Allah Ta'ala lab̄o ela raka^dale-Na
9:1-18
9
Au ^dinggahi b̄a nahu ake napoda b̄ara nahu eded̄u ntau Al Masih. Nahu wati nuntu cowaku. Ade mpida nahu rad̄anda ro wa'a b̄a Roh Allah, makatenggo rauna nahu b̄a one au ra nggahi b̄a nahu ake napoda. 2 Nahu nawancuku ncoki adeku ro susa ro ncoki iuku 3 b̄ara cina ro angi ma sab̄ua bangsa lab̄o nahu. B̄a one d̄i ru'u b̄a siad̄oho, ndai nahu nira adeku ^ba'a b̄a Allah Ta'ala ro ncengga ra d̄i Al Masih. 4 Siad̄oho eded̄u ela ra kad̄ale ro Allah Ta'ala kandad̄ina siad̄oho ana-ana ndai-Na ro katadana kuasa-Na d̄i siad̄oho.Sia sakenak lab̄o siad̄oho ro mbeina d̄i siad̄oho hukum Taurat. Allah Ta'ala ngoana d̄i siad̄oho b̄uneku siad̄oho pab̄ua sambea ro ibada ro siad̄oho wa'ura tarima rauna au ra sake-Na. 5 Siad̄oho ede londo ro mai wa'i ro waro ndaita. Al Masih kai manusiakaina ramaina ra d̄i bangsa siad̄oho.Sia nancewi ese d̄i samenana. ^Dese ro ntasara d̄i ru'u b̄a Allah Ta'ala santoi-ntoina!l Amin.6 Aona nggahi nahu ake laina b̄a one au ra sake b̄a Allah Ta'ala watid̄u ^dikani wali; pala laina sara'a dou Israel eded̄u ela ra kad̄ale b̄a Allah Ta'ala. 7 Laina sara'a londo ro mai la Ibrahim eded̄u ana-ana Allah. B̄a one Allah Ta'ala ma nggahi d̄i la Ibrahim, <<Londo ro mai la Ishak mpoa mpa ^dipehekai londo ro maimu.>> 8 Ede aona b̄a one londo ro mai la Ibrahim mandad̄i ana-ana Allah, eded̄u londo ro mai ranggana b̄ara sake b̄a Allah Ta'ala; ro laina sara'a londo ro mai la Ibrahim.m 9 B̄ara au ra sake b̄a Allah Ta'ala eded̄u b̄une ake, <<D̄i wakatu rawa'u katantu,n Nahu d̄imamai ro la Sara ^dimantau ana mone.>>
10 Ro laina ede mpoa. La Ribka ngganana d̄ua dou ana mone ra d̄i sab̄ua rahi eded̄u la Ishak wa'i ro waro ndaita. 11 B̄a one sawatipu ana dou to'i d̄uana ede ranggana ro watipu b̄adena karawi au ma taho ro ma iha, loakud̄u au ra nia b̄a Allah Ta'ala mab̄oha au ra ka^dale-Na ^dikatenggo, laina kai dasa ruku ro rawi pala kai dasa d̄i ne'e b̄a Sia. 12 Nggahi-Na d̄i la Ribka,
<<Ana ma sasa'ena d̄imandad̄i ada d̄i ru'u b̄a arina,>> 13 Ade Kitab Suci wara ratunti b̄a one Allah Ta'ala ma nggahi ndake, <<La Yakub ^dimeci ro ca'u b̄a Nahu, pala la Esau wati ca'u b̄a Nahu.>>
14 Ndad̄i, auku d̄i nggahi b̄a ndai ake? Sab̄ua poda Allah Ta'ala wati adilna? Tantu Allah Ta'ala ede nawancuku adilna! 15 B̄a one Allah Ta'ala manggahi d̄i la Musa, <<Nahu ^dimakasi ade d̄i dou-dou ^dine'ekai b̄a Nahu kasi ade ro Nahu ^dimancera ro mbura ade d̄i dou-dou rane'ekai b̄a Nahu ncera ro mbura ade.>> 16 Ndad̄i, au ra kane'ekai b̄a Allah Ta'ala ede laina b̄ara nira ade manusia, malaisi b̄ara tahona ade Allah Ta'ala mpa d̄i dou ra ka^dale-Na ede. 17 B̄a one ade Kitab Suci wara ratunti b̄a one Allah Ta'ala ma nggahi d̄i Sangaji Mesir, <<B̄ara ndedena Nahu ma kad̄ale nggomi, loakud̄u Nahu makatada kuasa Nahu d̄i nggomi, ro loakud̄u ngara Nahu d̄ingoa ro kahaba d̄i dunia.>> 18 Ndad̄i, Allah Ta'ala kasi ade-Na d̄i dou ra kane'ekai b̄a Sia ro Sia ^dimakaterana ade sab̄ua dou nggara nane'esi kandede b̄a Allah Ta'ala.
Mbani ro tahona ade Allah Ta'ala
9:19-29
19 Nggomid̄oho ^dimanggahi d̄i nahu, <<Nggara ndedesi b̄ab̄auku Allah Ta'ala mbuipu ne'ena kancara manusia? B̄a one couku ma wa'una tapa au ra kane'ekai-Na?>> 20 Pala, nggomi^doho! Nggomid̄oho eded̄u manusia mpa. Ro nggomid̄oho wati loamu kadisa weki cambe d̄i Allah Ta'ala! Sab̄ua pot ^bunga naloa sod̄i d̄i dou ma randawina, <<^Ba^bauku ita ngo^du kandakekaimu mada?>> 21 Sab̄ua laina dou ma ndawi pot ^bunga ede nantau hak ngo^du dana lili ede b̄e rane'e b̄a ndaina? Ra d̄i saka^bore dana lili, dou ede nantau hak ndawi d̄ua mbua pot ^bunga: sab̄ua ma ntika ro ma kalaina wati ipi ntikana.
22 Ndede rauku d̄i au ra ndawi b̄a Allah Ta'ala. Sia naniaku ^boho kai mbani-Na ro nakatadaku kuasa-Na. Pala Sia nalembo ade d̄i siad̄oho ma pab̄ua d̄ihukum b̄ara kandad̄ina mbani Allah Ta'ala. 23 Allah Ta'ala nania rauku katada d̄i ndai taho ro sana ma wancu remba ra mbei-Na d̄i ndai, d̄i dou ra kasikai b̄a ade-Na. Ndai wa'ura sadia b̄a Sia d̄imatarima taho ro sana ede. 24 Ndai wa'ura ou-Na, laina d̄i bangsa Yahudi mpoa, pala d̄i bangsa-bangsa makalai rau. 25 B̄a one d̄i ade kitab Nabi Hosea, Allah Ta'ala nggahina,
<<Dou-dou ma laina ela Nahu,
^dipehe b̄a Nahu <Ela-Ku>.
Bangsa ma wati meci ro ca'u b̄a Nahu,
^dipehe b̄a Nahu <Ra meci b̄a Nahu.>
26 Ro ta b̄e ra hid̄i ranggahi b̄a dou, <Nggomi laina ela Nahu,>
ta edeku dou-dou ede ^dipehekai ana-ana Allah3 ma mori.>>
27 Nabi Yesaya manggahi kapodana mab̄oha bangsa Israel, <<Kone napoda mboto bangsa Israel b̄une mboto sarae d̄i kengge moti, pala sato'i mpa d̄imaraka salama; 28 b̄ara Ruma na^ba^bu rociku kai hukuman d̄i sara'a isi dunia.>> 29 La Yesaya nggahi ndake rauna, <<Paisi Allah Ta'ala Ma Wancu Na'e Kuasa wati wi'ina d̄i ndai londo ro mai, tantu ndai sara'a wa'ura made tumpu b̄une kota Sodom ro Gomora.>>
Hubungan ela Allah Ta'ala lab̄o Injil ma ramai ra d̄i Allah Ta'ala
9:30–10:4
30 Ndad̄i, cumpukaina eded̄u ake: Bangsa-bangsa makalaina ma laina Yahudi wati ngupana ncai loakud̄u hubungan siad̄oho lab̄o Allah Ta'ala ndad̄i taho mbali. Pala b̄ara siad̄oho imbina, ndad̄i Allah Ta'ala kandad̄ina hubungan siad̄oho lab̄o Sia ndad̄i taho mbali. 31 Pala, dou-dou Yahudi na'usaha ncauku to'a d̄i hukum loakud̄u hubungan siad̄oho lab̄o Allah Ta'ala ndad̄i taho mbali. Pala usaha siad̄oho ede wati ntauna hasi. 32 ^Ba^bauku usaha siad̄oho ede wati ntaukaina hasi? B̄ara siad̄oho karawina ede wati kai ncai imbina d̄i Allah Ta'ala, malaisi kai ncai usaha ndai siad̄oho.Ndad̄i siad̄oho mbo'o satununa d̄i <<Wadu satunukai>>. 33 Mab̄oha wadu ede d̄i ade Kitab Suci wara ratunti ndake,
<<Tio kab̄aepu ake: D̄i Sion wa'ura toho wi'i b̄a Nahu sab̄ua wadu
^dimakamaina dou satunu;
eded̄u sab̄ua wadu na'e ^dimakandad̄ina mbo'o dou.
Pala dou ma imbi d̄i Sia wati ^dimasinci ade.>>