<<    <     1 Korintus     1     >    >> 
SURA PAULUS MA SARAMBAKAINA
D̄I RU'U B̄A ELA RUMA ^DI
KORINTUS
Salam
1
1-3  Cina ro angi ela Allah Ta'ala d̄i Korintus! Nggomid̄oho wa'ura ou b̄a Allah Ta'ala d̄imandad̄i ela-Na b̄ara nggomid̄oho ntau Isa Al Masih masama-sama lab̄o samenana dou ta b̄e-b̄e rau ma nemba Ruma Isa Al Masih, eded̄u Ruma siad̄oho ro Ruma ndai rau. Nahu la Paulus, ro cina ndai la Sostenes, mapamao raho-raho to'i mpa Allah Ta'ala Ama ndaita ro Isa Al Masih ma barekana kai taho ro ntai d̄i ru'u b̄a nggomid̄oho. Nahu tuntiku sura ake kai rasul Ruma Isa Al Masih, ra hanta b̄a ndai Allah Ta'ala.
Renta syuku
1:4-9
4 Nahu marenta syuku ncau d̄i Allah Ta'ala mab̄oha nggomid̄oho, b̄ara nggomid̄oho wa'ura tarimamu rahmat Allah kai ncai Isa Al Masih. 5 B̄a one nggomid̄oho wa'ura ndad̄i ntau Al Masih, ndad̄i nggomid̄oho wa'ura ntau ro wara ade samenana lampa rawi eded̄u ade sara'a nuntu ro nggahi ro ade sara'a loa ro tingi. 6 Ede aona haba mab̄oha Al Masih wa'ura ipi tenggo d̄i ade nggomid̄oho, 7 ndad̄ina wati kone sab̄ua bareka rau ma kura d̄i nggomid̄oho, wakatu nggomid̄oho wunga ngenamu Ruma Isa Al Masih, Ruma ndai mamai ro eda b̄a samenana dou. 8 Ndai Ruma Al Masih d̄imajaga ro sandaka nggomid̄oho saraka cumpukaina; loakud̄u wakatu Sia mai mbalina, Sia edana nggomid̄oho wati wara ma ihamu. 9 Allah Ta'ala loa d̄i'imbikai d̄i ade samenana. Allah Ta'ala edeku ma wa'ura ou nggomid̄oho d̄imandad̄i sab̄ua lab̄o ana-Na, eded̄u Isa Al Masih, Ruma ndaita.
Mbi'a ro ncenggana d̄i ade ela Ruma
1:10-17
10 Cina ro angi! Kai ngara Ruma Isa Al Masih, Ruma ndaita, nahu maraho loakud̄u nggomid̄oho sara'ana sab̄ua nuntu ro nggahi; loakud̄u aina wara ncengga ro mbi'a d̄i ade weki nggomid̄oho.Pab̄uapu nggomid̄oho kasab̄ua weki, kasab̄ua ade ro kasab̄ua fiki ro kananu. 11 Nahu nggahi ndedekaiku b̄ara nahu wa'ura ngoa b̄a iwa ro weki la Kloe mab̄oha nggomid̄oho, b̄a one wara cence ncihi d̄i ade weki nggomid̄oho. 12  Aona nggahi nahu ede eded̄u b̄a one d̄i ade weki nggomid̄oho wara ma nggahi, <<Nahu kab̄atu la Paulus,>> wara rau ma nggahi, <<Nahu kab̄atu la Apolos,>> ma kalai ma nggahi, <<Nahu kab̄atu la Petrus,>> ro ma kalai walina wara ma nggahi, <<Nahu kab̄atu Al Masih.>> 13 Sab̄ua loaku Al Masih d̄icengga-cengga?a Sab̄ua wara la Paulus rasalib d̄i ru'u b̄a nggomid̄oho? Atao wara nggomid̄oho rakandeu sarani kai ngara la Paulus?
14  Nahu ma renta syuku b̄a one nahu wati kandeu saraniku kone sab̄ua dou rau d̄i ade weki nggomid̄oho selasi la Krispus lab̄o la Gayus. 15 Ai to'ina wara kone sab̄ua dou rau ma nggahi b̄a one nahu wa'ura kandeu saraniku sia kai ngara nahu. 16  Oh io, la Stefanus lab̄o iwa ro wekina, nahu romo ma rakandeu saranina. Pala ari mai b̄a ede kawara b̄a nahu, wati wara dou makalai wali rakandeu sarani b̄a nahu. 17 Al Masih nggaduna nahu laina d̄imakandeu sarani dou, malaisi ^dimangoa ro kahaba Injil; ro ede rau pab̄ua d̄ikalampa b̄a nahu kai wati kaniku loa nuntu ro nggahi kai sacara manusiakaiku, loakud̄u kuasa ra d̄i madekaina Al Masih d̄i haju salib wati lao ncauna.
Kuasa ro loa timba ro lemba Allah Ta'ala wara d̄i Al Masih
1:18-25
18 B̄a one d̄i ru'u b̄a dou-dou d̄imalao aka lelikai, haba mab̄oha madena Al Masih d̄i haju salib b̄une nuntu cowa mpa, pala d̄i ru'u b̄a ndai ra kasalama b̄a Allah Ta'ala haba ede eded̄u cara Allah Ta'ala katadana kuasana. 19  B̄a one ade Kitab Suci, Allah Ta'ala manggahi,
<<Timba ro lemba dou maloa, Nahu ^dimakalelina,
ro loa ka'ao dou-dou mantau ilmu Nahu d̄imakamborana.>>
20  Auku onena dou-dou maloa timba ro lemba ede? Auku onena dou-dou ma ntau ilmu? Auku onena dou-dou mangau ilmu dunia ake? Allah Ta'ala wa'ura tei katadana b̄a one loa timba ro lemba dunia ake eded̄u nuntu ro nggahi cowa mpa!
21 B̄a one kone b̄uneb̄e wali loana manusia, sia wati loana pata Allah Ta'ala kai ncai loa ndaina. Pala b̄ara loa timba ro lemba Allah Ta'ala, ndad̄i ndai Allah Ta'ala naloa kasalama dou-dou ma imbi d̄i Sia kai ncai haba ra karongga b̄a nami ra wi'ikai nuntu cowa b̄a dunia. 22 Dou Yahudi rahona rawi ma b̄isa ro guna d̄ibukutikaina ro dou Yunani nakapentiku loa timba ro lemba dunia ake. 23 Pala ndai ake, tangoa ro kahaba mpa Al Masih ma made d̄isalib. Haba ede nakandad̄iku dou Yahudi wati imbi, ro nawi'ikaiku nuntu cowa b̄a dou-dou ma laina Yahudi. 24 Pala d̄i ru'u b̄a dou-dou ra wa'u ou b̄a Allah Ta'ala – nataho dou Yahudi ro dou ma laina Yahudi – haba ede eded̄u cara Allah Ta'ala tei ^dikatadakaina kuasa ro timba ro lemba-Na. 25 B̄a one ma tada sampula d̄i Allah Ta'ala, eded̄u nancewi loa timba ro lemba ntewikaisi loa timba ro lemba manusia; ro ma tada mapu ro rome d̄i Allah Ta'ala, edeku mancewi tenggo ntewikaisi tenggo ro wale manusia.
Kuasa Allah Ta'ala ro mapu ro romena manusia
1:26-31
26 Cina ro angi! Kawarapu b̄uneku ka'ada'an nggomid̄oho wakatu Allah Ta'ala ouna nggomid̄oho. Kai cara manusia, sato'i mpa d̄i ade weki nggomid̄oho ma loa timba ro lemba, atao mantau kuasa atao ma ese ^bora. 27 Pala au ra wi'ikai sampula b̄a dunia, ^dikad̄ale b̄a Allah Ta'ala ^dikamajakaina au ra wi'ikai tenggo, 28 ro au ra wi'ikai b̄a dunia wati wara one ro tuna ro b̄awa, d̄ikad̄ale b̄a Allah Ta'ala loakud̄u Allah Ta'ala kalelina au ra wi'ikai b̄a dunia wara onena. 29 Kai ndedena wati wara kone sab̄ua dou rau maloa kasombo weki d̄i tando Allah Ta'ala. 30 Ndai Allah Ta'ala ma kandad̄ina nggomid̄oho sab̄ua lab̄o Isa Al Masih. Kai ncai Al Masih, ndai kandad̄ina loa timba ro lemba, ro kai ncai Sia rau Allah Ta'ala kandad̄ina ndai taho mbali lab̄o ndai Allah Ta'ala, kandad̄ina ndai ela-Na rakalaina, ro hori kalosana ndaita. 31 Ndad̄i, b̄une ra tunti ade Kitab Suci, <<Dou ma ne'e ka'ese-ese weki, pab̄uaku ka'esena weki kai au ra karawi b̄a Ruma.>>