9
अबर सेवा र बारे ने जोन पवित्र लोक मन काचे करा जाऊ आय मोके तोमके लिकबार जरूरी नुआय | 2 कसन की मुय तोमर मन र तियारी के जानी, जाहांर लागी मुय तोमर बारे ने मकी दुनिया बिखारी मन र छमे घमण्ड दकाऊ आंय की उपखया र लोक एक बरस ले तियार होयला आत, आवरी तोमर उत्साह ने आवरी खुबे मन के बले उभार ला आचे | 3 मातर मुय भाई मन के हांय काचे पटायली आची की हामि जोन घमण्ड तोमर बारे ने दकायलु, हांय ए गोट ने फोकाहा ना होओ; मातर मुय जसन बललि असनी ची तोमि तियार राहा | 4 असन ना होओ की कोनी मकी दुनिया र वासी मोर संगे आसो आवरी तोमके तियार ना पाओ, तो होयके सके की ये भरोसा र लागी हामि ( ये ना बलु की तोमि लज्जित हुआ | 5 हांई काचे मुय भाई मन के ये बिनती करबार जरुरी समझली की हांय पईले ले तोमर लगे जाओत, आवरी तोमर उद्दार र फल जाहांर बारे ने पईले ले वचन ने दिया जाई रये, तियार करी रओत की ये दबाव ले नाई मातर उद्दारता र फल र असन तियार होओ | 6 मातर ये गोट ये आय जोन खिनिक मा बूनूआय, हांय खिनिक मा ची काटसी बले, आवरी जोन खुबे बुनू आय, हांय खुबे काटसी | 7 हर गोटक लोक जसन मन विचारलाय असनी ची दान करा; ना कुड़ कुड़ी करी आवरी ना दबाव ले, कसन की माहा परबु हरिक ले देबा लोक के मया करू आय | 8 माहा परबु सबु असन अनुग्रह तोमके खुबे देयके सके की जोनके सबु गोट ने कड़की ची दाय, सबु बानी, जोन तोमके जरूरी आय, तोमर लगे रओ; आवरी सबु अच्छा काम काचे तोमर लगे खुबे काई रओ | 9 जसन लिकला आचे, “ हांय बिकरला हांय कंगाल मन के दान देला, हांतार धरम सबु दाय बनी रयसी |” 10 जसन: जोन बुनबा बितार बीजा आवरी खायबा काचे रोटी देऊ आय, हांय तोमके बीजा देयसी, आवरी तोमके फलवन्त करसी: आवरी तोमर धरम र फल के बाड़ायसी | 11 तोमि सबु गोट ने सबु असन उद्दारता काचे जोन हामर बाटले माहा परबु र धन्यवाद करू आय, धनवान करा जाहा | 12 कसन की ये सेवा के पूरा करले ना सिरिप पवित्र लोक र जरूरत पूरा होऊ आय, मातर लोक मनर बाटले माहा परबु र बले खुबे धन्यवाद होऊ आय | 13 कसन की ये सेवा के परनाम मानी करी हांय माहा परबु र महिमा छमे आनुआंय की तोमि मसीह र सुसमाचार के मानी करी हांतार अधीन रऊ आस, आवरी तिकर आवरी सबु र सायता करबा ने उद्दारता छमे आनते रऊ आस | 14 आवरी हांय मन तोमर काचे पारतना करू आत; आवरी हांई काचे की तोमके माहा परबु र बड़े मा अनुग्रह आचे, तोमर लालसा करते रऊ आत | 15 माहा परबु र, हांतार हांय दान काचे जोन वर्णन ले बाहरे आचे, धन्यवाद होओ |