La Hosea Sangaji Israil
17
D̄i mba'ana kasampuru d̄uakaina, parentakai sangaji Ahas, d̄i Yehuda, la Hosea ana la Ela mandad̄i sangaji Israil , ro sia parentakaina d̄i dana ro rasa samaria ciwi mba'a ntoina. 2 La Hosea karawina dosa d̄i RUMA, pala dosana ede wati b̄une mboto dosa sangaji-sangaji Israil ma parenta sawatipu b̄a sia. 3 Sia ralewa ro kuasakai b̄a la Salmaneser sangaji Asyur, ndad̄ina saniki mba'a sia pab̄uaku colana bea d̄i sangaji Asyur. 4 Pala d̄i sab̄ua wakatu, la Hosea kakaina dou lao aka la So sangaji Mesir d̄irahokaina bantu d̄i la sangaji So. Edempara la Hosea denggana cola bea niki mba'a d̄i sangaji Asyur. Wakatu b̄ade b̄a la Salmaneser mab̄oha au ra wa'u karawi b̄a la Hosea ede, sia wa'una la Hosea ro kalu'una ade uma bui.Koana Samaria/Koana Kerajaan Israil
5 Sawa'u b̄a ede la Salmaneser sangaji Asyurs lao lewana lab̄o Israil ro dei hekona Samaria. D̄i mba'ana katolukaina ade dei hekokaina ede, 6 -- eded̄u mba'ana makaciwikaina ade parentakai la Hosea -- la Salmaneser kakoa ro kuasakaina Samaria. Edempara sia lao wa'ana dou Israil kai dou rabui b̄ara lewa aka Asyur. Sarunde weki dou rabui ede, wi'i b̄a sia d̄i kotaHalah, sarundena wi'i b̄a sia d̄eni lab̄o sori Habor d̄i dana ro rasa Gozan, ro sarunde walina d̄i kota-kota d̄i dana ro rasa Madai.
7 Koakai Samaria b̄ara dou Israil wa'ura karawina dosa d̄i RUMA, Allah Ta'ala siad̄oho, ma wa'ura kasalama siad̄oho d̄i sangaji Mesir (Firaun), ro marawa'a kalosa siad̄oho d̄i dana ro rasa ede. Siad̄oho nembana dewa-dewa 8 ro b̄atuna rawi rasa bangsa-bangsa ra wa'u katesa kalosa b̄a RUMA d̄i wakatu bangsa Israil lao lewana lab̄o bangsa-bangsa ede. Bangsa Israil (dou Israil ) nab̄atuku rawi ranginakai ra wa'u katantukai b̄a sangaji-sangaji Israil , 9 ro karawina lampa rawi-lampa rawi ma wati ca'u b̄a RUMA, Allah Ta'ala siad̄oho. Siad̄oho tu'una hid̄i-hid̄i d̄inembakai dewa d̄i sara'a kota siad̄oho, nataho d̄i kota to'i ro d̄i kota na'e. 10 D̄i wawo sanikina dore, ro d̄i wombo sanikina fu'u haju ma nggari (na'e), siad̄oho tu'una tugu-tugu ro patung-patung Dewi Asyera. 11-12 Siad̄oho ka'a rauna d̄upa/kamaya d̄i sara'a mezbah d̄i ru'u dewa, b̄une ranginakai bangsa-bangsa ra wa'u katesa kalosa b̄a RUMA d̄i dana ro rasa Kanaan. Siad̄oho nemba berhala (nemba dewa), kone wa'ura kanta b̄a RUMA. Samenana karawi siad̄oho ma dab̄ae nakamaiku mbani RUMA.
13 RUMA nggaduna dou-dou kakaina ro nabi-nabi-Na d̄i ru'u ela ro dou Israil ro Yehuda, d̄imakaronggana ngoa ro kawara ake: <<Denggara karawi madab̄ae, to'akaipu d̄isara'a parenta ro hukum ra wa'u mbei b̄a Nahu d̄i wa'i ro waromu ro d̄i ru'u nggomid̄oho kai ncai nabi-nabi, ada-ada Nahu ede.>> 14 Pala Israil lab̄o Yehuda wati ngawana kade'e au ra ngoa ro kawara ede. Siad̄oho natera tutana (adena) b̄une wa'i ro warona. Ro siad̄oho wati kandad̄iauna au ra rojo-rojo b̄a RUMA, siad̄oho nanaha sambea ro ibadaku d̄i berhala-berhala (dewa-dewa) ma wati wara one, ndad̄ina ndai siad̄oho rau wati wara onena. Siad̄oho nab̄atuku rawi bangsa-bangsa d̄i kompe ro pei siad̄oho, kone wa'ura kanta b̄a RUMA. 16 Siad̄oho sapana sara'a hukum RUMA, Allah Ta'ala siad̄oho, ro ndawina d̄ua mbua capi masa (romba) d̄inembana. Siad̄oho ndawi rauna patung Dewi Asyera, ro nembana ntara-ntara lab̄o sambea ro ibadana d̄i Dewa Baal. 17 Siad̄oho nad̄onggo ro mbeiku ana-anana ndad̄i koroba ka'a d̄i ru'u dewa. Ro siad̄oho nakani ilmu sangaji, na raho ngoa tei b̄a sando-sando ma loa hubunga angi lab̄o ruh-ruh. Siad̄oho na'ipi caha rau karawi, lampa rawi-lampa rawi ma wati kasana wea ade RUMA, 18 ndad̄ina RUMA na'ipiku mbani-Na d̄i siad̄oho ro watid̄u lab̄o walina siad̄oho. RUMA pakina siad̄oho ra d̄i dana ra wa'u mbei b̄a Sia d̄i siad̄oho; ma mbuipu wara kerajaan Yehuda mpoa mpa. 19 Ndede rau dou-dou Yehuda wati to'akaina d̄i hukum-hukum RUMA, Allah Ta'ala siad̄oho. Siad̄oho nab̄atuku rawi ranginakai b̄a dou Israil , 20 ndad̄i RUMA watid̄u ca'una d̄i sara'a ela ro dou Israil . RUMA ma hukum ro ma d̄onggo siad̄oho d̄i musu-musu siad̄oho ma toku ro kasa. Sia watid̄u lab̄ona siad̄oho, malaisi pakina siad̄oho ra d̄i dana ra wa'u mbei b̄a Sia d̄i ru'u siad̄oho.
21 Sawa'u b̄a RUMA cenggana Israil ra d̄i Yehuda, dou Israil hantana la Yerobeam ana la Nabot mandad̄i sangaji siad̄oho. Edempara la Yerobeam ndawina siad̄oho tu'u wi'i RUMA ro karawina dosa-dosa ma na'e.
22 Siad̄oho nab̄atuku au ra karawi la Yerobeam ro ngge'e mpa karawina sara'a dosa ra karawi b̄a la Yerobeam, 23 ndad̄ina RUMA watid̄u lab̄ona siad̄oho, malaisi pakina siad̄oho ra d̄i dana ra wa'u mbei b̄a Sia d̄i ru'u siad̄oho. Ede ndad̄i ncihi ncao lab̄o au ra wa'u ngoa ro kawora b̄a RUMA d̄i siad̄oho kai ncai ada-ada-Na, eded̄u nabi-nabi. Ndedeku dou Israil lao wa'a aka dana d̄i pakikai d̄i Asyur, ro d̄i Asyur edeku ngge'ekai siad̄oho sampe ainaina ake.
Dou-dou Asyur ngge'e impi d̄i Israil
24 D̄imacepe dou Israil ra wa'u lao wa'a aka hid̄i pakikai ede, sangaji Asyur tohona d̄i kota-kota Samaria,t eded̄u dou-dou ra d̄i Babel, Kuta, Awa, Hamat lab̄o dou-dou Sefarwaim. Doud̄oho ede makuasakai kota-kota ede ro ngge'e impi d̄i hid̄i ede. 25 D̄i wakatu saramba-rambana (tampu'u) siad̄oho ngge'ena d̄i kota ede siad̄oho wati to'ana d̄i RUMA; b̄a one ndedena RUMA kamaina singa-singa d̄imakumpa sarunde ra d̄i weki siad̄oho. 26 Edempara dou mai ngoana d̄i sangaji Asyur, b̄a one dou-dou ra wa'u toho b̄a sia d̄imangge'e d̄i kota-kota Samaria wati b̄adena hukum-hukum sambea ro ibadakai d̄i Allah Ta'ala dana ro rasa ede.>> 27 B̄ara ndedena sangaji Asyur parentana loakud̄u sab̄ua dou imam ade weki dou-dou rabui ra wa'u lao wa'a paki aka Asyur, d̄ikau lao mbali aka Samaria. Nggahi sangaji ede, <<Kaupu sia dula ro ngge'e d̄i hid̄i loakud̄u sia teina dou-dou ede mab̄oha hukum-hukum sambea ro ibadakai d̄i Allah Ta'ala dana ro rasa ede.>> 28 Ndad̄i sab̄ua dou imam Israil , ra wa'u wa'a ra d̄i Samaria lao aka Asyur, dula ro ngge'e d̄i Betel. Ta aka sia teina ela ro dou b̄uneku sapodakaina nemba RUMA.
29 Pala dou-dou ma ngge'e d̄i Samaria ede, ngge'e mpa ndawina dewa-dewa ndai siad̄oho ro tohona dewa-dewana ede ade kuil-kuil ra tu'u b̄a dou Israil ma ntoina siad̄oho ngge'ena d̄i kota ede. Sanikina kalompona ndawi dewa ndaina d̄i kota ma ngge'ekai b̄a siad̄oho: 30 Dou Babel nandawiku patung Dewa Sukot-Benot, dou Kuta ndawina patung Nergal, dou Hamat ndawina patung Asima, 31 dou Awa ndawina patung Nibhas ro Tartak, ro dou Sefarwaim nad̄onggo ro mbeiku ana-ana siad̄oho ndad̄i koroba ka'a d̄i ru'u Dewa Adramelekh ro ana Anamelekh. 32 Selasi nembana dewa-dewa ede, siad̄oho rau na nemba RUMA. Siad̄oho kad̄alena d̄i ade weki siad̄oho mboto dou d̄imakalampa taki ndad̄i imam ro d̄imad̄onggo ro mbei koroba d̄i kuil-kuil berhala. 33 Ndad̄i, siad̄oho nanemba RUMA, pala nanemba rau dewa-dewa ndai siad̄oho b̄une rawi rasa ranginakai d̄i dana ro rasa siad̄oho ntoina.
34 Sampe d̄i ainaina ake siad̄oho mbuipu kalampana rawi rasa ranginakai b̄a siad̄oho. Siad̄oho wati sambea ro ibadana d̄i RUMA ro wati kalamparauna (wati to'a rauna) d̄i hukum-hukum ro parenta-parenta RUMA ra mbei-Na d̄i londo ro mai la Yakub, ma d̄itangarakai rauna la Israil . 35 RUMA wa'ura ndawina sake ake lab̄o ela ro dou Israil , <<Aina sambea ro ibadamu d̄i dewa'dewa; aina suju nembamu dewa-dewa ede atao karawi weamu d̄i ru'u siad̄oho, atao d̄onggo ro mbeimu koroba d̄i ru'u siad̄oho. 36 Lia ro horomapu Nahu, RUMA, ma wa'ura wa'a kalosa nggomid̄oho d̄i Mesir kai kuasa ma na'e; nembapu Nahu ro d̄onggo ro mbeipu koroba d̄i ru'u Nahu. 37 To'akaipu (kalampa ncaupu) hukum-hukum ro parenta-parenta ra wa'u tunti b̄a Nahu d̄i ru'u nggomid̄oho. Aina sambea ro ibada d̄i dewa-dewa, 38 ro aina nefamu sake ra wa'u ndawi d̄i weki Nahu lab̄o nggomi. 39 To'akaipu d̄i Nahu, RUMA Allah Ta'alamu, ndad̄i Nahu d̄imahori kalosa nggomid̄oho ra d̄i musu-musumu.>>