Mbolo ro mafaka d̄i Yerusalem
15:1-21
15
Wara pila-pila dou d̄i Yudea lao aka Antiokhia ro ngoa ro teina dou-dou ma imbi d̄i Antiokhia ede b̄a one nggara siad̄oho watisi sunana b̄une ra nggahi ade Kitab Taurat, siad̄oho wati loa d̄ikasalama. 2 La Paulus ro la Barnabas cence ncihina lab̄o dou-dou ede mab̄oha au ra nggahi b̄a siad̄oho.Cumpukaina siad̄oho katantuna b̄a one la Paulus lab̄o la Barnabas ro pila-pila dou ma kalai d̄i Antiokhia d̄imalao aka Yerusalem d̄imanuntuna masa'ala ede lab̄o rasul-rasul ro dou-dou mana'ekaina ta aka.3 Ela Ruma d̄i Antiokhia lao otona siad̄oho sampe ari mai b̄a kota, edempara siad̄oho laona ta ncai dana ro rasa Fenisia ro Samaria. Ta aka siad̄oho caritana ra^bunena dou-dou ma laina Yahudi tobakaina ro pakina rawina ma iha ro d̄onggona weki d̄i Allah Ta'ala. Haba ede nakaneo podaku ade dou-dou ma imbi ta ede. 4 Wakatu siad̄oho rakara Yerusalem, siad̄oho tarima ao kataho b̄a ela Ruma, rasul-rasul ro dou-dou mana'ekaina. Edempara siad̄oho caritana d̄i dou-dou ede mab̄oha samenana au ra karawi b̄a Allah Ta'ala kai ncai siad̄oho. 5 Pala pila-pila dou d̄i kalompo Farisi ma wa'ura imbi, tu'u kad̄ina ro nggahina, <<Dou-dou bangsa makalaina ma wa'ura imbi ede pab̄uaku ^disuna ro ^dikau pab̄ua b̄atu hukum Taurat.>>
6 Edempara rasul-rasul ro dou-dou mana'ekaina kab̄orona weki ^dimafakakaina lampa rawi ede. 7 Ntoi poda siad̄oho nuntuna mab̄oha lampa rawi ede. Edempara la Petrus tu'u kad̄ina ro nggahina, <<Cina ro angi! Ndai nggomid̄oho mawa'ura b̄ade b̄a one pila-pila nai ma rawa'u, Allah Ta'ala ma rakad̄alena nahu d̄i ade woha nggomid̄oho d̄imangoa ro kahaba Haba Mataho ede d̄i ru'u b̄a dou-dou ma laina Yahudi, loakud̄u siad̄oho rau ringa ro imbina Ruma. 8 Ro Allah Ta'ala ma pata ade manusia wa'ura katadana b̄a one Sia matarima sia^doho; Sia katadana lampa rawi ede kai mbeina d̄i siad̄oho Roh Allah sama b̄une ra mbei b̄a Sia d̄i ndai rau. 9 Allah Ta'ala wati ntanda kalaina ndai lab̄o siad̄oho.Sia karasona ade siad̄oho, b̄ara siad̄oho imbina. 10 Nggara ndedesi, b̄ab̄auku nggomid̄oho ne'ekaimu uji Allah Ta'ala kai kau pa^buamu karawi ma tani d̄i ru'u b̄a dou-dou ma imbi ake, wa'i ro waro ndai ro ndai rau wati wa'uta kalampa, lampa rawi ede? 11 Pala, ndai ta'imbiku ro rakata salama b̄ara kasi ade Ruma Isa; sama b̄une siad̄oho.>>
12 Ndad̄i midi mena dou ma kab̄oro weki ta ede. Edempara siad̄oho kade'ena la Barnabas ro la Paulus ma carita mbalina sara'a lampa rawi ma^bisa ro guna ro lampa rawi-lampa rawi mana'e ra wa'u karawi b̄a Allah Ta'ala kai ncai siad̄oho d̄i ade woha dou-dou bangsa ma kalaina ma laina Yahudi. 13 Sawa'u b̄a siad̄oho nggori nuntuna ede, nggahi la Yakub, <<Cina ro angi! Takade'epu nggahi nahu. 14 La Simon b̄oupu ngoa kab̄aena b̄uneku Allah Ta'ala ra'aipu saramba wa'una katadana meci ro ca'u-Na d̄i dou-dou ma laina Yahudi, kai ne'ena kad̄ale d̄i ade weki siad̄oho dou-dou ma kalai d̄imandad̄i ela-Na. 15 Ede ncihi ncao lab̄o nggahi ro eli Ruma ade Kitab Suci ra karongga b̄a nabi-nabi. B̄a one wara ratunti,
16 nggahi Ruma, <Sawa'u b̄a ede Nahu d̄imamai wali,
Nahu d̄imatu'u mbalina uma la Daud ma wa'ura ndumba,
ro makataho wea b̄ara ndumbana,
sawa'u b̄a ede Nahu ^dimakatenggona;
17 loakud̄u sara'a dou ma mbuipu wara ede ngupana Ruma,
sama-sama lab̄o sara'a bangsa ma laina Yahudi ra wa'u ou b̄a Nahu d̄imandad̄i ntau Nahu.>
Ndedeku nggahi b̄a Ruma,
18 ma wa'ura ngoa ulu lampa rawi ede ra aipu ntoi wa'una.>>
19 <<Ndad̄i kananu b̄a nahu,>> nggahi la Yakub, <<Ndai wati loata kasusa dou-dou ma laina Yahudi ede ma wa'ura d̄onggo wekina d̄i Allah Ta'ala. 20 Pala ndai pab̄uaku tunti sura d̄i ru'u b̄a siad̄oho ro mangoa ro tei kataho siad̄oho loakud̄u siad̄oho aina ngahana, ngaha ro nono ra wa'u d̄onggo ro mbei d̄i berhala, atao ngaha hi'i binata ma made rake'e, atao ngaha ra'a. Ro loakud̄u siad̄oho kad̄o'ona weki ra d̄i ruku ro rawi ma da^bae. 21 B̄ara hukum Taurat ntoi wa'ura rabaca wea d̄i sanikina ainaina Sabat d̄i uma-uma sambea ro ibadakai, ro rangoa ro kahaba d̄i sanikina kota.>>
Sura d̄i ru'u b̄a dou-dou bangsa makalai ma wa'ura imbi
15:22-34
22 Rasul-rasul ro dou-dou mana'ekaina, sama-sama lab̄o sara'a ela Ruma ede wehana nggahi cumpukai ^dimakad̄alena pila-pila dou d̄i ade weki siad̄oho ^dinggadu aka Antiokhia sama-sama lab̄o la Paulus ro Barnabas. Edempara siad̄oho kad̄alena la Silas lab̄o la Yudas ^dipehe rau kai la Barsabas. ^Dua dou ake eded̄u dou ra kaco'i d̄i ade weki dou-dou ma imbi d̄i Yerusalem. 23 Sama-sama lab̄o dou ra nggadu ede siad̄oho nggadu rauna salela sura. Ndakeku isi surana,
<<D̄i ru'u b̄a cina ro angi bangsa ma laina Yahudi, ma ngge'e d̄i Antiokhia, Siria ro d̄i Kilikia. Salam do'a nami, rasul-rasul ro dou-dou mana'ekai, eded̄u cina ro angimu d̄i Yerusalem. 24 Ringa b̄a nami haba, wara pila-pila dou d̄i ade weki nami ma wa'ura lao ngoa ro tei nggomid̄oho mab̄oha lampa rawi makamaina darura ade nggomid̄oho.Sapodakaina nami wati kaumu siad̄oho karawi b̄une ede. 25 B̄ara ndedena nami wa'ura mafakamu ro kasab̄uamu nggahi ^dimakad̄ale pila-pila dou ro nggadumu siad̄oho d̄i ru'u b̄a nggomid̄oho.Siad̄oho d̄imalao sama-sama lab̄o la Barnabas ro la Paulus ra meci ro ca'u b̄a nami. 26 D̄ua dou ake eded̄u dou ma wa'ura te'e nawana b̄ara Ruma Isa Al Masih, Ruma ndaita. 27 Ndad̄i, nami manggadu la Yudas ro la Silas d̄i nggomid̄oho.Ndai sia^dohoku d̄imangoana d̄i nggomid̄oho mab̄oha haba b̄une ra tunti ade sura ake. 28 Kai d̄anda ro wa'a b̄a Roh Allah, nami wa'ura kasab̄uamu nggahi loakud̄u nggomid̄oho wati ^dikau pab̄ua su'u ro tundu lampa rawi ma ncewi tani ntewikaisi lab̄o lampa rawi d̄isu'u ro tundu d̄i pab̄ua kalampa; 29 nggomid̄oho aina ngahamu: ngaha ro nono ra wa'ura d̄onggo ro mbei d̄i berhala; aina ngaha ra'a, aina ngaha hi'i ma made ra ke'e, ro kad̄o'opu wekimu d̄i lampa rawi ma sampu ro nggele. Nggara ma kad̄o'osi wekimu d̄i lampa rawi ede, nggomid̄oho wa'ura karawimu lampa rawi ma taho. Sandede wa'u mpa, salam nami!>>
30 Sawa'u b̄a rahona weki, la Yudas ro la Silas laona aka Antiokhia. Ta aka siad̄oho ou sara'ana ela Ruma ro kauna kab̄oro weki edempara karonggana sura ede. 31 Wakatu baca b̄a ela Ruma sura ede, siad̄oho neo poda adena b̄ara isi sura ede ma katenggona ade siad̄oho. 32 La Yudas ro la Silas eded̄u nabi rau, nantoiku nuntuna lab̄o cina ro angi ma imbi d̄i Antiokhia ede. La Yudas ro la Silas kauna siad̄oho kapoda ade ro disa. 33 Sawa'u b̄a la Yudas ro la Silas ngge'ena ta aka pila-pila wakatu ntoina, dou-dou ma imbi d̄i Antiokhia ede nggadu mbalina siad̄oho ro kauna siad̄oho karongga salam d̄i dou-dou ma ranggadu siad̄oho. 34 Pala la Silas wa'ura katantuna b̄a one sia ^dimangge'e d̄i Antiokhia.
La Paulus cence ncihina lab̄o la Barnabas
15:35-41
35 La Paulus ro la Barnabas ngge'ena pila-pila wakatu ntoina d̄i Antiokhia. Ta aka siad̄oho ngoa ro teina ro kahabana nggahi ro eli Ruma sama-sama lab̄o dou mamboto ma kalaina.
36 Pila-pila wakatu sawa'u b̄a ede nggahi la Paulus d̄i la Barnabas, <<Mai ndai tadula mbaliku. Ndai talao lambaku cina ro angi ma imbi d̄i Isa Al Masih d̄i samenana kota, ra wa'u karonggakai b̄a ndai nggahi ro eli Ruma d̄ib̄adekai b̄uneku habana siad̄oho.>> 37 La Barnabas nane'eku wa'a la Yahya ^dipehe rau kai la Markus, 38 pala nggahi la Paulus wati tahona wa'a la Markus, ma wati ngawa karawi sama lab̄o siad̄oho ro matu'u wi'i siad̄oho d̄i Pamfilia. 39 Edempara la Paulus lab̄o la Barnabas ndad̄i cence ncihi poda, ndad̄i cumpukaina siad̄oho cua lao ncengga angina: La Barnabas wehana la Markus ro lao lojana lab̄o sia aka Siprus. 40 La Paulus kad̄alena la Silas edempara lao lab̄ona sia sawa'u b̄a cina ro angi ma sama imbi d̄i Antiokhia ede d̄onggona siad̄oho d̄i Ruma loakud̄u jaga ro sandaka b̄a Ruma. 41 Siad̄oho rau lao kalilina dana ro rasa Siria ro Kilikia; ta aka siad̄oho ngoa ro teina d̄i katenggokaina ade ela Ruma.