Mori b̄ara Roh Allah
8:1-17
8
Ake watid̄u wara walina hukuman d̄i ru'u b̄a siad̄oho ma wara d̄i ade Isa Al Masih. 2 Roh Allah ma rakandad̄ina ndai mori sab̄ua lab̄o Isa Al Masih ma wa'ura hori nahug ra d̄i hukum ma kandad̄ina dosa ro made. 3 Au ma wati loa d̄ikarawi b̄a hukum Taurat, b̄ara ndai ake manusia mamapu ro rome, ede wa'ura karawi b̄a Allah Ta'ala. Allah Ta'ala kakoana kuasa dosa ade tabe'a manusia kai nggaduna Ana ndai-Na, ma mai ade ka'ada'an sama lab̄o manusia ma dosa, ^dimafurana dosa. 4 Allah Ta'ala karawikaina ede loakud̄u au ra kane'e-Na ra katada ade hukum Taurat ede loa d̄ikalampa ade weki ndaita ma mori b̄atu Roh Allah ro laina b̄atu tabe'a manusiakaita. 5 Dou-dou ma mori b̄atu tabe'a manusiakaina, nafiki ro kananu ncauku au ^dikane'e b̄a tabe'a manusia. Pala dou-dou ma mori b̄atu au ra kane'ekai b̄a Roh Allah, nafiki ro kananu ncauku d̄ine'e b̄a Roh Allah. 6 Nggara fiki ro kananumu nakuasakaisi b̄a tabe'a manusiakaita, ndad̄i nakamaiku madekai. Pala nggara fiki ro kananumu nakuasakaisi b̄a Roh Allah, ndad̄i d̄imandad̄i eded̄u mori ma taho ro sana lab̄o Allah Ta'ala. 7 Dou ma fiki ro kananuna nakuasakaisi b̄a tabe'a manusiakaina, dou ede namusuku angina lab̄o Allah Ta'ala; b̄ara dou ede wati to'ana d̄i Hukum Allah; ro ncihi romo sia wati loana to'a d̄i hukum Allah. 8 Dou-dou ma mori b̄atu tabe'a manusia, wati loana kasana wea ade Allah Ta'ala.9 Pala nggomid̄oho wati mori ^batumu tabe'a manusia. Nggomid̄oho mori ^batumu Roh Allah nggara podasi Roh Allah poda-poda nentina nggahi ro rawi d̄i ade sarumbumu. Pala dou ma wati ntau Roh Al Masih, dou ede laina ntau Al Masih. 10 Pala nggara Al Masih namorisi d̄i ade sarumbumu, ndad̄i kone sarumbumu d̄imamade b̄ara dosa, pala Roh Allah mambei mori d̄i ru'umu,h b̄ara hubunganmu lab̄o Allah Ta'ala wa'ura taho. 11 Nggara Roh Allah ma kamorina Al Masih ra d̄i madekaina, mori d̄i ade sarumbumu, ndad̄i Sia ma rakamori Al Masih ra d̄i madekaina ede, d̄imakamori rau sarumbumu ma loa made ede. Sia karawina ede kai Roh-Na ma mori d̄ei ade weki nggomi.
12 B̄ara ndedena, cina ro angi, ndai tantau nconggo; pala laina nconggo d̄i tabe'a manusiakaita; ndai wati paraluna mori b̄atu ra ne'e b̄a tabe'a manusiakaita ede. 13 B̄ara nggara nggomid̄oho mamori ^batusi tabe'a manusiakaimu, ndad̄i nggomid̄oho ^dimamade; pala nggara kai kuasa Roh Allah, nggomid̄oho mahade ncauku ruku ro rawi-ruku ro rawi ma kamaina dosa, ndad̄i nggomid̄oho ^dimamori. 14 Dou-dou ra d̄anda ro wa'a b̄a Roh Allah, eded̄u ana-ana Allah. 15 B̄ara Roh, rambei b̄a Allah Ta'ala d̄i ru'u b̄a nggomid̄oho, wati ^dimakandad̄ina nggomid̄oho ada, ndad̄ina nggomid̄oho morimu d̄i ade dahu. Pala Roh Allah ede nakandad̄iku nggomid̄oho ana Allah. Ro kai kuasa Roh Allah ede, ndai taloaku ou Allah Ta'ala ede, <<Ama, io Ama-ku!>> 16 Roh Allah sama-sama lab̄o roh ndaita nakatadaku b̄a one ndai eded̄u ana Allah. 17 Nggara ndai eded̄u ana-ana-Na, ndad̄i ndai rau d̄imatarima pasaka-Na eded̄u bareka-bareka ra sadia b̄a Allah Ta'ala d̄i ru'u b̄a ana-ana-Na. Ndai d̄imatarima sama-sama lab̄o Al Masih au ra wa'u sadia b̄a Allah Ta'ala; b̄ara nggara ndai tancoki ro susasi sama-sama lab̄o Al Masih, ndai d̄ikad̄ese ro kantasa rau sama-sama lab̄o Sia.
D̄i ne'e poda b̄a ana-ana Allah
8:18-30
18 Nahu ka'imbi podaku, b̄a one susa ro ncoki d̄i zaman ake wati loa ^dintewikai lab̄o d̄ese ro ntasa ^dikatadana d̄i ndaita. 19 Sara'a isi dunia nane'e poda b̄a adena ngena wakatu Allah Ta'ala katadana ana-ana-Na. 20 B̄ara dunia lab̄o isina wa'ura co'o ^dimandu^bu, laina b̄ara ne'e b̄a dunia ede, pala b̄ara Allah Ta'ala ma raco'o kandedena. Konena ndede wara rau d̄i ne'e b̄une ake: 21 b̄a one d̄i sab̄ua wakatu, dunia lab̄o isina d̄ihori kalosa ra d̄i kuasa ma kalelina ro ^dimalu'u ade mori masana ro d̄ikad̄ese ro kantasa sama-sama lab̄o ana Allah.2
22 Ndai ta^badeku b̄a one saraka ake dunia lab̄o isi-isina naweta b̄ara susa ro ncoki b̄une ina ma iu susa ro ncoki wakatu ngganana. 23 Ro laina dunia lab̄o isi-isi mpoana ma weta; ndai rau maweta d̄i ade mpida ndaita. Ndai wa'ura tarimata Roh Allah kai rambei b̄a Allah Ta'ala ra'aipu sarambakaina, pala ndai mbui raupu ngenata Allah Ta'ala mahori kalosa sara'a sarumbu ndaita ro kandad̄ina ndai ana-ana-Na.i 24 B̄ara kai ra raho poda b̄a ndai, ndad̄i ndai kasalamana. Pala nggara au ra pamao b̄a ndai ede wa'ura eda b̄a ndaita, ndad̄i ede laina ra pamao. B̄ara cousi mambuipu ngena d̄i au ra wa'ura edana? 25 Pala nggara ndai rahosi au ma watipu ra'eda b̄a ndaita, ndad̄i ndai ^dimangena kai lembo ade.
26 Ndede rau Roh Allah mai bantuna ndaita nggara mapu ro romesi ndaita. B̄ara ndai wati ^badeta b̄uneku sapodakaina ndai tado'asi; ndai Roh ede malao satando d̄i Allah Ta'ala ^dimaraho ro do^dona d̄i ru'u b̄a ndaita ro kai ne'ena ma poda ndad̄ina wati loa ^direnta. 27 Ndad̄i Allah Ta'ala, ma b̄ade isi ade manusia, naloa ka'ao d̄i ne'e b̄a Roh ede; b̄ara Roh ede maraho poda-poda d̄i Allah Ta'ala d̄i ru'u b̄a ela Allah Ta'ala ro nancihi ncao b̄une ra kane'ekai b̄a Allah Ta'ala.
28 Ndai ta^badeku b̄a one Allah Ta'ala ma'ato samenana lampa rawi, ndad̄ina nantau hasi ma taho d̄i ru'u b̄a dou-dou ma meci ro ca'u Siaj ro ra ka^dale-Na ma ncihi ncao lab̄o au ra kane'ekai-Na. 29 Siad̄oho ra wa'u kad̄ale b̄a Allah Ta'ala, wa'ura katantu rauna ra'aipu saramba wa'una d̄imandad̄i sama lab̄o Ana-Na, eded̄u Isa Al Masih. Kai ndedena ana-Na ede mandad̄i ana masarambakaina d̄i ade weki cina ro angi ma mboto. 30 Ndedeku Allah Ta'ala ouna siad̄oho ra wa'u katantu ulu b̄a Sia; ro siad̄oho ra ouna ede kaloa b̄a Sia ndad̄i taho mbali lab̄o Allah Ta'ala, weha ru'una d̄i ade mori ndai Allah Ta'ala.
Meci ro ca'u Allah Ta'ala kai ncai Isa Al Masih
8:31-39
31 B̄ara ndedena auku ^dinggahi b̄a ndai mab̄oha samenana ede? Nggara Allah Ta'ala nahorusi ndai, couku mawa'una ao ndai? 32 Ana ndai-Na wati kancaja-Na, malaisi ^donggo-Na d̄i ru'u kapentikai ndai sara'a; Sab̄ua lu'u b̄a aka Sia wati mbeina d̄i ndai samenana ma kalai? 33 Couku ma loana da'awa ndai ela rakad̄ale b̄a Allah Ta'ala, nggara ndai Allah Ta'ala makatadana b̄a one ndai wati ncarata? 34 Sab̄ua wara dou ma ne'e kancara ndaita? Isa Al Masih ^dimahoruna ndai! Sia ma wa'ura made, atao Siaku ra wa'u kamori mbali ra d̄i made ro nawara d̄i Allah Ta'ala d̄i hid̄i ma na'e kuasa. 35 Sab̄ua wara ma loa tapa Al Masih mameci ro ca'u ndaita? Sab̄ua naloa susa ro ncoki matapana, atao rawi mancoki, atao kancoki atao sarahi^do, atao ncoki mori, atao bahaya, atao made? 36 Ade Kitab Suci wara ratunti ndake,
<<Sanai ma ntuki madad̄oho mori d̄i ade bahaya made b̄ara Ita.
Madad̄oho ra wi'ikai b̄une jimba d̄i ne'e sambele.>>
37 Wati! D̄i ade sara'ana ede ndaiku ma raka ngolu ma mpuruna b̄a Sia ma meci ro ca'u ndaita! 38 B̄ara nahu ka'imbi podaku b̄a one d̄i dunia ake, nataho made atao mori ro woko, nataho mala'eka atao mantau kuasa, nataho ^didahukai wakatu ake atao ^didahukai d̄i jaman ma kento atao tenggo ro wale-tenggo ro wale makalaina; 39 nataho lampa rawi-lampa rawi ma wara d̄i langi, nataho lampa rawi d̄i ade dunia atao au-au rau ma kalai, samenana ede wati loana tapa Allah Ta'ala meci ro ca'una ndaita, b̄une wa'ura katada-Na kai ncai Isa Al Masih, Ruma ndaita.