ro nggahi mpoa, pala kai ruku ro rawi. 21 Auku d̄ine'e b̄a nggomid̄oho? Sab̄ua pab̄uaku nahu maiku d̄i nggomid̄oho kai cambo atao kai meci ro ca'u ro kai nggahi ro eli ma mapu?