Taho mbali lab̄o Allah Ta'ala
5:1-11
5
Ake ndai wa'ura taho mbali lab̄o Allah Ta'ala, b̄ara imbita. Ro b̄ara ndedena maira ndai tamorid taho ro sanaku lab̄o Allah Ta'ala kai ncai Isa Al Masih, Ruma ndaita. 2 B̄ara ndai imbi d̄i Isa Al Masih, ndad̄i Sia nakaloaku ndai iu meci ro ca'u b̄a Allah Ta'ala ro kai meci ro ca'u edeku ndai ake ta loa mori. B̄ara ndedena ndai ^dihi adetae b̄a one ndai d̄imaraka mori sana ra mbei b̄a Allah Ta'ala! 3 Ro laina ede mpoa. Ndai rau taloa ^dihi adef d̄i ade susa ro ncokikai ndai, b̄ara ndai ta^badeku b̄a one susa ro ncoki ede nakamaiku to'a, 4 ro d̄i ade to'akaita ede nakamaiku ndai tenggo ade susa ro ncokikai ro tenggo d̄i ade susa ro ncokikai nakamaiku taho ro sana. 5 Taho ro sana b̄une ede wati kato'ina ade ndaita b̄a one ade ndaita wa'ura kanggini b̄a Allah Ta'ala kai meci ro ca'u-Na. Allah Ta'ala karawina ede kai ncai Roh-Na ra wa'u mbeina d̄i ndaita.6 Wakatu ndai mbuipu wati loata ka'ao au-au, Al Masih wa'ura made d̄i ru'u b̄a ndaita b̄une ra katantu b̄a Allah Ta'ala; sapodakaina ndai dou-dou ma d̄o'o lab̄o Allah Ta'ala. 7 B̄a one wati mod̄ana sab̄ua dou ma ngawa made d̄i ru'u b̄a ^dou ma ncihi pala kombisi d̄i ru'u b̄a dou ma taho wara dou ma disa made. 8 Pala Allah Ta'ala katadana meci ro ca'u-Na ma na'e d̄i ndaita wakatu Al Masih madena d̄i ru'u b̄a ndaita aipu wakatu ndaita mbuipu dosa. 9 Ake ndai tawa'ura taho mbali lab̄o Allah Ta'ala kai ncai madena Al Masih; b̄ara ndedena tantu ndai d̄i kasalama rau b̄a Al Masih ade mbanikai Allah Ta'ala. 10 Nggara aipu ndaita mbuipu musu angita lab̄o Allah Ta'ala, ndai kataho mbali b̄a Allah Ta'ala kai ncai made Ana-Na, au walipu ake ndai wa'ura taho mbali lab̄o Allah Ta'ala, tantu ndaita ^dikasalama rauna kai ncai mori Al Masih. 11 Ro laina ede mpoa! Ndai neo ade rau d̄i ade Allah Ta'ala kai nca Isa Al Masih, Ruma ndai, b̄ara kai ncai Sia ndai wa'ura taho mbali lab̄o Allah Ta'ala.
La Adam ro Al Masih
5:12-21
12 Dosa lu'una ade dunia kai ncai sab̄ua dou ro b̄ara dosa ede makamaina made. Ndad̄i ndedeku made ede b̄ohana d̄i samenana manusia, b̄ara sara'a dou nawa'ura dosa. 13 Sawatipu wara hukum Taurat, dosa wa'ura wara d̄i dunia. Pala dosa wati ^direke b̄ara wati wara hukum ra sapa. 14 Pala, ratampu'u aipu jaman la Adam saraka d̄i jaman la Musa made nawa'ura kuasa d̄i samenana manusia. Kone dou-dou ma wati karawi dosa b̄une ra karawi b̄a la Adam, dou-dou ede rau kuasakai b̄a made.
La Adam eded̄u gambaran Sia d̄imamai kento. 15 Pala d̄uana ede wati samana; b̄a one au ra mbei b̄a Allah Ta'ala nad̄o'o ncewi na'e ntewikaisi rawi ra sapa b̄a la Adam. Rawi ra sapa b̄a sab̄ua dou nakandad̄iku mboto dou kuasakai b̄a made. Nawancuku ncewi na'e walina meci ro ca'u ra mbei b̄a Allah Ta'ala ro hadia salamakai rambei b̄a Allah Ta'ala d̄i ru'u b̄a ndede mboto dou, kai ncai taho ade sab̄ua Dou, eded̄u Isa Al Masih, Ruma ndaita. 16 Au ra mbei b̄a Allah Ta'ala nawancuku ncewi na'ena ntewikaisi dosa dou ma sab̄ua ede. B̄ara sawa'u b̄a sab̄ua dou ma karawi ncara ede, losa lalo hukuman, <<Ncara rawi>>. Pala sawa'u b̄a mboto dou makarawi dosa, wontu lalo mpa hadia ma ramai ra d̄i Allah Ta'ala ma nggahi, <<Wati wara rawi ma ncara.>> 17 B̄ara rawi ra sapa b̄a sab̄ua dou, kuasa made ede nggete kai ncai sab̄ua dou ede. Nawancuku ncewi na'e walina b̄ara au ra karawi b̄a sab̄ua dou ma kalaina, eded̄u Isa Al Masih. Kai ncai Sia, Allah Ta'ala luana rahmat-Na d̄i ru'u b̄a ndede mboto dou, ro kai mbei mpoana kaloana siad̄oho taho mbali lab̄o Allah Ta'ala; siad̄oho ^dimakuasa d̄i dunia ake kai ncai Al Masih.
18 Ndad̄i, b̄une rawi ra sapa b̄a sab̄ua dou, ndad̄ikaina samenana manusia ^dihukum, ndede rau ra karawi b̄a sab̄ua dou ma b̄atu au ra kane'ekai b̄a Allah Ta'ala, ndad̄ikaina samenana dou d̄ihori kalosa ra d̄i hukuman ro d̄imaraka mori. 19 Ro b̄une mboto dou mandad̄i dou madosa b̄ara sab̄ua dou ma wati to'a, ndede rau kaloana dou mamboto ^dimataho mbali lab̄o Allah Ta'ala b̄ara sab̄ua dou mato'a d̄i Allah Ta'ala.
20 Ma rambei hukum Taurat eded̄u ndai Allah Ta'ala. Pala nanaha usaha b̄a manusia ^dito'akaina d̄i hukum ede, siad̄oho nanaha sapaku ro nanaha dosa d̄i Allah Ta'ala. Konena manusia nanaha karawi dosa, Allah Ta'ala nanaha meci ro ca'uku siad̄oho. 21 Ndai pab̄uaku made b̄ara ndai karawita dosa. Pala Allah Ta'ala nameci ro ca'uku ndaita ro nambeiku ncai d̄i ndaita ^dimataho mbali lab̄o Sia. Ro b̄ara hubungan ndaita lab̄o Allah Ta'ala wa'ura taho mbali, Sia mbei rauna mori ma sapodakaina ro ma ede ro hid̄i d̄i ru'u b̄a ndaita kai ncai Isa Al Masih, Ruma ndaita.