D̄i Ikonium
14:1-7
14
La Paulus lab̄o la Barnabas na'iuku lampa rawi ma sama d̄i Ikonium. Siad̄oho lao rauna aka uma sambea ro ibadakai Yahudi ro caru cara teina ndad̄ina mboto dou Yahudi ro ma laina Yahudi ndad̄i imbi d̄i Isa Al Masih. 2 Pala dou-dou Yahudi ma wati ngawa imbi, nasa^du'uku dou-dou ma laina Yahudi, ndad̄i siad̄oho nakamaiku iha ade dou-dou ma imbi d̄i Isa. 3 B̄ara ndedena la Paulus lab̄o la Barnabas ngge'e ntoina ta ede. Ro kai disana siad̄oho nuntu ro nggahina mab̄oha Ruma. Ndad̄i Ruma rau mbeina bukuti b̄a one haba ra karongga b̄a siad̄oho mab̄oha meci ro ca'u-Na ede napodaku; Sia mbeina d̄i siad̄oho kuasa ^dimakarawina lampa rawi-lampa rawi ma^bisa ro guna ro lampa rawi-lampa rawi ma na'e poda. 4 Pala dou-dou d̄i kota ncengga d̄ua ndad̄i d̄ua kalompo; wara ma horu dou-dou Yahudi ro wara mahoru rasul-rasul ede.5 Edempara dou-dou Yahudi lab̄o dou ma tua-tuakaina sama-sama lab̄o dou-dou ma laina Yahudi kasamana weki ne'e kancoki ro nane'eku tob̄a hade rasul-rasul ede kai wadu. 6 Pala rasul-rasul ede nab̄adeku au d̄imandad̄i ede, edempara siad̄oho lao pesona weki aka Listra ro Derbe, eded̄u kota-kota d̄i Likaonia, ro d̄i dana ro rasa d̄i kompe ro peina. 7 D̄i dana ro rasa ede siad̄oho ngoa ro kahaba walina Haba Mataho ma ramai ra d̄i Allah Ta'ala ede.
D̄i Listra ro Derbe
14:8-20
8 D̄i Listra waraku sab̄ua dou mone ma mapu sadompo ed̄ina ra tampu'u aipu wara wa'una, ndad̄ina sia watipu iuna loa lampa, b̄ara ed̄ina na'ipiku mapuna. 9 Dou ede dohona ta aka ^dikade'ekaina nggahi ro eli la Paulus. La Paulus na'edaku b̄a one dou ede na'imbiku ro b̄ara ndedena sia loa ^dikataho wea supuna. Edempara la Paulus ntanda kab̄aena sia 10 ro kai elina ma na'e nggahi la Paulus, <<Tu'u ki^dira!>> Dou ede nggoncu kad̄ina edempara lampana. 11 Wakatu eda b̄a dou mamboto au ra karawi b̄a la Paulus, siad̄oho kanggicana kai nggahi Likaonia, <<Dewa-dewa wa'ura londona d̄i dunia kai pahu manusia.>> 12 Edempara la Barnabas tangarakai b̄a siad̄oho la Zeus, ro la Paulus tangarakaina la Hermes, b̄ara siaku ma nuntu ro nggahi. 13 Imam makarawi d̄i hid̄i nembakai Dewa Zeus ma wara ari mai b̄a kota, mai wa'ana capi-capi rangga ro ^bunga-^bunga aka tad̄a lawa kota. Sia nane'eku b̄atu lab̄o dou mamboto ede ne'e d̄onggo ro mbei koroba d̄i rasul-rasul ede.
14 Wakatu la Barnabas ro la Paulus ringana au d̄i ne'e karawi b̄a dou-dou ede, siad̄oho sipa-sipana kani ro lombona ro rai rakana dou mamboto ede, edempara kanggicana, 15 <<Oe, b̄ab̄auku nggomid̄oho karawikaimu ake? Nami ake manusia rau sama b̄une nggomi^doho! Nami waramu ta ake d̄imangoa ro kahaba mab̄oha Haba Mataho d̄i nggomid̄oho loakud̄u nggomid̄oho pakimu lampa rawi-lampa rawi ma wati wara onena ake ro maipu d̄i Allah Ta'ala ma mori, makandad̄ina langi ro dana, moti ro sara'a ma wara ta ^deina. 16 Aipu wakatu Allah Ta'ala co'ona bangsa-bangsa mori b̄atuna b̄e rakane'ekai b̄a ndai siad̄oho. 17 Pala Sia wati nefana mbei bukuti-bukuti mab̄oha weki ndai-Na, eded̄u kai karawi-Na ma taho. Sia mbeina ura ra d̄i langi ro hasi dana d̄i wakatu oruna. Sia mbeina d̄i nggomid̄oho ngaha ro nono ro kasana weana ademu.>> 18 Pala kai nggahi ro eli ede mbuipu nggonggi rauna rasul-rasul ede tapana dou-dou ede mai d̄onggo ro mbei koroba d̄i siad̄oho.
19 Pila-pila dou Yahudi ma mai ra d̄i Listra, Antiokhia, Pisidia ro ra d̄i Ikonium masa^du'u dou-dou mamboto ede ndad̄ina dou mamboto ede mahoruna siad̄oho.Siad̄oho tob̄ana la Paulus kai wadu, edempara randa kalosana sia ari mai b̄a kota. Kacai b̄a siad̄oho sia nawa'ura made, 20 pala wakatu dou-dou ma imbi ta ede ma kid̄i hekona, sia tu'una ro lu'u mbalina aka kota. B̄ala aisanai sia laona aka Derbe sama-sama lab̄o la Barnabas.
La Paulus ro la Barnabas dula mbalina aka Antiokhia
14:21-28
21 D̄i Derbe, la Paulus ro la Barnabas ngoa ro kahabana Haba Mataho ede ro mboto dou ma ndad̄i imbi d̄i Isa Al Masih. Sawa'u b̄a ede siad̄oho lao mbalina aka Listra, edempara laona aka Ikonium, ro aka Antiokhia d̄i Pisidia. 22 D̄i kota-kota ede siad̄oho katenggona ade dou-dou ma b̄atu Isa ro ngoa ro tei katahona siad̄oho loakud̄u siad̄oho ngge'e mpa imbina d̄i Isa. <<Ndai pab̄uaku mboto iu susa ro ncoki ulu wa'u, ampona ndai taloa iu mori sana d̄i Karaja'an Allah,>> ndedeku rasul-rasul ede ngoa ro teina d̄i dou-dou ma imbi d̄i Isa d̄i kota-kota ede. 23 Ro d̄i sanikina ela Ruma, la Paulus ro la Barnabas hantana dou-dou mana'ekaina d̄i ru'u b̄a ela Ruma ede. Edempara kai do'a ro puasana, siad̄oho d̄onggona dou-dou mana'ekaina ede d̄i Ruma ra wa'u imbikai b̄a siad̄oho.
24 Sawa'u b̄a ede la Paulus ro la Barnabas lampa ro lao walina, siad̄oho lampa saina dana ro rasa Pisidia ro saraka aka Pamfilia. 25 Ro sawa'u b̄a siad̄oho ngoa ro kahabana nggahi ro eli Allah Ta'ala d̄i Perga, siad̄oho laona aka Atalia. 26 Ra d̄i Atalia siad̄oho lojana dula mbali lao aka Antiokhia. Edeku kota hid̄i siad̄oho ntoina ra^donggo d̄i rahmat Allah, loakud̄u siad̄oho kalampana taki ma wakatu ake wa'ura kanggori b̄a siad̄oho.
27 Wakatu ronggana aka Antiokhia, siad̄oho kab̄orona dou-dou ela Ruma ede, edempara carita sara'ana au ra karawi b̄a Allah Ta'ala kai ncai siad̄oho.Siad̄oho carita rauna mab̄oha ra b̄unena Allah Ta'ala wa'ura henggana ncai loakud̄u dou-dou ma laina Yahudi imbina d̄i Isa Al Masih. 28 D̄i kota ede la Paulus ro la Barnabas ngge'e ntoina lab̄o dou-dou ma imbi.