La Yehu hanta kasaha ndad̄i sangaji Israil
9
D̄i wakatu ede Nabi Elisa ouna sab̄ua dou ade weki nabi-nabi ra teina ro nggahi sia, <<Ka'ambira weki wekimu d̄ilaokaimu aka Ramot d̄i Gilead, ro wa'apu boto ma isina mina zaitun ake. 2 Sawa'u b̄a ronggo nggomi ta aka ngupapu la Yehu ana la Yosafat ompu b̄a la Nimsi. Recepu sia lao kalai kesena aka sab̄ua b̄ili, 3 ro luapu kai mina zaitun ake d̄i wawo tutana, edempara nggahipu d̄i sia, << Nggahi RUMA b̄a one sia mahanta nggomi ndad̄i sangaji Israil .> Sawa'u b̄a nggori kalampamu rawi ede, tu'u wi'i rocipu hid̄i ede.>> 4 Nabi sampela ede lao aka Ramot, 5 edempara lao rakana la Yehu lab̄o panglima-panglima makalai ma wunga mbolo (mafaka) ta aka. Nggahi nabi ede, <<Ama, mada mai wa'a haba d̄i ru'u Ita.>>Sodi b̄a la Yehu, <<D̄i ru'u cou?>>
cambe b̄a nabi ede, <<Io d̄i ru'u ndai Ita.>> 6 Edempara siad̄oho d̄ua lu'u ade uma, ro nabi sampela ede luana mina zaitun ede d̄i wawo tuta la Yehu ro nggahina, <<RUMA, Allah Ta'ala Israil manggahi, <Nahu matuha ro lanti nggomi mandad̄i sangaji d̄i ru'u ela-Ku Israil . 7 Nggomi d̄imaka'ihaleli iwa ro weki rumamu la Ahab. Kai ndedena Nahu ma hukum la Izebel ma wa'ura hade nabi-nabi Nahu ro ada-ada Nahu ma kalai. 8 Sara'a iwa ro weki lab̄o ana ro ompu b̄a la Ahab pab̄uaku madena sanikina dou mone nataho matua ro ma to'i d̄ika'ihaleli b̄a Nahu. 9 Iwa ro weki la Ahab d̄ikarawi b̄a Nahu b̄une karawi b̄a Nahu d̄i iwa ro weki la Yerobean lab̄o iwa ro weki la Baesa, sangaji-sangaji Israil . 10 Ro la Izebel wati d̄i umbu. Timba sia d̄ingaha b̄a lako d̄i dana ro rasa Yizreel.> >> Sawa'u b̄a rentana sara'a nggahi ro eli ede, nabi sampela ede losana edempara lao raina.
11 Ndad̄i la Yehu dula mbali aka lengad̄ohona, edempara sod̄i b̄a siad̄oho, <<Wara haba au? Dou ma ringu ede na ne'e au lab̄o nggomi?>>
<<Nggomid̄oho ma wa'ura b̄ade,>> cambe b̄a la Yehu.
12 Nggahi siad̄oho, <<Wati! Nami wati b̄ademu, wajo ngoara!>>
Nggahi la Yehu, <<Sia mai karonggana nggahi RUMA b̄a one nahu d̄ihanta kasaha b̄a RUMA ndad̄i sangaji Israil .>>
13 Rociku lenga-lenga la Yehu, runcuna jumba siad̄ohoro wirana jumba-jumbana d̄i a'u d̄i tando la Yehu. Edempara siadoho ufina tarompe ro nggahi kanggicana, <<Yehu sangaji!>>
La Yoram Sangaji Israil D̄ihade
14-15 Ndedeku la Yehu mafakana ao (lewa lab̄o) sangaji Yoram ma wakatu ede wara aka Yizreel. Sangaji Yoram laona ta'aka d̄ilo'ikaina suwu-suwuna b̄ara mboto ncuwuna ade lewa ro laka d̄i Ramot, wakatu sia lewana lab̄o Hazael sangaji Siria. Nggahi la Yehu d̄i lengad̄ohona ma panglima, <<Nggara nggomid̄oho ma ca'usi (satuju) nahu mandad̄i sangaji, jagapu aina sampe wara kone sab̄ua dou rau ma losa d̄i Ramot d̄i lao ngoakaina dou-dou d̄i Yizreel.>> 16 Sawa'u b̄a ede la Yehu ne'ena ese kareta lewakaina edempara laona aka Yizreel. D̄iwakatu ede la Yoram watipu mbaka suwuna, ro la Ahazia sangaji Yehuda wara ta aka lao lambana la Yoram.
17 Wakatu dou majaga d̄i uma d̄ese (menara) jagakai kota Yizreel edana la Yehu lab̄o dou-douna ma mai, nggahi dou ma jaga ede, <<Wara sakalompo dou ma wunga mai ara ake!>>
Cambe/nggahi la Yoram, <<Kaupu sab̄ua dou tentara ma nente jara lao paliti, sab̄ua dou-dou ma mai ede lenga atau musu.>>
18 Edempara kai nentena jara, laora tentara ede laorakana la Yehu ro nggahi sia, <<Sangaji na ne'e b̄ade sab̄ua mai Ita ake ntada lengakai?>>
Cambe b̄a la Yehu, <<Ede laina urusan nggomi! Mai b̄oroweki lab̄o nami.>>
Dou ma jaga uma d̄ese ede, edana tentara ra kakai ede wa'ura rongga d̄i kalompo dou ma mai ede, pala wati poku mbalina. Ndad̄i dou ma jaga ede lao ngoana lampa rawi ede d̄i sangaji, 19 edempara kakai sab̄ua dou tentara makalai. Tentara ake rau sod̄ina b̄une ede rau d̄i la Yehu, ro sakali wali cambe b̄a la Yehu, <<Ede laina urusan nggomi! Mai kab̄oro weki lab̄o nahu!>>
20 Dou ma jaga uma d̄ese ngoa walina d̄i sangaji, b̄a one tentara ra kakai ede na wa'ura rongga d̄i kalompo dou ma mai ede, pala sia wati poku mbalina. Edempara nggahi wali sia, <<Kombisi dou mana'ekai kalompo ede, eded̄u la Yehu, b̄a one sia karaina kareta lewakaina b̄une karai dou ma ringu.>> 21 Edempara parenta b̄a sangaji Yoram, <<Sadiapu kareta nahu.>> Kareta sadia wea, edempara la Yoram lab̄o sangaji Ahazia lao eda angina lab̄o la Yehu, cua-cua ade kareta ndaina. Siad̄oho eda angina lab̄o la Yehu d̄i oma ra ntau la Nabot ntoina. 22 Ndad̄i sod̄i b̄a la Yoram d̄i la Yehu, <<Sab̄ua nggomi maimu tanda lengakai?>> Cambe b̄a la Yehu, <<Wati lu'u b̄a aka mai tanda lengakai, nggara ta ake mbui mboto sando ro nambuipuwarana nemba dewa-dewa (berhala) ra tampu'u b̄a Izebel, inamu ede!>>
23 <<Ake, karawi mahiana (tipu), Ahazia!>> kanggica la Yoram ro kapekona kareta lewakaina edempara lao rai horuna weki. 24 Pala la Yehu hintina ai fanana kai ipi poda ri fana b̄a sia la Yoram b̄oha ketana (kontuna) wontu d̄ei hodona, ndad̄i mbo'o/mab̄ura la Yoram, ro made d̄ei karetana 25-26 Edempara nggahi la Yehu d̄i la Bidkar anamorina ede, (ma b̄atuna ede), <<Sab̄ua nggomi mbuipu kawaramu, wakatu ndai nenteta jara lao b̄atu la Ahab, ama b̄a la Yoram? D̄i wakatu ede RUMA nggahina d̄i la Ahab, <<Nahu kab̄ade cou ma ra hade la Nabot lab̄o anad̄ohona awina, ro Nahu ma sake d̄imahukum nggomi d̄i nggaro ake rau.> >>
Nggahi wali la Yehu d̄i adana, <<B̄a one ndedena, lo'o pakipu timba la Yoram ede d̄i ade nggaro la Nabot, loakud̄u ndad̄ina hukuman Allah d̄i ru'u sia.>>
Hade La Ahazia Sangaji Yehuda
27 La Ahazia edana au ma wa'ura ndad̄i ede, ndad̄i sia karaina karetana na ne'elao aka kota Bet-Hagan. La Yehu coco b̄atuna sia ro nggahi kanggicana d̄i tentara-tentarana, <<Hadepu sia rau!>> Ndad̄i siad̄oho fanana ro kancuwuna sia d̄i ncai ma lao aka Gur, d̄eni lab̄o kota Yibleam. Pala sia na loa lao rai horu weki sampe aka Megido, ro d̄i hid̄i ede sia madena. 28 Pagawe-pagawe la Ahazia, mai wehana timba sia ro lao wa'ana kai kareta mbali aka Yerusalem, edempara umbuna sia d̄i rade sangaji-sangaji d̄i Kota Daud. 29 La Ahazia ndadina sangaji Yehuda wakatu sangaji Yorem ana b̄a la Ahab wa'ura parentana Israil sampuru samba'a.
Sangaji Siwe Izebel D̄ihade
30 Ronggara la Yehu d̄i Yizreel. Sawa'u b̄a ringa b̄a la Izebel mab̄oha au ma wa'ura ndad̄i, sia cau katikana honggona ro celana gendina, edempara dodo ca'awana ta kantonga (tantonga) asi. 31 Wakatu la Yehu lu'una ta lawa kota, nggahi la Izebel, <<Oe Zimri,l dou mahade dou! Au ne'emu nggomi maimu ta (ara) ake?>>
32 La Yehu d̄ongana d̄i ao kantonga (tantonga) ede, ro nggahina, <<Cou ma b̄atu nahu?>> Ringana nggahi ede, d̄ua tolu dou pagawe asi dodo ca'awana. 33 Edempara nggahi la Yehu d̄i siad̄oho, <<Lo'o ca'awapu la Izebel ede!>> Ndad̄i siad̄oho lo'o ca'awana la Izebel, edempara sia pita b̄a kareta ndad̄i ra'ana sarica d̄i tembo ro d̄i jara-jara kareta ede. 34 Edempara la Yehu lu'u ade asi ro ngaha ra nonona. Sawa'u b̄a ede nggahi sia, <<Dou siwe ede wa'ura b̄a'a b̄a RUMA. Kone ade ndedekaina, umbu raupu timbana b̄a one sia ana sangaji.>> 35 Pala wakatu dou-dou d̄ine'e lao umbu, siad̄oho rakana eda peke koha tutana, peke-peke rima ro ed̄ina. 36 Sawa'u b̄a lao ngoa lampa rawi ede d̄i la Yehu, nggahira sia, <<Ake wa'ura nggahi b̄a RUMA, wakatu sia nggahina d̄i ada-Na nabi Elia: Timba la Izebel d̄i ngaha d̄i ngaha b̄a lako d̄i dana ro rasa Yizreel, 37 ro peke-pekena ede d̄imambarumbura b̄une ta'i binata ndad̄ina kone sab̄ua dou rau wati wara ma pata timba auku ede.> >>