Kasana weapu ade dou makalai, aina kasana ade ndai mpoa
15:1-13
15
Ndai ma tenggo imbi pab̄uaku bantu dou ma mapu ro rome imbina. Ndai aina ne'e kasana sarumbu ndai mpoa. 2 Pala ndai pab̄uaku cua-cua kasana wea ade sasama cina ro angi ndaita d̄i tahokaina, loakud̄u imbina nanaha tenggo. 3 B̄ara Al Masih rau wati kananuna mori sana d̄i ru'u b̄a weki ndai kese-Na. D̄i ade Kitab Suci wara ratunti ndake, <<Samenana nggahi madab̄ae ra b̄ab̄u ro lo'o d̄i Ita nawa'ura b̄oha d̄i mada.>> 4 Samenana ra tunti ade Kitab Suci eded̄u ^dimangoa ro tei ndaita. B̄a one ngoa ro tei ra tarima b̄a ndai ade Kitab Suci nakandad̄iku ndai lembo ade ro tenggo, ndad̄ina ndai taloaku raho au-au d̄i Allah Ta'ala. 5 Raho-raho to'i mpa Allah Ta'ala ma mbei lembo ade ro ma rere ade d̄i ru'u b̄a manusia ma bantu nggomid̄oho loakud̄u mori kasab̄ua ade, b̄atu conto mori Isa Al Masih. 6 Kai kasab̄ua ade nggomid̄oho sara'ana sama-sama loa roi ro wadi Allah Ta'ala, Isa Al Masih, Ruma ndaita.7 B̄ara ndedena pab̄uapu nggomid̄oho tarimamu sab̄ua lab̄o ma kalaina kai sana ade, sama b̄une Al Masih rau tarimana nggomid̄oho ^dimakad̄ese ro kantasa Allah Ta'ala. 8 B̄ara kawarapu, b̄a one Al Masih wa'ura karawi weana d̄i ru'u b̄a dou Yahudi d̄i katadakaina b̄a one Allah Ta'ala mato'a d̄i au ra sake-Na d̄i ru'u b̄a wa'i ro waro ndaita. 9 Isa rau kandad̄ina bangsa-bangsa makalai makad̄ese ro kantasa Allah Ta'ala b̄ara taho ade Allah Ta'ala d̄i ru'u b̄a siad̄oho.D̄i ade Kitab Suci wara ratunti ndake,
<<B̄ara ndedena mada ^dimaroi ro wadi Ita d̄i ade woha bangsa-bangsa,
mada ^dimarawa roi ro wadi d̄i ru'u b̄a ngara Ita.>>
10 Wara ratunti ndake rau,
<<Ka^dihipu ademu sama-sama lab̄o ela Allah Ta'ala ra ka^dale,
oe bangsa-bangsa!>>
11 Ro ake rau,
<<Roi ro wadipu Allah Ta'ala, oe samenana bangsa,
pab̄uaku samenana dou roi ro wadina Sia!>>
12 Ro ake rau ra nggahi b̄a la Yesaya,
<<Ra d̄i londo ro mai la Isai ^dimawontu sab̄ua dou
^dimaparenta bangsa-bangsa;
d̄i Siaku bangsa-bangsa ede d̄iwi'ikaina weki.>>
13 Allah Ta'ala eded̄u hid̄i wi'ikai weki nggomid̄oho.Raho-raho to'i mpa Sia kangginina ade nggomid̄oho kai samenana ^dihi ade ro taho ro ntai b̄ara nggomid̄oho ma imbiku d̄i Sia, loakud̄u kai kuasa Roh Allah nggomid̄oho manaha ^deni ro rapu d̄i Allah Ta'ala.
La Paulus ngoa kab̄aena dasa-dasa au ra tuntina
15:14-21
14 Cina ro angiku! Nahu ka'imbi poda b̄a one wara mboto poda lampa rawi ma taho d̄i nggomid̄oho.Nggomid̄oho rau mab̄adesara'aku ro maloaku ngoa ro tei d̄i sab̄ua lab̄o ma kalaina. 15 Pala mab̄oha lampa rawi-lampa rawi ma kalaina, nahu ma ngoa ro kawara kapodana d̄i nggomid̄oho d̄i ade sura nahu ake, b̄ara Allah Ta'ala wa'ura mbeina d̄i nahu ^dimakalampa taki ede. 16 Sia wa'ura kandad̄ina nahu, dou d̄imakarawi wea d̄i ru'u b̄a Isa Al Masih ranggadu d̄i bangsa-bangsa ma laina Yahudi. Ro nahu mandad̄i imam, ma ngoa ro kahaba Injil Allah, loakud̄u dou-dou ma laina Yahudi mandad̄i sab̄ua d̄onggo ro mbei d̄i ru'u b̄a Allah Ta'ala ma loa ^ditarima b̄a Sia. Raho-raho to'i mpa Roh Allah kandad̄ina siad̄oho sab̄ua d̄onggo ro mbei d̄i ru'u b̄a Allah Ta'ala mpoa mpa. 17 Ndad̄i, b̄a one nahu wa'ura sab̄ua lab̄o Isa Al Masih, ndad̄i nahu kaloa ka'ese weki d̄i ade karawikaiku d̄i ru'u b̄a Allah Ta'ala. 18 Nahu disakaiku nggahi ndede mab̄oha au ra wa'u karawi b̄a Al Masih mpa kai ncai nahu ^dimakandad̄ina dou-dou ma laina Yahudi to'a d̄i Allah Ta'ala. Nahu karawi ndedeku kai nggahi ro eli ro kai ruku ro rawi, 19 kai kuasa tanda-tanda lampa rawi ma b̄isa ro guna, sara'ana ede b̄ara kuasa Roh Allah. Ndedeku ngoa ro kahaba b̄a nahu ra tampu'u d̄i Yerusalem sampe aka Ilirikum, nahu wa'ura ngoa ro kahaba sara'aku Injil Al Masih. 20 D̄i ade ngoa ro kahabakaiku lampa rawi ede, nahu kawi'ikaiku weki ^dilia ro horoma, b̄a one nahu wati ngoa ro kahabaku d̄i hid̄i-hid̄i ta b̄e rangara Al Masih ra wa'u pata b̄a dou, loakud̄u nahu wati tu'uku ese wawo dasa, ra wa'u tu'ukai b̄a dou ma kalai. 21 D̄i ade Kitab Suci wara ratunti,
<<Dou-dou ma watipu parana tarima haba mab̄oha Sia, ^dima'eda;
ro siad̄oho ma watipu parana ringa, ^dimaloa ka'ao.>>
La Paulus nane'e lao aka Roma
15:22-33
22 B̄ara ndedena nahu wa'ura ntuwu wara madompona ne'eku mai lamba nggomid̄oho. 23 Pala ake karawi nahu d̄i dana ro rasa ake wa'ura nggori. Pila-pila mba'a ntoina nahu kane'e lao lamba nggomid̄oho. 24 Nggara pea kalampa saisi kota nggomid̄oho d̄i ade lampa ro laokaiku aka Spanyol, nahu kane'e eda angi ro kad̄ihi ade lab̄o nggomid̄oho samporo mpa. Sawa'u b̄a ede nahu ma raho d̄i nggomid̄oho bantu to'ipu nahu ade lampa ro laokaiku aka Spanyol. 25 Pala wakatu ake nahu kane'e lao aka Yerusalem wa'a au-au ra paralu b̄a ela Allah Ta'ala ta aka. 26 B̄a one ela Ruma d̄i Makedonia ro Akhaya nawa'ura ngawa mbei au-au d̄iparalu b̄a cina ro angina ma ncoki mori d̄i woha ela Allah Ta'ala d̄i Yerusalem. 27 Kai sana adena siad̄oho karawina ede. Io romo siad̄oho patu ^dimabantu d̄i ru'u b̄a cina ro angi mancoki mori d̄i Yerusalem ede; b̄ara ra d̄i dou-dou Yahudiku, dou-dou ma laina Yahudi ede wa'ura tarimana bareka-bareka ra d̄i Allah Ta'ala. Ndad̄i, dou-dou ma laina Yahudi ede patu rau ^dimabantu dou-dou Yahudi kai bareka-bareka ma patu ro ambi. 28 Nggara nahu kawa'usi rakanggori taki ro puta ake ro ^donggoku d̄i siad̄oho ma wara d̄i Yerusalem ede au-au ra wa'u kab̄oro ede, ndad̄i nahu d̄imalao aka dana ro rasa Spanyol lampa sai kota nggomid̄oho. 29 Nggara nahu kamaisi d̄i nggomid̄oho, tantu nahu ma mai kai wa'aku bareka ra d̄i Al Masih d̄i ru'u b̄a nggomid̄oho.
30 Kai ngara Isa Al Masih, Ruma ndaita ro kai meci ro ca'u ra mbei b̄a Roh Allah, nahu maraho poda-poda d̄i nggomid̄oho, raho-raho to'i mpa nggomid̄oho b̄atu do'a kapoda ade sama-sama lab̄o nahu d̄i Allah Ta'ala d̄i ru'u b̄a nahu. 31 Do'apu loakud̄u Allah Ta'ala horina nahu d̄i dou-dou ma wati imbi ra d̄i Yudea ro loakud̄u taki ro puta nahu eded̄u d̄imawa'a au-au d̄iparalu aka Yerusalem tarimana kai ade masana b̄a ela Allah Ta'ala ta aka. 32 Kai ndedena, nggara kane'esi b̄a Allah Ta'ala, nahu kaloa mai d̄i nggomid̄oho kai sana ade. Ro nahu d̄ima'iu ^dihi ade d̄i woha nggomid̄oho. 33 Raho-raho to'i mpa Allah Ta'ala ma mbei taho ro ntai d̄i manusia malab̄ona nggomid̄oho sara'ana. Amin.