La Ibrahim rakancihi b̄a Allah Ta'ala b̄ara imbina
4:1-25
4
Nggara ndedesi, auku d̄i loa nggahi b̄a ndaita mab̄oha la Ibrahim, wa'i ro waro b̄a bangsa ndaita? 2 Nggara la Ibrahim kancihi b̄a Allah Ta'ala b̄ara ruku ro rawina, ndad̄i sia naloaku ka'ese-ese weki, pala wati d̄i tando Allah Ta'ala. 3 Ade Kitab Suci wara ratunti ndake, <<La Ibrahim na'imbi d̄i Allah Ta'ala ro b̄ara imbina ede, sia tarima b̄a Allah Ta'ala kai dou ma kasana wea ade Allah Ta'ala.>> 4 Dou ma karawi, natarima ufana; ro ufana ede wati ra wi'i kai hadia, pala ede eded̄u hakna. 5 Pala nggara warasi dou ma wati karawi, pala na'imbiku d̄i Allah Ta'ala ma kancihina dou ma dosa, kai dasa imbina ede Allah Ta'ala tarimana dou ede kai dou ma kasana wea ade Allah Ta'ala. 6 Ndede rauku nggahi b̄a la Daud taho ro sanara dou ra kancihi b̄a Allah Ta'ala laina b̄ara dasa ruku ro rawina:7 <<Taho ro sanara dou ra kangampu wea ncara ro kancaruna,
ro dosa-dosana ^dikangampu wea b̄a Allah Ta'ala!
8 Taho ro sanara dou b̄ara dosa-dosana wati ra reke b̄a Ruma!>>
9 Sab̄ua ra renta taho ro sana ake d̄i ru'u b̄a dou-dou ma b̄atu atoran suna mpoa mpa? Atao d̄i ru'u b̄a dou-dou ma wati b̄atu atoran suna rau? Wa'ura nggahi b̄a nami sawatipu b̄a ede, b̄a one la Ibrahim tarima b̄a Allah Ta'ala kai dou ma kasana wea ade Allah Ta'ala ro b̄ara imbina. 10 ^Bune aiku Allah Ta'ala katadana lampa rawi ede? Sawatipu b̄a suna atao sawa'u b̄a suna la Ibrahim? Laina sawa'u b̄a sunana, pala sawatipu b̄a suna la Ibrahim. 11 Sia rasuna kento, ro sunana ede d̄imandad̄i tanda mpa b̄a one Allah Ta'ala wa'ura tarimana sia kai dou ma kasana wea ade Allah Ta'ala ro b̄ara imbina d̄i Allah Ta'ala. Sia tarima b̄a Allah Ta'ala ra aipu sia watipu b̄atuna atoran suna. Ndad̄i sia mandad̄i ama b̄a sara'a dou ma imbi d̄i Allah Ta'ala ro b̄ara ndedena sia wa'ura tarima b̄a Allah Ta'ala kai dou ma kasana wea ade Allah Ta'ala, konena siad̄oho ede wati b̄atuna atoran suna. 12 La Ibrahim rau eded̄u ama d̄i ru'u b̄a dou-dou ma b̄atu atoran suna. Sia, ama b̄a siad̄oho laina b̄ara siad̄oho b̄atuna atoran suna, pala b̄ara siad̄oho mori kai imbina d̄i Allah Ta'ala, sama b̄une la Ibrahim aipu wakatu sia watipu b̄atuna atoran suna.
13 Allah Ta'ala sakena d̄i la Ibrahim ro d̄i londo ro maina b̄a one dunia ake d̄imandad̄i ntau la Ibrahim. Allah Ta'ala sake ndedekaina laina b̄ara la Ibrahim to'ana d̄i hukum Taurat, pala b̄ara sia imbina d̄i Allah Ta'ala ndad̄ina sia tarima b̄a Allah Ta'ala kai dou ma kasana wea ade-Na. 14 B̄a one dou-dou nggara nato'asi d̄i hukum Taurat mpoa, dou-dou ede d̄imatarima au ra sake b̄a Allah Ta'ala, ndad̄i imbina d̄i Allah Ta'ala wati wara poda onena ro au ra sake b̄a Allah Ta'ala ede wati ^dimbei. 15 Hukum Taurat nakamaiku hukuman Allah Ta'ala, pala ta b̄e rawati warakai hukum Taurat, ta ede wati wara hukum ra sapa rau.
16 Ndad̄i au ra sake b̄a Allah Ta'ala ede kai dasa imbi dou d̄i Allah Ta'ala. Ede d̄imandad̄i fu'u ^dinenti b̄a samenana londo ro mai la Ibrahim b̄a one au ra sake ede rambei d̄i siad̄oho kai mbei mpoa b̄a Allah Ta'ala; laina d̄i ru'u b̄a siad̄oho ma to'a d̄i hukum Taurat mpoa, pala d̄i ru'u rau b̄a siad̄oho ma imbi d̄i Allah Ta'ala sama b̄une la Ibrahim ma imbi d̄i Allah Ta'ala: B̄ara la Ibrahim eded̄u ama ndai sara'a. 17 B̄ara Allah Ta'ala nggahi ndakena d̄i la Ibrahim, <<Nahu wa'ura kandad̄iku nggomi ama d̄i ru'u b̄a mboto bangsa.>> Ndedeku Allah Ta'ala sakena d̄i la Ibrahim. Ro la Ibrahim na'imbiku d̄i Allah Ta'ala. Siaku Allah Ta'ala ma kamori dou ma made; Sia rauku Allah Ta'ala, kone kai nggahi ro eli mpoana nakandad̄iku au ma wati wara, nandad̄i wara. 18 La Ibrahim naraho ro pamao ncauku ro na'imbi kone wati lu'u b̄a aka d̄imaraka au ra kane'ena. B̄ara ndedena sia mandad̄i ama b̄a mboto bangsa. ^Bune wara ratunti ade Kitab suci, <<Londo ro maimu d̄imandad̄i mboto poda.>> 19 Pala la Ibrahim aipu ede nab̄adeku b̄a one wati lu'u b̄a aka sia ^dimantau londo ro mai, b̄ara sia nawa'ura ipi tua ro umuna nane'era 100 mba'a; au walipu la Sara weina ede, nambonggi. Pala imbi la Ibrahim wati kurana. 20 Sia ngge'e mpa imbina ro wati mbali mbua adena d̄i au ra sake b̄a Allah Ta'ala. Imbina ede nanaha kandad̄iku sia naha tenggo, ndad̄ina sia roi ro wadina Allah Ta'ala. 21 Sia na'imbi podaku b̄a one Allah Ta'ala naloaku karawi au ra sake-Na. 22 B̄ara ndedena la Ibrahim tarima b̄a Allah Ta'ala kai dou ma kasana wea ade-Na. 23 Nggahi ro elina <<^ditarima kai dou ma kasana wea ade Allah Ta'ala>> ra tunti laina d̄i ru'u b̄a ndai la Ibrahim mpoa, 24 pala d̄i ru'u b̄a ndai rau. Ndai rau ratarima kai dou ma kasana wea ade Allah Ta'ala, b̄ara ndai imbita d̄i Allah Ta'ala ma wa'ura kamori mbali Isa, Ruma ndaita. 25 Isa ede wa'ura made b̄ara dosa-dosa ndaita; edempara Sia kamori mbali b̄a Allah Ta'ala ^dikandad̄ikaina ndai taho mbali lab̄o Allah Ta'ala.