La Barnabas lab̄o la Saulus
13:1-3
13
D̄i ade weki ela Ruma d̄i Antiokhia wara nabi-nabi ro guru-guru, eded̄u la Barnabas, la Simeon ^di'ou rau kai la Me'e, la Lukius dou Kirene, la Menahem ra kana'e sama lab̄o Sangaji Herodes,r ro la Saulus. 2 Wakatu siad̄oho wunga sambea ro ibadana d̄i Ruma ro puasana, nggahi Roh Allah d̄i siad̄oho, <<Kad̄alepu la Barnabas lab̄o la Saulus d̄i ru'u b̄a Nahu mpoa mpa, loakud̄u siad̄oho karawina rawi ra wa'u katantukai b̄a Nahu d̄i ru'u b̄a siad̄oho.>> 3 Sawa'u b̄a nggori puasa ro do'a, siad̄oho tohona rima ese wawo la Barnabas lab̄o la Saulus edempara nggaduna siad̄oho d̄uana ede.
La Saulus lab̄o la Barnabas d̄i Siprus
13:4-12
4 B̄ara parenta b̄a Roh Allah, la Barnabas ro la Saulus lao aka Seleukia, edempara siad̄oho lojana lao aka Siprus. 5 Wakatu rongga aka Salamis, siad̄oho ngoa ro kahabana nggahi ro eli Allah Ta'ala d̄i uma-uma sambea ro ibadakai dou Yahudi. La Yahya Markus ma bantuna siad̄oho ade lampa ro laokaina.
6 Sara'a pulau ede lampa kalili rero b̄a siad̄oho saraka aka Pafos. Ta aka siad̄oho eda angina lab̄o sab̄ua dou Yahudi ma ngara la Baryesus. Sia dou mataki sihi ma kanahu weki nabi. 7 La Sergius Paulus, gubernur pulau ede eded̄u soba ^denina lab̄o dou mataki sihi ede. Gubernur ede eded̄u sab̄ua dou ma loa timba ro lemba. Sia ouna la Barnabas ro la Saulus b̄ara sia nane'e ringa nggahi ro eli Allah Ta'ala. 8 Pala la Barnabas ro la Saulus wati ca'u b̄a la Baryesus dou ma ahli sihi ede, b̄ara la Elimas edeku ngarana ade nggahi Yunani ngupana ncai loakud̄u gubernur ede ai to'ina imbi d̄i Isa. 9 Pala la Saulus -- ^dipehe rau kai la Paulus -- kuasakai b̄a Roh Allah, ndad̄ina sia ntanda ti^dina dou maloa sihi ede, 10 edempara nggahina, <<Nggomi b̄une Iblis ma ca'u tipu ro mada^bae! Nggomi musu b̄a samenana ma taho. B̄ab̄auku nggomi wati ne'ekaimu dengga ka'iha au ra nia b̄a Allah Ta'ala ma kasalama manusia? 11 Ake tiopu, Ruma ^dimahukumna nggomi! Nggomi d̄imambuda, sampe nggomi wati loamu eda wali taroa liro pila-pila nai ntoina.>>
Wakatu ede wa'u la Baryesus iuna wara apu ma me'e ma b̄onto madana, ndad̄ina sia lampa ^daro ro ngupana dou ^dima^dandana. 12 Wakatu eda b̄a gubernur au ma ndad̄i ede, sia imbina d̄i Isa, b̄ara sia na'ipiku ca'una d̄i ngoa ro tei mab̄oha Ruma.
Aka Antiokhia d̄i Pisidia
13:13-52
13 La Paulus lab̄o lenga^dohona tu'u wi'ina dana ro rasa Pafos ro lojana lao aka Perga d̄i Pamfilia. Ta ede la Yahya tu'u wi'ina siad̄oho, edempara dula mbalina aka Yerusalem. 14 Ra d̄i Perga, siad̄oho lampa ro lao walina lao aka Antiokhia d̄i Pisidia, edempara d̄i ainaina Sabat siad̄oho lao dohona d̄i ade uma sambea ro ibadakai. 15 Sawa'u b̄a baca b̄a dou Kitab Taurat ro Buku Nabi-nabi, dou-dou mana'ekai uma sambea ro ibadakai ede kauna dou sod̄i d̄i la Paulus ro lenga^dohona, <<Cina ro angi, nggara warasi d̄i ngoa ro teimu d̄i ru'u b̄a dou-dou ake, takarongga to'ipu ngoa ro tei ede.>> 16 La Paulus kad̄i lalona, edempara mbeina tanda kai rimana loakud̄u dou-dou ede midina ro nggahi sia,
<<Cina ro angiku bangsa Israel ro samenana cina ro angi ma kalaina ma wara ta ake ma to'a d̄i Allah Ta'ala! Taringa ro kade'e to'ipu nggahi nahu: 17 Allah Ta'ala bangsa Israel wa'ura kad̄alena wa'i ro waro ndaita, ro kandad̄ina bangsa ake bangsa ma na'e aipu wakatu siad̄oho ngge'ena d̄i Mesir kai dou lai rasa. Edempara kai kuasana ma wancu na'e, Allah Ta'ala wa'a kalosana siad̄oho d̄i Mesir. 18 Sia lembo ade-Na d̄i ruku ro rawi sia^dohos d̄i so sarae 40 mba'a ntoina. 19 Pidu mbua bangsa kaleli b̄a Sia d̄i dana ro rasa Kana'an d̄i cengga-cenggakaina dana ro rasa ede d̄i ru'u b̄a bangsa Israel loakud̄u dana ro rasa ede d̄imandad̄i ntau siad̄oho. 20 Sara'ana ede ndad̄ina 450 mba'a ntoina.
Sawa'u b̄a cengga-cenggana dana ro rasa Kana'an ede,t Allah Ta'ala mbeina d̄i siad̄oho hakim-hakim. Hakim ma cumpukaina eded̄u Nabi Samuel. 21 Edempara siad̄oho rahona sab̄ua dou sangaji. Allah Ta'ala mbeina d̄i siad̄oho la Saul ana la Kis suku bangsa Benyamin d̄imandad̄i sangaji siad̄oho 40 mba'a ntoina. 22 Sawa'u b̄a Allah Ta'ala kalondona b̄ora sia, Allah Ta'ala hantana la Daud d̄imandad̄i sangaji siad̄oho.Ro akeku ra nggahi b̄a Allah Ta'ala mab̄oha la Daud, <Nahu wa'ura rakaku la Daud ana la Isai ede sab̄ua dou makasana wea ade Nahu. Siaku dou ^dimakarawina au ra kane'ekai b̄a Nahu.> 23 Ra d̄i londo ro mai la Daud edeku Allah Ta'ala masadiana d̄i ru'u b̄a bangsa Israel eded̄u Sangaji Makasalama,b̄une ra sake-Na. Ro Isa Al Masih edeku Sangaji Makasalama ede. 24 Sawatipu Isa kalampana takina, la Yahya wa'ura nggahina d̄i dou-dou Israel loakud̄u siad̄oho pakina rawina madab̄ae ro raho kangampu d̄i Ruma ro d̄ikandeu raso. 25 Ro ^denira nggorikai karawina, nggahi la Yahya d̄i dou-dou, <Nggahi b̄a nggomid̄oho, couku nahu ake? Nahu laina Dou ra ngena b̄a nggomid̄oho.Kawarapu, Dou ede d̄imamai sawa'u b̄a nahu; kone ^dimaruncu wea sadopa-Na, nahu wati patuna.>
26 Cina ro angi londo ro mai la Ibrahim, ro sara'a cina ro angi ma kalaina ta ake ma to'a d̄i Allah Ta'ala! Allah Ta'ala wa'ura karonggana d̄i ndai haba d̄isalamakai ede; 27 b̄ara dou-dou ma ngge'e d̄i Yerusalem ro dou-dou mana'ekaina siad̄oho wati ngawana imbi d̄i Isa. Siad̄oho wati loana ka'ao au ra ngoa ro tei b̄a nabi-nabi ra baca wea d̄i saniki ainaina Sabat, ndad̄ina Isa hukum b̄a siad̄oho.Pala b̄ara karawina b̄une ede siad̄oho makandad̄ina au ra karongga ulu b̄a Ruma d̄i nabi-nabi ede poda-poda nda^dina. 28 Konena siad̄oho wati loana raka bukuti d̄i Sia ma patu d̄i^ba^bu kai hukuman made, pala siad̄oho rahona d̄i la Pilatus loakud̄u Sia ^dihade. 29 Ro sawa'u b̄a siad̄oho kanggori sara'a karawina b̄une ra tunti ade Kitab Suci mab̄oha Sia, siad̄oho kalondona timba-Na ra d̄i haju salib, edempara karu wi'ina Sia d̄i ade rade. 30 Pala Allah Ta'ala makamori mbalina Sia ra d̄i woha dou ma made. 31 Edempara pila-pila kali Sia mai katadana weki d̄i dou-dou ma wa'ura mai lab̄o Sia ra d̄i Galilea lao aka Yerusalem. Siad̄oho edeku wakatu ake ma wunga ngoa ro kahaba mab̄oha Sia d̄i bangsa Israel. 32 Ndad̄i, ake nami makaronggana Haba Mataho ede d̄i ru'u b̄a nggomi^doho: Au ra wa'u sake b̄a Allah Ta'ala d̄i wa'i ro waro ndai, 33 ede wa'ura karawi b̄a Allah Ta'ala d̄i ndai kai kamori mbalina Isa ra d̄i madekaina. B̄a one ade Kitab Zabur ma ka^duakaina wara ratunti,
<Nggomiku Ana Nahu,
d̄i ainaina ake Nahu wa'ura ndad̄i Ama-Mu.>
34 Allah Ta'ala wa'ura kamori mbalina Isa ra d̄i woha dou ma made. Ake Sia wati d̄ima'iu wali made d̄i ade rade. mab̄oha lampa rawi ede nggahi Allah Ta'ala,
<Nahu d̄imambei Nggomi sake maraso ma loa ^di'imbi ma wati loa ^dirungka,
ra wa'u sake b̄a Nahu d̄i la Daud.>
35 Ndede rau d̄i ade ayat makalai nggahina,
<Ita wati co'omu Ada-Mu ma to'a ede mbai d̄i ade rade.>
36 La Daud wa'ura made ro ra umbu rau sama-sama lab̄o wa'i ro warona, sawa'u b̄a sia karawina au ra kaukai b̄a Allah Ta'ala d̄i sia. Timba la Daud rau wa'ura leli mpoi sara'ana. 37 Pala Isa, ra kamori mbali b̄a Allah Ta'ala ra d̄i woha dou ma made, Isa ede wati lelina. 38-39 B̄ara ndedena cina ro angi, nggomid̄oho pab̄uapu b̄ademu b̄a one kai ncai Isa ake haba mab̄oha kangampu wea dosa d̄ingoa ro kahaba d̄i nggomi^doho; nggomid̄oho pab̄uapu b̄ademu b̄a one sanikina dou ma imbi d̄i Sia, ^dikangampu wea sara'a dosana ma wati loa ^difura kai ncai parenta Allah Ta'ala ra karongga b̄a la Musa mpoa. 40 B̄ara ndedena nggomid̄oho pab̄uapu kawara ka^baemu, ai to'ina ndad̄ina d̄i nggomi^dohou au ra nggahi b̄a Ruma kai ncai nabi-nabi ake,
41 <Kade'e ka^baepu, oe nggomid̄oho ma ca'u kab̄awa ro katuna!
Nggomid̄oho ^dimambora aka, edempara lelimu!
B̄a one d̄i jaman ake, Nahu wunga kalampaku rawi eded̄u karawi ma wati ^di'imbi b̄a ndai nggomid̄oho,
konena wara dou ma ngoa kab̄aena d̄i nggomi^doho.> >>
42 Wakatu la Paulus ro la Barnabas tu'u wi'ina uma sambea ro ibadakai ede, dou-dou ede rahona d̄i siad̄oho mai wali d̄i ainaina Sabat makento, ^dimatei kab̄ae walina mab̄oha lampa rawi ede. 43 Sawa'u b̄a losa dou-dou d̄i ade uma sambea ro ibadakai ede, la Paulus ro la Barnabas lampa b̄atu b̄a dou Yahudi mamboto ro dou bangsa makalai ma wa'ura lu'u agama Yahudi. Edempara rasul-rasul ede ngoa ro tei katahona siad̄oho loakud̄u siad̄oho ngge'e mpa wi'i wekina d̄i rahmat Allah.
44 D̄i ainaina Sabat makentona, ne'empara sara'a dou d̄i kota ede, mai kade'ena nggahi ro eli Allah Ta'ala. 45 Wakatu eda b̄a dou-dou Yahudi dou mamboto ede, siad̄oho na'ipiku hiana adena. Siad̄oho kab̄awa ro katunana la Paulus ro wati ca'una kade'e d̄i sara'a au ra nggahina. 46 Pala kai ipi disa wali la Paulus ro la Barnabas nuntu ntirina. Nggahi siad̄oho, <<Nggahi ro eli Allah Ta'ala pab̄uaku ^dikarongga ulu d̄i nggomid̄oho. Pala b̄ara nggomid̄oho wati ne'emu tarima, nggomid̄oho wa'ura katantu b̄a ndaimu b̄a one nggomid̄oho wati patuna d̄imatarima mori ma sapodakaina ro ma ede ro hi^di. Ro ake nami matu'u wi'i nggomid̄oho ro lao aka bangsa makalai. 47 B̄a one akeku ra kaukai b̄a Ruma d̄i nami; nggahi Ruma,
<Nahu ma wa'ura katantuna nggomi d̄imandad̄i taroa d̄i ru'u b̄a dou-dou bangsa makalai ma laina Yahudi,
loakud̄u kai ncai nggomid̄oho Allah Ta'ala ^dimakasalamana sara'a bangsa.> >>
48 Wakatu dou-dou bangsa makalaina ma laina Yahudi ringana lampa rawi ede, siad̄oho na'ipiku neo adena, edempara roi ro wadina nggahi ro eli Allah Ta'ala. Ro dou-dou ma wa'ura katantukai b̄a Allah Ta'ala d̄imaraka mori ma sapodakaina ro ma ede ro hi^di, dou-dou ede na'imbi.
49 Nggahi ro eli Ruma d̄ingoa ro kahaba d̄i sara'a dana ro rasa ede. 50 Pala dou-dou mana'ekai kota ede ro dou-dou siwe d̄i kalompo dou-dou mana'e b̄ora ma dahu d̄i Allah Ta'ala, sa^du'u b̄a dou-dou Yahudi. Siad̄oho kandad̄ina dou ndad̄i musu la Paulus ro la Barnabas, ro katesana siad̄oho d̄uana d̄i dana ro rasa ede. 51 Ndad̄i rasul-rasul ede furana kalub̄u d̄i ed̄i siad̄oho d̄i tando dou-dou ede d̄imandad̄i tanda kawarakai siad̄oho, edempara laona aka Ikonium. 52 Dou-dou ma'imbi d̄i Antiokhia na'ipiku neo adena ro kuasakai b̄a Roh Allah.